မတ်-၁၊၂၀၂၆။ထားမြတ်/People’s Spring
အမျိုးသားဒီမိုကရေစီအဖွဲ့ချုပ်ဒုတိယဗဟိုကော်မတီရဲ့ ကြားကာလ သတ္တမအကြိမ်အစည်းအဝေး ကို ဒီကနေ့ ဖေဖော်ဝါရီ ၂၈ရက်မှာ ကျင်းပခဲ့ရာ ၂၀၂၀ ခုနှစ် ရွေးကောက်ပွဲရလဒ်ရဲ့ တရားဝင်တည်ရှိမှုဖြင့် ပြည်ထောင်စုလွှတ်တော်၊ တိုင်းနဲ့ ပြည်နယ်လွှတ်တော်များခေါ်ယူကျင်းပဖို့ အပါအဝင် ဆုံးဖြတ်ချက် ( ၁၃ ) ချက် ကို ကန့်ကွက်သူမရှိ အတည်ပြုချမှတ်နိုင်ခဲ့ကြောင်း NLD ဗဟိုအလုပ်ကော်မတီက သတင်းထုတ်ပြန်ပါတယ်။
ဖေဖော်ဝါရီ ၂၈ ရက်နေ့ကကျင်းပတဲ့ အစည်းအဝေးကို သဘာပတိအဖွဲ့ဝင် (၁) ဦး၊ ဗဟိုအလုပ်အမှုဆောင်အဖွဲ့ဝင်များ၊ အရံဗဟိုအလုပ်အမှုဆောင်အဖွဲ့ဝင်များ၊ ဗဟိုကော်မတီဝင်များ ၊ အရံဗဟိုကော်မတီဝင်များစုစုပေါင်း ( ၅၁ ) ဦးနဲ့ တိုင်းဒေသကြီး၊ ပြည်နယ်အလုပ်အမှုဆောင် ( ၂၀ ) ဦး၊ ဗဟိုရေးရာကော်မတီများမှ (၁၈ )ဦးအထူးဧည့်သည်တော် ၉ ဦးအပါအဝင် ၉၉ဦး တက်ရောက်ခဲ့တယ်လို့ ဆိုပါတယ်။
အစည်းအဝေးအတည်ပြုချက်တွေထဲမှာစစ်အာဏာသိမ်းမှုကြောင့် ပေါ်ပေါက်လာသော မြန်မာ့နိုင်ငံရေးပြဿနာများကို ဖြေရှင်းရာမှာ အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်နဲ့ တွေ့ဆုံဆွေးနွေးမှုမပါဝင်ဘဲပြေလည်ရေးလမ်းစရရှိနိုင်မယ် မဟုတ်ဟု ယုံကြည်ကြောင်း ထပ်လောင်းအသိပေးပြီး မတရားဖမ်းဆီး ခံထားရသော ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများအားလုံး ခြွင်းချက်မရှိ အမြန်ဆုံး လွတ်မြောက်ရေးကို စီမံချက်များရေးဆွဲ ဆောင်ရွက်ဖို့ ပါရှိတယ်လို့ အသိပေးပါတယ်။
Public Service Announcement
ဒါ့အပြင်ပါတီအင်အားကျစ်လစ်ခိုင်မာရေးအတွက်အဆင့်ဆင့်သော ပါတီအမှုဆောင်များရဲ့ ထိရောက်သောဦးဆောင်မှုဖြင့် စီမံချက်များ ရေးဆွဲ အကောင်အထည် ဖော်ဆောင်ရန်လည်း ဆုံးဖြတ်ခဲ့တယ်လို့ ဆိုပါတယ်။
အစည်းအဝေးမှာ ဗဟိုအလုပ်ကော်မတီအပါအဝင် တိုင်းဒေသကြီးနဲ့ ပြည်နယ်အသီးသီးတို့မှ ဗဟိုကော်မတီဝင်များ၊ ဗဟိုရေးရာကော်မတီများမှ လုပ်ငန်းဆောင်ရွက်မှု အစီရင်ခံစာများ၊ အကြံပြု စာတမ်းများ တင်ပြဆွေးနွေးခဲ့ကြကြောင်းလည်း ဖော်ပြကာ ဗဟိုအလုပ်ကော်မတီရဲ့ လုပ်ငန်းအစီရင်ခံစာကို အတည်ပြုပြီး တင်သွင်းလာသော အစီရင် ခံစာများ၊ အကြံပြုချက်များကို မှတ်တမ်းတင်ခဲ့ကြောင်း ထုတ်ပြန်ပါတယ်။
NLDပါတီဟာ ၂၀၂၀ ခုနှစ် နိုဝင်ဘာလ ၈ ရက် ရွေးကောက်ပွဲမှာ မဲဆန္ဒနယ်အားလုံးရဲ့ ၈၂ရာခိုင်နှုန်းကျော်နဲ့ အနိုင်ရရှိကာလွှတ်တော်ကိုယ်စားလှယ် ၉၂၀ ဦး ရွေးချယ်တင်မြှောက်ခံခဲ့ရပါတယ်။ ဒါပေမဲ့ စစ်ခေါင်းဆောင် မင်းအောင်လှိုင်က ဒေါ်အောင်ဆန်းစုကြည်အပါအဝင် အစိုးရ ခေါင်းဆောင်တွေကို ဖမ်းဆီးပြီး အာဏာသိမ်းခဲ့ ပါတယ်။အာဏာသိမ်းမှု ၅နှစ်နီးပါးအကြာ ၂၀၂၅ ဒီဇင်ဘာမှာ စစ်ကောင်စီက ရွေးကောက်ပွဲကို အပိုင်းလိုက်ကျင်းပပြီး အာဏာတည်မြဲရေးဆက်လက်ကြိုးပမ်းလျက်ရှိရာစစ်ကောင်စီရဲ့ ရွေးကောက်ပွဲရလဒ်ကို မြန်မာပြည်သူတွေနဲ့ နိုင်ငံတကာက အသိအမှတ်ပြုတာ မရှိခဲ့ပါဘူး။
ပြည်ထောင်စုလွှတ်တော်ကိုယ်စားပြုကော်မတီ(CRPH)ကလည်း တရားမဝင် စစ်အာဏာသိမ်းမှု (၅) နှစ်ပြည့် ကြေညာချက်ကို ၂၀၂၆ ဖေဖော်ဝါရီ ၁ရက်မှာ ထုတ်ပြန်ခဲ့ရာ ၂၀၂၀ ရွေးကောက်ပွဲမှာ ထုတ်ဖော်ပြသခဲ့တဲ့ ပြည်သူ့ဆန္ဒကို ကိုယ်စားပြုတဲ့ တရားဝင် ဥပဒေ ပြု အဖွဲ့အစည်းဖြစ်သော CRPH အနေနဲ့ စစ်အုပ်စု ပြုလုပ်ခဲ့တဲ့ ဟန်ပြ ရွေးကောက်ပွဲတွေနဲ့ အဲဒီက ထွက်ပေါ်လာမယ့် အဖွဲ့အစည်းမှန်သမျှ လုံး၀ အသိအမှတ် မပြုကြောင်း အတည်ပြုဖော်ပြထားပါတယ်။
