ဖေဖော်ဝါရီ ၂၆၊ ၂၀၂၆။ ထားမြတ်/People’s Spring
မြန်မာ-တရုတ်နယ်စပ် ချီဖွေဒေသအပါအဝင် အာဏာသိမ်းစစ်တပ်က ကချင်လွတ်လပ်ရေးတပ်မတော်(KIO/KIA) ထိန်းချုပ်နယ်မြေတွေကို လေကြောင်း တိုက်ခိုက်မှုအကြိမ်ကြိမ် ပြုလုပ်ခဲ့လို့ အရပ်သား ထိခိုက်ဒဏ်ရာရတာတွေရှိခဲ့ဟု KIA သတင်းပြန်ကြားရေးဌာနက ဖော်ပြပါတယ်။
ဖေဖော်ဝါရီ ၂၅ရက်ညပိုင်းသတင်းဖော်ပြချက်မှာ ဖေဖော်ဝါရီ ၂၃ရက်မှာ စစ်တပ်ရဲ့ လေကြောင်း တိုက်ခိုက်မှုတွေ ကို အသိပေးခဲ့တာဖြစ်ပါတယ်။
ဖေဖော်ဝါရီ ၂၃ရက်မှာ လဂျားယန်ကျေးရွာ၊မြို့သစ်၊ တခေါ်ခ ကျေးရွာဘက်၊ ဝိုင်းမော်ဒေသ ဝါးရှောင် KBC ဘုရားကျောင်းဝန်းနဲ့ ချီဖွေသွားလမ်း ၁၃မိုင်ဘေးရှိ ရာဘာခြံဘက်မှာ လေယာဉ်ဗုံးကြဲ တိုက်ခိုက်ခဲ့ကြောင်း အသိပေးပါတယ်။ ရာဘာခြံ ဗုံးကြဲခံရလို့ ရာဘာခြံလုပ်သား ၆ဦး ထိခိုက်ခဲ့တယ်လို့ ဆိုပါတယ်။
Public Service Announcement
ဒါ့အပြင် အလော့ဘွမ်ဒေသမှာလည်း သီရိမင်္ဂလာ သုခကျောင်းတိုက်မှာ လေကြောင်းဗုံးကြဲခံရလို့ ထိခိုက် ဒဏ်ရာရသူတွေရှိခဲ့ကြောင်း အသိပေးပါတယ်။
ပြီးခဲ့တဲ့ရက်ပိုင်းကလည်း စစ်ကောင်စီဟာ တရုတ်-မြန်မာနယ်စပ် မိုင်ဂျာယန်ဒေသ ဘွမ်ကထောင်ဘက်မှာ ဗုံးကြဲခဲ့လို့ သက်ကြီး အမျိုးသား ၁ဦးသေဆုံးခဲ့ရတယ်လို့ ဆိုပါတယ်။
စစ်ကောင်စီဟာ ဖေဖော်ဝါရီ ၂၁ရက်ကလည်း KIA ထိန်းချုပ်နယ်မြေ အင်ဘာပါ ကျေးရွာကို လေကြောင်း တိုက်ခိုက်ခဲ့ပါတယ်။
KIO/KIA ထိန်းချုပ်နယ်မြေတွေကို စစ်တပ်က လေကြောင်း ဗုံးကြဲတာတွေ ဆက်တိုက်လုပ်နေလို့ ဒေသ တာဝန်ရှိသူတွေက ပြည်သူတွေ လေကြောင်းရန် သတိပြုဖို့ အသိပေးကြေညာထားကြောင်းလည်း KIAက သတင်းဖော်ပြပါတယ်။
စစ်ကောင်စီတပ်ဟာ ဖေဖော်ဝါရီ ၂၀ရက်နောက်ပိုင်း KIO ထိန်းချုပ်နယ်မြေတွေကို လေကြောင်း ဗုံးကြဲရာမှာ စစ်ဘက် တပ်စခန်းတွေထက် အရပ်သားပြည်သူ နေထိုင်ရာတွေကို ပစ်မှတ်ထား တိုက်ခိုက်နေခြင်းဖြစ်တယ်လို့ KIO/KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောပြထားပြီး ပြည်သူတွေ လေကြောင်းရန် သတိပြုဖို့ နှိုးဆော်ထားပါတယ်။
