ဧပြီ-၂၉၊၂၀၂၆။ဇော်ရမ်း/ People’s Spring
ရခိုင်ပြည်နယ်က မြို့နယ်အချို့မှာ မိုးသက်လေပြင်းကျရောက်ခဲ့ပြီး မြောက်ဦးမြို့နဲ့ကျောက်တော်မြို့မှာ မိုးကြိုးထိမှန်လို့ အရပ်သားထိခိုက်သေဆုံးမှုရှိခဲ့ပါတယ်။
ယမန်နေ့ ဧပြီ၂၈ရက်က တိုင်းနဲ့ပြည်နယ်အချို့မှာ မိုးသက်လေပြင်းကျရောက်နေစဉ် ရခိုင်ပြည်နယ်မှာလည်း နေရာကွက်မိုးကြီးပြီး လေပြင်းတိုက်ခိုက်ခဲ့ပါတယ်။
ကျောက်တော်မြို့နယ်မှာ ညနေပိုင်းက လေပြင်းတိုက်ခတ်ခဲ့ပြီး နဂူမေကျေးရွာလမ်းမှာ အမျိုးသားတစ်ဦး မိုးကြိုးပစ်ခံရတာပါ။
Public Service Announcement
” မြောက်ဦးရော ကျောက်တော်မှာပါ မိုးတွေကြီးပြီးလေပြင်းတိုက်တာ။ ကျောက်တော်မှာက ကျတော့်အသိမိတ်ဆွေ ဆိုင်ကယ်စီးလာတုန်း မိုးကြိုးထိသွားတာ။မြောက်ဦးက နှစ်ယောက်ထိပေမယ့် ဒဏ်ရာရသွားတာပဲ ရှိတယ်။ မိုးနဲ့လေက တော်တော်ကြမ်းတာ”လို့ မြောက်ဦးမြို့ခံတစ်ဦးက ပြောပါတယ်။
မြောက်ဦးမြို့မှာလည်း ညနေ ၃နာရီခန့်မှာ လက္ကာကျေးရွာအတွင်း မိုးကြိုးပစ်လို့ ဒေသခံနှစ်ဦးဒဏ်ရာရရှိခဲ့တာဖြစ်ပါတယ်။
သင်္ကြန်ကာလနောက်ပိုင်း ဒေသအများစုမှာ အပူချိန်တွေမြင့်တက်နေသလို မိုးကြီးပြီး လေပြင်းကျတာတွေလည်း ဖြစ်နေပြီး လူထိခိုက်သေဆုံးမှုတွေလည်း ရှိနေပါတယ်။
နွေအကုန်မိုးအကူးကာလများအတွင်း လေထုအတွင်းအပူချိန်ပြောင်းလဲမှုကြောင့် စိုက်ဆင်းလေပြင်းနဲ့နေရာကွက်၍မိုးကြီးတာ၊ မိုးသီးကြွေကျတာတွေ ဖြစ်တတ်တဲ့အတွက် သတိပြုနေထိုင်ကြဖို့အမျိုးသားညီညွတ်ရေးအစိုးရ၊လူမှုရေးရာ၊ အလုပ်သမားနှင့် လူသားချင်းစာနာထောက်ထားရေးဝန်ကြီးဌာန(MOHADM)က သတိပေးထားပါတယ်။
MOHADMက သတိပေးထားတဲ့ဒေသတွေထဲမှာ ရခိုင်ပြည်နယ်လည်းပါဝင်ပါတယ်။ ဧပြီနဲ့ မေလအတွင်း ကချင်ပြည်နယ်၊ ချင်းပြည်နယ်၊ ရှမ်းပြည်နယ်၊ စစ်ကိုင်းတိုင်း (အထက်ပိုင်း)၊ မကွေးတိုင်း၊ မန္တလေးတိုင်း၊ ဧရာဝတီတိုင်းနဲ့ရခိုင်ပြည်နယ်မှာ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးသီးကြွေခြင်း၊ လျှပ်စီးလက်ခြင်းနဲ့မိုးကြိုးပစ်ခြင်းတွေ ဖြစ်ပေါ်နိုင်တယ်လို့ သတိပေးထားပါတယ်။
