မတ်-၉၊ ၂၀၂၆။ ထားမြတ်/People’s Spring
စစ်ကောင်စီဟာ အတုအယောင်ရွေးကောက်ပွဲ ကျင်းပပြီး တရားဝင်အစိုးရအဖြစ် ပုံဖော်ကာ နိုင်ငံတကာကို လိမ်လည်ဖို့ လုပ်ဆောင်တော့မှာ ဖြစ်သလို သူတို့ လုပ်နေကျ အတိုင်း ငြိမ်းချမ်းရေး၊ တွေ့ဆုံဆွေးနွေးရေး စတဲ့ လမ်းကြောင်းတွေကို အကြောင်းပြ ဖိတ်ခေါ်မှုတွေ လုပ်ဆောင်လာနိုင်ကြောင်း အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ပြောကြားပါတယ်။
မတ်လ ၉ရက် ရန်ကုန်ဖက်ဒရယ်ယူနစ်လွှတ်တော် (၁၁)ကြိမ်မြောက် အစည်းအဝေးမှာ ပြည်ထောင်စုဝန်ကြီးချုပ်က အခုလို ပြောကြားခဲ့တာပါ။
“သူတို့ရဲ့ လုပ်ရိုးလုပ်စဉ်တွေအတိုင်း ငြိမ်းချမ်းရေး၊ တွေ့ဆုံဆွေးနွေး စတဲ့ လမ်းကြောင်းများကို အကြောင်းပြကာ ဖိတ်ခေါ်မှုတွေ လုပ်ဆောင်လာနိုင်တာကြောင့် တော်လှန်ရေးရဲ့ ဦးတည်ချက်နဲ့ လမ်းကြောင်းမှန်ကနေ သွေဖယ်မသွားစေဖို့ တော်လှန်ရေး အင်အားစုများရဲ့ စုစည်းညီညွတ်မှုကို ပြသရမယ့် အချိန်ကာလလည်းဖြစ်ပါတယ်။” လို့ ပြည်ထောင်စုဝန်ကြီးချုပ်က ပြောပါတယ်။
Public Service Announcement
အမျိုးသားညီညွတ်ရေးအစိုးရ အနေနဲ့လည်း တော်လှန်ရေး ဦးဆောင်အဖွဲ့များအကြား နိုင်ငံရေးအရ ကျေလည်မှုရှိစေရေးအတွက် အချိန်ပေး တွေ့ဆုံဆွေးနွေးမှုကို ဆက်တိုက် လုပ်ဆောင် နေကြောင်း အသိပေးပါတယ်။
ဒါအပြင် အားကောင်းတဲ့ စုဖွဲ့မှုကနေတဆင့် အာဏာရှင် စနစ် အမြစ်ပြတ် ဖယ်ရှားနိုင်ရေးနဲ့ ဖက်ဒရယ်ဒီမိုကရေစီပြည်ထောင်စု ပေါက်ထွန်းလာစေရေး ကြိုးပမ်းဆောင်ရွက်လျက်ရှိကြောင်း ဝန်ကြီးချုပ်က ပြောပါတယ်။
အစိုးရအဖွဲ့ရဲ့ ခေါင်းဆောင်တွေဖြစ်တဲ့ သမ္မတ ဦးဝင်းမြင့်နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် ကျန်ရှိနေသေးတဲ့ နိုင်ငံရေးအကျဉ်းသားများအားလုံး အမြန်ဆုံးလွတ်မြောက်လာဖို့နဲ့ ပြည်သူလူထုရဲ့ လွတ်လပ်မှု၊ လုံခြုံမှုနဲ့ တရားဥပဒေစိုးမိုးရေး အားကောင်းတဲ့ နိုင်ငံတစ်ခု ဖြစ်ဖို့ ဆက်လက် ကြိုးပမ်းသွားကြဖို့ လည်း ဝန်ကြီးချုပ်က တိုက်တွန်းပါတယ်။
ဒီကနေ့ ကျင်းပတဲ့ ရန်ကုန်ဖက်ဒရယ်ယူနစ်လွှတ်တော်မှာ စစ်အုပ်စု လုပ်ဆောင်ခဲ့တဲ့ ရွေးကောက်ပွဲတွေဟာ တရားမဝင်ကြောင်း မှတ်တမ်းတင်ခဲ့သလို သမ္မတဦးဝင်းမြင့်၊ နိုင်ငံတော်ရဲ့အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားများ လွတ်မြောက်ရေးဟာ အထူးဦးစားပေးလုပ်ငန်းစဉ် ဖြစ်ကြောင်း အရေးကြီးအဆိုကိုလည်း ကန့်ကွက်သူမရှိ မှတ်တမ်းတင်ကြောင်း ကြေညာခဲ့ပါတယ်။
ရန်ကုန်ဖက်ဒရယ်ယူနစ်လွှတ်တော် (၁၁) ကြိမ်မြောက်အစည်းအဝေးသို့ အမျိုးသားညီညွတ်ရေးအစိုးရ နိုင်ငံတော်ယာယီသမ္မတ ဒူဝါးလရှီးလ၊ ပြည်ထောင်စုလွှတ်တော် ကိုယ်စားပြုကော်မတီဥက္ကဋ္ဌ ဦးအောင်ကြည်ညွန့်၊ အမျိုးသားညီညွတ်ရေးအစိုးရ ပြည်ထောင်စု ဝန်ကြီးချုပ် မန်းဝင်းခိုင်သန်း၊ အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင် အဖွဲ့ဝင် ဦးထွန်းထွန်းဟိန်နဲ့ ဗဟိုအလုပ်ကော်မတီဝင်များ၊ ရန်ကုန်တိုင်းအလုပ်အမှုဆောင်အဖွဲ့ဝင်များ၊ ပြည်ထောင်စုလွှတ်တော်ကိုယ်စားလှယ်များ၊ ပြည်နယ်နှင့်တိုင်း/ဖက်ဒရယ်ယူနစ်လွှတ်တော် အသီး သီးမှ လွှတ်တော်ကိုယ်စားလှယ်များ၊ လုပ်ဖော်ကိုင်ဖက် မဟာမိတ် နိုင်ငံရေး၊ တော်လှန်ရေး အင်အားစုများ၊ ရန်ကုန်ဖက်ဒရယ်ယူနစ် ကြားကာလအစီအမံရေးဆွဲရာတွင် ပါဝင်ဆောင်ရွက်ခဲ့ကြ သော မိတ်ဖက်အဖွဲ့အစည်းများ၊ အထူးဖိတ်ကြားထားသော နိုင်ငံခြားသံရုံးများနဲ့ နိုင်ငံတကာ အဖွဲ့အစည်းများမှ သံတမန်များ၊ ဧည့်သည်တော်များတက်ရောက်ခဲ့ဟု ရန်ကုန်လွှတ်တော်က သတင်းထုတ်ပြန်ထားပါတယ်။
