ဖေဖော်ဝါရီ ၂၁၊ ၂၀၂၆။ဇေအောင်/People’s Spring
စစ်ကိုင်းတိုင်း၊ မုံရွာမြို့က စစ်တပ်ဂိတ်အနီးမှာ မိန်းကလေးတစ်ဦး သေဆုံးနေပြီး တစ်ရက်ကြာမှ အလောင်းလာကောက်သွားကြောင်း ဒေသခံတွေက ပြောပါတယ်။
မနေ့က ဖေဖော်ဝါရီ ၂၀ရက် ညနေ ၆နာရီခန့်က မုံရွာမြို့၊ မြို့ရှောင်လမ်းအရှေ့ဘက်၊ စစ်တပ် တပ်စွဲရာ ကံသာဘုန်းကြီးကျောင်းနဲ့ အနီးမှာ အသက်(၂၀)ဝန်းကျင် မိန်းကလေးတစ်ဦး ဒဏ်ရာတွေနဲ့ လဲကျသေဆုံးနေခဲ့တာဖြစ်ကြောင်း ဒေသခံတွေနဲ့ ကြောင်း မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။
ပြည်သူတွေက စစ်သားတွေဆီ အကြောင်းကြားခဲ့ပေမဲ့ အလောင်းသယ်ဆောင်ပေးခြင်းမရှိဘဲ ဒီကနေ့ဖေဖော်ဝါရီ ၂၁ရက်မှသာ အလောင်းလာကောက်သွားကြောင်း မုံရွာမြို့နယ် သတင်းမှန်ပြန်ကြားရေးအဖွဲ့က ဆိုပါတယ်။
Public Service Announcement
“ ဒီကနေ့ ညနေ ၃ နာရီလောက်က လာကောက်သွားပြီ ပြောတယ်” လို့ အထက်ပါအဖွဲ့တာဝန်ရှိသူက ပြောပါတယ်။
သေဆုံးသူအမျိုးသမီးဟာ လုံချည်ခရမ်းရောင်၊ ဆံပင်ကုတ်ဝဲနဲ့ဖြစ်ပြီး ဘယ်သူဘယ်ဝါဆိုတာတော့ မသိရသေးပါဘူး။
မုံရွာမြို့ပေါ်မှာ မကြာခဏ ဓါးပြတိုက် လုယက်မှုတွေအဖြစ်များနေပြီး စစ်ကောင်စီတပ်ကလည်း ဖမ်းဆီးအရေးယူခြင်း မရှိဘူးလို့ မြို့ခံတွေက ပြောပါတယ်။
