စစ်ကောင်စီ တပ်ချုပ်သစ်လက်ထက်မှာ မိသားစုလိုက် စစ်ရာဇဝတ်မှုကျူးလွန်သတ်ဖြတ်ခံရတဲ့ ပထမဆုံးဖြစ်ရပ်ဟု AA ထုတ်ပြန်
ဧပြီ ၁၊ ၂၀၂၆။ People’s Spring
ရက္ခိုင်ပြည်နယ်၊ သံတွဲမြို့နယ်ကို စစ်ကောင်စီက တိုက်လေယာဉ် ၄စီးနဲ့ ဗုံးကြဲတိုက်ခိုက်ခဲ့ရာ ကလေး (၂) ဦး အပါအဝင် အပြစ်မဲ့အရပ်သား (၄)ဦးရှိတဲ့ မိသားစုတစ်စုလုံး သေဆုံးပြီး ကလေးငယ်နစ်ဦးနဲ့ ကိုယ်ဝန်ဆောင် ၁ဦး ထိခိုက်ဒဏ်ရာရခဲ့ဟု အာရက္ခတပ်တော်(AA)က သတင်းထုတ်ပြန်ပါတယ်။
ဧပြီ ၁ရက် နေ့လည်ပိုင်းမှာ စစ်ကောင်စီဟာ သံတွဲမြို့နယ်ကို တိုက်လေယာဉ် ၄စီးနဲ့ လေကြောင်းက ပြင်းပြင်းထန်ထန် ဗုံးကြဲခဲ့သလို ပင်လယ်ပြင်မှာ တပ်စွဲထားတဲ့ စစ်သင်္ဘော တစ်စီးကလည်း လက်နက်ကြီးအချို့ တချိန်တည်း ပစ်ခတ်တိုက်ခိုက်ခဲ့တယ်လို့ ဖော်ပြပါတယ်။
Public Service Announcement
စစ်ကောင်စီဟာ အရင်က သူတို့ရဲ့ တပ်စခန်းနေရာဖြစ်တဲ့ ခလရ(၅၅)တပ်ရင်းအနီး ဝန်းကျင်ကို ဗုံးကြဲခဲ့ရာ အနီးအနားမှာ စစ်ရှောင်နေတဲ့ မိသားစုလိုက် သေဆုံးခဲ့ရသလို ကလေး ၂ဦးနဲ့ ကိုယ်ဝန်ဆောင် အမျိုးသမီး (၁) ဦးလည်း ထိခိုက်ဒဏ်ရာများရရှိခဲ့တယ်လို့ ထုတ်ပြန်ပါတယ်။
“စစ်ကော်မရှင်တပ်၏ ကာကွယ်ရေးဦးစီးချုပ်အသစ် လက်ထက်တွင် မိသားစုလိုက် စစ်ရာဇဝတ်မှု ကျူးလွန်သတ်ဖြတ်ခံရသော ပထမဆုံးဖြစ်ရပ်ဖြစ်သည်” လို့ AA ရဲ့ ထုတ်ပြန်ချက်မှာ ရေးသားထားပါတယ်။
စစ်ကောင်စီဟာ အရပ်သားတွေကို ရည်ရွယ်ချက်ရှိရှိ လူမဆန်စွာ တိုက်ခိုက်နေလို့ သေဆုံးခဲ့ကြရသူတွေ ရဲ့ မိသားစု၊ ဆွေမျိုးများနဲ့ ထပ်တူ ဝမ်းနည်းကြေကွဲကြောင်း AAက ဖော်ပြပြီး ဒဏ်ရာရသူတွေကို အရေးပေါ် ဆေးကုသပေးနေတယ်လို့ ဆိုပါတယ်။
စစ်ကောင်စီတပ်ဟာ ယခုရက်ပိုင်းအတွင်း အာရက္ခပြည်ကို ဂျက်တိုက်လေယာဉ် သုံးစီး (သုံးစီးအထက်) နဲ့ ကင်းထောက်လေယာဉ်များကို တပြိုင်တည်းသုံးကာ လေကြောင်းတိုက်ခိုက်မှုများကို ယခင်ကထက် ပိုမို သူရဲဘောကြောင်စွာ၊ အောက်တန်းကျစွာ ပြင်းပြင်းထန်ထန် ပြုလုပ်လာလို့ ပြည်သူတွေ စစ်ကောင်စီတပ်ရဲ့ လေကြောင်းရန် အထူးသတိပြုဖို့ တိုက်တွန်းထားပါတယ်။
စစ်ကောင်စီဟာ မတ် ၂၉ရက်ကလည်း AA သိမ်းပိုက်ထိန်းချုပ်ထားတဲ့ပလက်၀မြို့နယ်ကို လေကြောင်း ဗုံးကြဲတိုက်ခိုက်ခဲ့ပါတယ်။ စစ်ကောင်စီရဲ့ လေကြောင်းဗုံးကြဲမှုကြောင့် ပလက်၀မြို့နယ် ကြောင်ချောင်းရွာက ကလေး ၄ဦး အပါ၀အင် ပြည်သူ ၇ဦးသေဆုံးကာ ကလေးငယ် ၂ဦး အပါအဝင် ၄ဦး ဒဏ်ရာရခဲ့ပါတယ်။
