မတ်-၆၊ ၂၀၂၆။ဇေအောင်/People’s Spring
စစ်ကိုင်းတိုင်း၊ မုံရွာ-မန္တလေးလမ်းပိုင်းမှာ စစ်တပ်က ခရီးသည်တင်ယာဉ် ပစ်ခတ်လို့ ယာဉ်ပေါ်ပါ ခရီးသည်အမျိုးသမီးတစ်ဦး သေဆုံးခဲ့ကြောင်း ဒေသခံတွေက ပြောပါတယ်။
မတ်လ ၄ရက် မနက်ပိုင်းက မုံရွာ-မန္တလေးလမ်းပိုင်းတနေရာမှာ Jk King ခရီးသည်တင်ယာဥ် တစ်စီးကို စစ်တပ်က ပစ်ခတ်ခဲ့ရာ ယာဉ်ပေါ် လိုက်ပါလာတဲ့ မုံရွာမြို့က အသက်(၄၅)နှစ်ဝန်းကျင် ခရီးသည်အမျိုးသမီးတစ်ဦး သေဆုံးခဲ့ကြောင်း မုံရွာမြို့ခံအချို့က ပြောပါတယ်။
“ကျည်က လည်ပင်းဖောက်ထွက်သွားတယ်ပြောတယ်။ သတင်းကိုလည်းဖုံးထားတယ်။”လို့ မုံရွာမြို့ခံအမျိုးသားတစ်ဦးက ပြောပါတယ်။
Public Service Announcement
အဆိုပါ JK King ယာဥ်လိုင်းဟာ ယာဉ်အသေးတွေနဲ့ မုံရွာ-မန္တလေးပြေးဆွဲနေတဲ့ယာဥ်လိုင်းဖြစ်ပြီး ၎င်းကားနဲ့သွားလာမယ်ဆိုရင် စစ်ဆေးခံရမှုနည်းပါးတာကြောင့် နာမည်ရတဲ့ယာဥ်လိုင်းဖြစ်ကြောင်း၊ ပစ်ခတ်ခံရတဲ့အတွက် အံ့သြမိကြောင်း မုံရွာမြို့ခံတွေက ဆိုပါတယ်။
မုံရွာ-မန္တလေးလမ်းပိုင်းမှာ ခရီးသည်တင်ယာဥ်တွေ ပစ်ခတ်ခံရမှုမကြာခဏ ဖြစ်ပေါ်နေပြီး ထိခိုက်သေဆုံးတာတွေ ရှိနေပါတယ်။
မတ်လ ၃ရက်ညကလည်း မုံရွာ-မန္တလေးလမ်းအနီးက ကြေးမုံကျေးရွာက နေအိမ်တစ်အိမ်ကို စစ်အုပ်စုကဝင်ပြီး Surf ကားတစ်စီးနဲ့ငွေတွေကိုသိမ်းကာ သေနတ်နဲ့ပါ ပစ်ခတ်လို့ ပြည်သူတစ်ဦး သေနတ်ကျည်ထိမှန် ဒဏ်ရာရရှိခဲ့ပါတယ်။
