မေ -၁၀၊၂၀၂၆။မိုမို/People’s Spring
ကရင်နီပြည်နယ်၊လွိုင်ကော်မြို့နယ်မှာ မောင်နှမသုံးဦး ချောင်းအတွင်း ရေချိုးရင်း ရေနစ်သေဆုံးမှုဖြစ်ပွားခဲ့တယ်လို့ ဒေသခံတချို့နဲ့ ကူညီကယ်ဆယ်ရေးဆောင်ရွက်ခဲ့သူတွေက ပြောပါတယ်။
ဒီကနေ့(မေလ ၁၀ ရက်) မနက် ၁၁နာရီဝန်းကျင်ကမထောခူကျေးရွာအနီးကသဲချောင်းမှာ ရေဆင်းချိုးရင်း ရေနစ်ပြီး မောင်နှမသုံးဦးလုံး သေဆုံးခဲ့တာလို့ ဆိုပါတယ်။
“ချောင်းလို့သာ ပြောတာ။ရေသေဖြစ်နေတဲ့နေရာပါ။ဖြစ်ချင်းတော့ ကောင်မလေးက ရေမကူးတက်ဘူး။သူ စနစ်ပြီး ကျန်တဲ့ကလေးနှစ်ယောက်က လိုက်ဆယ်ရင်း ပါသွားကြတာ”လို့ ကယ်ဆယ်ရေးလုပ်ခဲ့သူက ဖြစ်စဥ်ကို ရှင်းပြပါတယ်။
Public Service Announcement
ရေနစ်သေဆုံးသူတွေဟာ အသက်(၁၈)နှစ်အရွယ် မတင်တင်စန်းဦး၊ အသက်(၁၉)နှစ်အရွယ်မောင်စိုးသီးဟ နဲ့ အသက် (၂၀)အရွယ် မောင်ရဲလင်းအောင်တို့ ဖြစ်ပြီး ရုပ်အလောင်းတွေကို နေ့လယ် ၁ နာရီခွဲဝန်းကျင်မှာ ရှာဖွေတွေ့ရှိတယ်လို့ အသိပေးပါတယ်။
“ကလေးတွေက တဝမ်းကွဲမောင်နှမတွေ အရင်မော်ချီးမှာနေကြပြီးအခု လွိုင်ကော် နမ့်ဘော်ဝမ်ရပ်ကွက်မှာနေကြတာ”လို့ လွိုင်ကော်မြို့နေသူတဦးက ပြောပါတယ်။
ပြီးခဲ့တဲ့ သုံးရက်ကလည်း လွိုင်ကော်မြို့၊ ဘီလူးချောင်းထဲမှာ လူသေအလောင်းတွေ့ရှိခဲ့တာအပြင် ဧပြီ ၂၇ ရက်ကလည်း အမျိုးသားရုပ်အလောင်းတွေ့ရှိလို့ ဆယ်ယူသဂြိုလ်ခဲ့ရတယ်လို့ ဒေသခံ လူမှုကူညီရေးအသင်းတချို့က အသိပေးထားပါတယ်။
