မတ်-၃၊ ၂၀၂၆။ ဒလပန်း/People’s Spring
ဒီမိုကရေစီအကျိုးပြုကရင့်တပ်မတော်(DKBA)တပ်ဖွဲ့က တိုက်ပွဲဖြစ်ပွါးနေတဲ့ ကရင်ပြည်နယ်၊ မြဝတီမြို့တောင်ဘက် မင်းလက်ပံဒေသအနီးမှာ ရေပေါ်စျေးလုပ်ဖို့ ပြင်ဆင်နေတယ်လို့ ဒေသခံတွေဆီက သိရပါတယ်။
မတ်လ ၁ ရက်ကလည်း DKBA တပ်ဖွဲ့ဝင်တွေက မင်းလက်ပံဒေသအနီး သောင်ရင်းမြစ်မှာ ရေပေါ်စျေးဖွင့်ပွဲပြုလုပ်ခဲ့ပါတယ်။
“၁ ရက်နေ့ကတော့ ဖွင့်ပွဲဆိုပြီး ဘောက်တွေတစ်နေကုန်ဖွင့်ပြီး ချနေကြတာပဲ။ မနေ့ကတော့ တိုက်ပွဲအသံတွေကြောင့် ပြန်ငြိမ်နေတယ် “ လို့ ဒေသခံတစ်ဦးက ပြောပါတယ်။
Public Service Announcement
ပြီးခဲ့တဲ့နှစ် သင်္ကြန်ကာလမှာ စျေးပေါ်စျေးကို မင်းလက်ပံကျေးရွာအနီးက သောင်ရင်းမြစ်ထဲမှာ ပြုလုပ်ခဲ့ပါတယ်။
အရင်ပြုလုပ်ခဲ့တဲ့နေရာအနီးမှာ စစ်တပ်နဲ့ တော်လှန်ရေးပူးပေါင်းတပ်တွေကြား တိုက်ပွဲဖြစ်ပွါးနေတာကြောင့် နေရာပြောင်းရွေ့ပြုလုပ်ဖို့ပြင်ဆင်နေတယ်လို့ သိရပါတယ်။
“အရင်က မင်းလက်ပံရွာထဲက သောင်ရင်းမြစ်မှာ လုပ်တယ်။ အခုက အဲ့နေရာရဲ့ တောင်ဘက် နည်းနည်းရွှေ့လုပ်ဖို့ လုပ်နေတာ“လို့ ဒေသခံတစ်ဦးက ပြောပါတယ်။
စစ်တပ်ဟာ မြဝတီမြို့တောင်ဘက် လက်လွှတ်ခဲ့ရတဲ့ တပ်စခန်းတွေကို ပြန်ရဖို့ ပြီးခဲ့တဲ့နှစ် အောက်တိုဘာအတွင်းက စစ်ကြောင်း သုံးကြောင်းနဲ့ စစ်ရေးလှုပ်ရှားခဲ့ပါတယ်။
စစ်ကြောင်းသုံးကြောင်းနဲ့ စစ်ကြောင်းထိုးနေပေမယ့်လည်း ကာကွယ်ရေးတပ်ဖွဲ့တွေ ပိတ်ဆို့တိုက်ခိုက်မှုတွေကြောင့် စစ်တပ်ဟာ မင်းလက်ပံကျေးရွာအနီးကနေ ရှေ့မတိုးနိုင်သေးပါဘူး။
မင်းလက်ပံကျေးရွာကို ကာကွယ်ရေးတပ်ဖွဲ့တွေ ထိန်းချုပ်ထားဆဲဖြစ်ပြီး စစ်တပ်က စစ်ကြောင်းထိုးနေတာဖြစ်ပါတယ်။ မင်းလက်ပံကျေးရွာဟာ မြဝတီမြို့တောင်ပိုင်းဒေသအတွက် အဓိက ခံစစ်စည်းတစ်ခု ဖြစ်ပါတယ်။
DKBA ဟာ ဦးသိန်းစိန်အစိုးရလက်ထက်က တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)လက်မှတ်ထိုးခဲ့တဲ့အဖွဲ့ဖြစ်ပြီး စစ်တပ်အာဏာသိမ်းပြီးနောက်ပိုင်း စစ်တပ်လုပ်တဲ့ ဆွေးနွေးပွဲတွေကို ပုံမှန်တက်ရောက်နေတဲ့အဖွဲ့ဖြစ်ပါတယ်။ စစ်တပ် နဲ့ တိုက်ပွဲဖြစ်ပွားခြင်းမရှိသလို စစ်တပ်ရွေးကောက်ပွဲကို ထောက်ခံတယ်လို့ တရားဝင်ထုတ်ပြန်ထားတဲ့အဖွဲ့ ဖြစ်ပါတယ်။
ဒါ့အပြင် DKBAဟာ အမေရိကန်နိုင်ငံသားတွေကို ပစ်မှတ်ထားပြီး အွန်လိုင်းငွေလိမ်လုပ်ငန်းတွေလုပ်တာကြောင့် အမေရိကန်အစိုးရက DKBA ခေါင်းဆောင် နဲ့ DKBA အဖွဲ့ကို အရေးယူဒဏ်ခတ်ထားပါတယ်။
