မတ်-၁၀၊၂၀၂၆။ထားမြတ်/People’s Spring
ရှမ်းပြည်နယ်မြောက်ပိုင်း၊ ကျောက်မဲမြိုနယ် ပုံဝိုးကျေးရွာအုပ်စုအတွင်းမှာ ဒီကနေ့ မတ်လ ၁၀ရက်မှာ စစ်ကောင်စီတပ်နဲ့ တိုက်ပွဲဖြစ်ပွားခဲ့ကြောင်း ရှမ်းပြည်တိုးတက်ရေးပါတီ(SSPP/SSA)က အသိပေးထုတ်ပြန်ပါတယ်။
စစ်ကောင်စီတပ်က SSPP တပ်စခန်းရှိရာ ပုံဝိုးကျေးရွာနဲ့ ကွမ်ဟင်ကျေးရွာအနီး ထိုးစစ်ဆင်လာလို့ မတ်လ ၁၀ရက် နံနက် ၁၁နာရီကျော်မှာ တိုက်ပွဲစတင်ခဲ့တာလို့ ဆိုပါတယ်။
စစ်ကောင်စီတပ်က အင်အား ၁၀၀ခန့်ရှိပြီး နှစ်ဖက်တိုက်ပွဲဟာ ၁နာရီကျော်ကြာမြင့်ခဲ့ကြောင်း ထုတ်ပြန်ပါတယ်။
Public Service Announcement
SSPP တပ်စခန်းတည်ရှိရာကို စစ်ကောင်စီ တပ်ထိုးစစ်ဆင်လာပြီး စတင်ပစ်ခတ်လို့ တိုက်ပွဲဖြစ်ပွားခဲ့တာဖြစ်ကြောင်းနဲ့ နှစ်ဖက်ထိခိုက်ကျဆုံး ရှိ၊မရှိ မသိရသေးဘူးလို့ ဖော်ပြထားပါတယ်။
လက်ရှိမှာ စစ်ကောင်စီတပ်ဟာ ပုံဝိုးကျေးရွာ ၊ ကွမ်ဟင်ကျေးရွာ ၊ တော်လေကျေးရွာနဲ့ လေလွယ်ကျေးရွာတို့မှာ စစ်အင်အား ဖြည့်တင်းနေလို့ နှစ်ဖက် စစ်ရေးတင်းမာနေကြောင်းလည်း အသိပေးထားပါတယ်။
SSPPဟာ စစ်တပ်အာဏာသိမ်းပြီးနောက် စစ်ကောင်စီတပ်နဲ့ တိုက်ပွဲကြီးကြီးမားမားဖြစ်ပွားမှု မရှိသေးပါဘူး။ ဒေသအချို့မှာ ထိတွေ့တိုက်ပွဲအချို့၊ တင်းမာမှု အချို့ရှိခဲ့ပေမယ့် နောက်ပိုင်းမှာ နှစ်ဖက်ပြေလည်သွားတဲ့ ဖြစ်စဉ်တွေလည်း ရှိခဲ့ပါတယ်။
စစ်ကောင်စီတပ်နဲ့ တိုက်ပွဲဖြစ်ပွားမှု အခြေအနေတွေ မေးမြန်းဖို့ SSPP ပြောရေးဆိုခွင့်ရှိသူထံ ဆက်သွယ်ထားဆဲဖြစ်ပါတယ်။
