'/%3E%3C/svg%3E){kind=small}
မေ-၁၈၊၂၀၂၆။ဖိုးသား/People’s Spring
မကွေးတိုင်း၊ ရေနံချောင်းမြို့နယ်ကို နယ်မြေထိန်းချုပ်ဖို့ စစ်ကြောင်းထိုးလာတဲ့ စစ်တပ်နဲ့ တိုက်ပွဲဖြစ်ခဲ့တယ်လို့ ရေနံချောင်း PDFတာဝန်ရှိသူက လူထုနွေဦးကို ပြောပါတယ်။
မေလဒုတိယပတ်ကစပြီး ဂွေးကုန်း-ဝက်ချုပ်-နတ်မောက်လမ်းပိုင်းကတဆင့် စစ်တပ်စစ်ကြောင်းဝင်ရောက်လာပြီး မြို့နယ်အရှေ့ခြမ်းက အလယ်ကုန်းကျေးရွာတဝိုက်မှာ တိုက်ပွဲ ဖြစ်ခဲ့တယ်လို့ သိရပါတယ်။
မေလ ၁၄ ရက်မှာ လွန်ပင်ရှိုကျေးရွာအနီး စစ်တပ်စစ်ကြောင်း ချဥ်းကပ်လာတာကြောင့် တိုက်ပွဲ ထပ်မံဖြစ်ခဲ့ပြီး စစ်တပ်က သေဆုံးသူ ၁၀ဦး ရှိတယ်လို့ အသိပေးပါတယ်။စစ်တပ်ရဲ့ သေဆုံးမှုကိုတော့ လူထုနွေဦးက သီးခြားအတည်ပြုမရသေးပါဘူး။
Public Service Announcement
“ရေနံချောင်းမြို့အခြေစိုက် ခလရ-၇၇နဲ့ မကွေးမြို့အခြေစိုက် တမခ(တပ်မ ၈၈) ပါတယ်။ပြည်သူ့ကာကွယ်ရေးတပ်တွေရဲ့ ထိန်းချုပ်နယ်မြေတွေကို ပြန်စိုးမိုးဖို့ လာတာ”လို့ အထက်ပါတာဝန်ရှိသူက စစ်တပ်စစ်ကြောင်းထိုးလာတဲ့အခြေအနေ ရှင်းပြပါတယ်။
အင်အား ၇၀ ဝန်းကျင်ပါတဲ့ စစ်တပ်စစ်ကြောင်းဟာ မေလ ၁၅ ရက်မှာ ရေနံချောင်းမြို့ပေါ်ကို ပြန်ဆုတ်သွားရတယ်လို့ ဆိုပါတယ်။
၂၀၂၆ အတွင်း ရေနံချောင်းမြို့နယ်မှာ ပထမဆုံးအကြိမ် ထိုးစစ်ဆင်လာတဲ့ စစ်တပ်ကို မကွေးတိုင်း ပကဖ အထူးရွေ့လျားစစ်ကြောင်း Yenanthar Column၊ပြည်သူ့ကာကွယ်ရေးတပ်မတော် မကွေးခရိုင်စစ်ဌာန Drone တပ်ဖွဲ့နဲ့ မကွေးမြို့နယ်ပြည်သူ့ကာကွယ်ရေးတပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပါတယ်။
ရေနံချောင်းမြို့နယ်ရဲ့အရှေ့ဘက်ခြမ်းက နတ်မောက်မြို့နယ်မှာလည်း စစ်တပ်က စစ်ကြောင်းထိုး နေလို့ တော်လှန်ရေးတပ်တွေနဲ့ မကြာခဏတိုက်ပွဲ ဖြစ်နေပါတယ်။
https://www.facebook.com/reel/1611432853268916ရုပ်သံ-People’s Defence Force-ရေနံချောင်း
