မတ်-၂၅၊၂၀၂၆။ သုည/People’s Spring
စစ်ကိုင်းတိုင်းက သပိတ်အဖွဲ့တွေ၊ ဒေသခံပြည်သူတွေဟာ လေကြောင်းအန္တရာယ်အသိပေးတာနဲ့ စစ်ဘေးရှောင်တွေကို ကျန်းမာရေးစောင့်ရှောက်ပေးတာတဲ့ လှုပ်ရှားမှုတွေ ဒီကနေ့ (မတ်လ ၂၅) မှာ ပြုလုပ်ခဲ့ပါတယ်။
ရွှေဘိုမြို့နယ်အတွင်းမှာ သပိတ်အင်အားစုမှ ရဲဘော်တွေက စစ်ဘေးရှောင်ပြည်သူတွေကို ကျန်းမာရေးစောင့်ရှောက်မှုတွေ ပြုလုပ်ပေးခဲ့ပါတယ်။
စစ်ဘေးရှောင်ပြည်သူတွေကို အခမဲ့ ကျန်းမာရေးစောင့်ရှောက်မှု ပြုလုပ်ပေးနေသလို အမျိုးသမီး အသုံးအဆောင် ပစ္စည်းတွေလည်း ဖြန့်ဝေပေးပြီး စားနပ်ရိက္ခာတွေကိုလည်း ထောက်ပံ့ကူညီပေးခဲ့တယ် လို့ ရွှေဘိုသပိတ်အင်အားစုက ဆိုပါတယ်။
Public Service Announcement
အရာတော်မြို့နယ်မှာလည်း ဗကသများအဖွဲ့ချုပ်မှ ကျောင်းသားလူငယ်တွေက ဒေသခံပြည်သူတွေကို ဗုံးခိုကျင်းတည်ဆောက်ပုံနဲ့ လေကြောင်းအသိပညာပေး လက်ကမ်းစာစောင်တွေ ဖြန့်ဝေခဲ့ကြပါတယ်။
ယင်းလှုပ်ရှားမှုကို အရာတော်မြို့နယ်ကျောင်းသားသမဂ္ဂနဲ့ ပြည်သူ့အခြေပြုကျောင်းသားများသမဂ္ဂတို့ ပူးပေါင်းပြုလုပ်ခဲ့တာ ဖြစ်ပါတယ်။
ယင်းမာပင်ဒေသမှာလည်း အောင်လံလွှင့်မည်ရွှေရေကြည်လူထုသပိတ်က ဒေသခံပြည်သူတွေနဲ့အတူ စစ်အာဏာရှင်ကို ဆန့်ကျင်ကြောင်း ဆန္ဒပြသပိတ်မှောက်ခဲ့ကြပါတယ်။
စစ်ကိုင်းတိုင်းအတွင်း ဒေသခံတော်လှန်ပြည်သူတွေဟာ နယ်မြေမတည်ငြိမ်တဲ့ကြားထဲကနေပဲ စစ်အာဏာရှင်ဆန့်ကျင်ရေး သပိတ်လှုပ်ရှားမှုတွေကို နေ့စဉ်ပြုလုပ်နေကြပါတယ်။
ဓာတ်ပုံ – စစ်ကိုင်းဒေသသပိတ်အင်အားစု၊ ရွှေဘိုလူထုသပိတ်
