မတ် -၁၈၊၂၀၂၆။မိုမို/People’s Spring
မကွေးတိုင်းအတွင်းက ပုသိမ်-မုံရွာလမ်းပိုင်းမှာ စစ်တပ်ရိက္ခာယာဥ်တန်း မိုင်းဆွဲတိုက်ခိုက်ခံရပြီးသေဆုံးထိခိုက်မှုတွေရှိတယ်လို့ ဒေသတွင်း တော်လှန်ရေးတပ်ဖွဲ့ဝင်အချို့က ပြောပါတယ်။
အမှတ်(၂၂)ကာကွယ်ရေးပစ္စည်းစက်ရုံ (ကပစ-၂၂)ကထွက်လာတဲ့ စစ်တပ်ယာဥ်တန်းကို အခု မတ်လ ၁၂ ရက်က မိုင်းဆွဲ တိုက်ခိုက်ခဲ့တာလို့ ဆိုပါတယ်။
“အောက်ဆိပ်ဖြူလမ်းခွဲ မရောက်ခင် ပုသိမ်-မုံရွာ လမ်းပေါ် သစ်ညီနောင်လမ်းခွဲမှာ ဖြစ်တာ။သေတာ တယောက်တော့ သေချာတယ်။ နှစ်ယောက်က ခြေ ထောက်ဖြတ်ရတယ်”လို့ ဒေသခံတော်လှန်ရေးအဖွဲ့ဝင် ကိုထိုက်က ပြောပါတယ်။
Public Service Announcement
ဒါ့အပြင် ဆိပ်ဖြူမြို့နယ်ကတဆင့် ပေါက်မြို့နယ်အတွင်းသွားတဲ့ အဲဒီယာဥ်တန်းကို ပေါက်မြို့နယ် ကာကွယ်ရေးအဖွဲ့တွေက ကြားဖြတ်ပစ်ခတ်တိုက်ခိုက်မှုတွေ ထပ်မံလုပ်ခဲ့တယ်လို့ သိရပါတယ်။
အဲဒီတိုက်ခိုက်မှုမှာလည်း စစ်တပ်ရဲ့ တပ်သားသုံးဦး သေဆုံးတယ်လို့ ပေါက်ပကဖ အဖွဲ့ဝင် ရဲဘော်တစ်ဦးက ပြောပါတယ်။
အစီးရေ ၁၀၀ ကျော်ပါတဲ့ စစ်ကောင်စီယာဥ်တန်းဟာ မနေ့က(မတ်လ ၁၇ ရက်)ညပိုင်းက ပေါက်မြို့ ပေါ်ကို ရောက်ရှိပြီး ဒီကနေ့မှာ ကပစ(၂၄)ကို သွားနေတယ်လို့ အသိပေးပါတယ်။
မနှစ်ကစပြီး ပခုက္ကူတပ်မ(၁၀၁)ကနေ ပေါက်မြို့နယ် မျှားပိုင်းကျေးရွာအနီးရှိတဲ့ ကပစ(၂၄)ကို စစ်တပ်က ရိက္ခာနဲ့တပ်သားအလုံးအရင်း ပေးပို့နေတာဖြစ်ပါတယ်။
အထူးသဖြင့် စစ်တပ် ဖွဲ့စည်းပေးထားတဲ့ ပြည်သူ့စစ် ကျေးရွာအများစုက ပေါက်မြို့နယ်အတွင်းရှိပေမယ့် ဒေသတွင်းတော်လှန်ရေးအင်အားစုတွေက ဝိုင်းဝန်းပိတ်ဆို့ခံထားရတဲ့ အခြေအနေတွေ ရှိတယ်လို့ သိရပါတယ်။
