မတ်-၁၅၊ ၂၀၂၆ ဟာနာဆန်/People’s Spring
မန္တလေးတိုင်း၊ တောင်သာမြို့နယ်က ကျောက် ပန်းတောင်း – မြင်းခြံလမ်းပိုင်းမှာ တရုတ်ဓာတ်ငွေ့ပိုက်လိုင်းလာပြင်တဲ့ စစ်ကောင်စီတပ်ဖွဲ့ဝင်တွေကို တိုက်ခိုက်ရာ ထိခိုက်သေဆုံးမှုရှိကြောင်း သတင်းရရှိပါတယ်။
မတ်လ ၁၄ ရက် မနက်ပိုင်းကစပြီး စစ်ကောင်စီတပ်က အင်အား ၃၀၀ခန့်ဟာ ကျောက်ပန်းတောင်း – မြင်းခြံလမ်းပိုင်းတလျှောက်ရှိ အေးရွာ၊ ခါးပတ်ရွာ၊ သမုန်းပင်လမ်းခွဲ၊ ကျားနေအိုင်လမ်းခွဲနဲ့ စိတ္ထိန်းရွာလမ်းခွဲတွေမှာ နေရာယူကာ စစ်ကြောင်းဖြန့်ထားခဲ့ပါတယ်။
အဲဒီနေ့ ညနေ ၆ နာရီဝန်းကျင်မှာ စိတ္ထိန်းရွာက အင်အား ၃၀ခန့်ပါဝင်တဲ့ စစ်ကောင်စီတပ်ဖွဲ့ဝင်တွေဟာ ကား ၃စီးနဲ့ အေးရွာဘက်သို့ ထွက်ခွာလာချိန် လမ်းခုလတ်မှာ တိုက်ခိုက်ခဲ့တာဖြစ်ကြောင်း ပြည်သူ့လွတ်မြောက်ရေးတပ်မတော်(PLA) က အသိပေးပါတယ်။
Public Service Announcement
တိုက်ပွဲဖြစ်ပွားချိန် ၅မိနစ်ခန့်သာကြာခဲ့ပြီး စစ်ကောင်စီဘက်က ၈ ဦး သေဆုံးတာကို မျက်မြင်အတည်ပြုနိုင်ခဲ့ကာ နောက်ဆက်တွဲ သတင်းတွေအရ စစ်ကောင်စီတပ်သား ၁၂ ဦးအထိ သေဆုံးခဲ့တယ်လို့ PLAက ဆိုပါတယ်။ ဒါ့အပြင် စစ်ကောင်စီယာဥ် ၃ စီးထဲက ၁ စီးလည်း ပျက်စီးသွားကြောင်း PLAက အသိပေးပါတယ်။
“ လက်နက်ခဲယမ်းတော့ မသိမ်းဆည်းနိုင်ခဲ့ပါဘူး” လို့ PLAရဲ့ ပြန်ကြားရေးတာဝန်ခံက ပြောပါတယ်။
အဆိုပါ စစ်ကောင်စီတပ်ဟာ ကျောက်ပန်းတောင်းမြို့နယ်၊ စိတ္ထိန်းရွာနဲ့ အေးရွာကြားမှာ တရုတ်ဓာတ်ငွေ့ပိုက်လိုင်းပေါက်နေတာကြောင့် လာပြင်နေတာဖြစ်ကြောင်း ဒေသခံအချို့က ပြောပါတယ်။
စစ်ကောင်စီတပ်ဟာ ကျောက်ပန်းတောင်း – မြင်းခြံလမ်းပိုင်းမှာ အင်အားအများအပြားနဲ့ စစ်ကြောင်းထိုး လှုပ်ရှားနေတဲ့အတွက် ဒေသခံများအနေနဲ့ အထူးသတိပြု သွားလာကြဖို့ ဒေသတွင်း တော်လှန်ရေးအင်အားစုများက သတိပေးထားပါတယ်။
