မတ်-၁၃၊၂၀၂၆။ဇော်ရမ်း/People’s Spring
ရခိုင်ပြည်နယ်၊ ကျောက်တော်မြို့က ကစ္ဆပနဒီတံတားကို စစ်ကောင်စီက လေကြောင်းကနေ ဗုံးကြဲလို့ ပျက်စီးမှုတွေရှိတယ်လို့ ဒေသခံတွေကပြောပါတယ်။
မတ်လ ၁၂ရက် ည ၉နာရီ ၄၅မိနစ်ခန့်မှာ ဂျက်ဖိုက်တာနဲ့ ဗုံးကြဲတာဖြစ်ပြီး တံတားကိုယ်ထည်နဲ့ လက်ရမ်းတွေပျက်စီးသွားတယ်လို့ အဲဒီတံတားကို ဖြတ်သန်းခဲ့တဲ့ ကုန်တင်ယာဉ်မောင်းတစ်ဦးကပြောပါတယ်။
” ကြံ့ခိုင်မှုအတွက် စိတ်ပူရတယ်။ ထိန်းသွားလို့တော့ ရနေသေးတယ်။ တံတားကြမ်းပြင်တွေလည်းထိတယ်။အထူးသဖြင့် တံတားညာခြမ်းက တော်တောိထိထားတယ်” လို့ ၎င်းက ဆိုပါတယ်။
Public Service Announcement
ကစ္ဆပနဒီတံတားဟာ ကုလားတန်မြစ်ပေါ်မှာ တည်ဆောက်ထားပြီး ကျောက်တော်- မြောက်ဦး- မင်းပြားမြို့နယ်တွေကို ဆက်သွယ်ထားသလို ရန်ကုန်- စစ်တွေ လမ်းမကြီးပေါ်က အဓိကတံတားလည်းဖြစ်ပါတယ်။
ကျောက်တော်မြို့ကို အာရက္ခတပ်တော်(AA)က ၂၀၂၄ ဖေဖော်ဝါရီပထမလပတ်မှာ သိမ်းယူခဲ့တာဖြစ်ပြီး ဖေဖော်ဝါရီလ ၁၁ရက်မှာ စစ်ကောင်စီက ကစ္ဆပနဒီတံတားကို လေကြောင်းကနေ ဗုံးကြဲခဲ့ဖူးပါတယ်။
ရခိုင်ပြည်နယ်မှာ AAရဲ့ မြို့သိမ်းတိုက်ပွဲတွေအတွင်း စစ်ကောင်စီက အများပြည်သူအသုံးပြုနေတဲ့တံတားတွေ၊ လမ်းတွေကို ဖောက်ခွဲဖျက်ဆီးဖို့အမိန့်ပေးခဲ့လို့ တံတားအချို့ ဖျက်ဆီးခဲ့တယ်လို့ အနောက်တောင်တိုင်းစစ်ဌာနချုပ် လက်အောက်ခံ ခလရ(၃၆)တပ်ရင်း ဆေးအရာခံဗိုလ်က AAထံ ထုတ်ဖော်ဝန်ခံခဲ့ဖူးပါတယ်။
ရခိုင်ပြည်နယ်မှာ စစ်တွေနဲ့ ကျောက်ဖြူမြို့သိမ်းတိုက်ပွဲ ပိုမိုပြင်းထန်နေပြီး စစ်ကောင်စီက AAထိန်းချုပ်ထားတဲ့မြို့နယ်တွေကို လေကြောင်းတိုက်ခိုက်မှုတွေအရှိန်မြှင့်နေပါတယ်။
AAကလည်း လေကြောင်း၊ရေကြောင်းနဲ့လက်နက်ကြီးအန္တရာယ်ကိုသတိပေးထားပါတယ်။မတ်လ ၈ရက်က အမ်းမြို့နယ်၊ ဒါးလက်ချောင်းဒေသမှာရှိတဲ့ စစ်သုံ့ပန်း အကျဉ်းစခန်းကို စစ်ကောင်စီက ဗုံးကြဲခဲ့လို့ အရာရှိကြီး တွေအပါအဝင် စစ်သုံ့ပန်း ၁၁၆ဦး သေဆုံးခဲ့ပြီး ၃၂ ဦးဒဏ်ရာရပါတယ်။
