မေ-၂၀၊၂၀၂၆။ဖိုးသား/People’s Spring
တော်လှန်ရေးတပ်တွေရဲ့ မြေပြင်ရိက္ခာလမ်းကြောင်း ဖြတ်တောက်ခံထားရတဲ့ မကွေးတိုင်း၊ မြိုင်မြို့နယ်က အမှတ်(၃)တပ်မတော်အကြီးစားစက်ရုံ(တစခ -၃)ကို စစ်တပ်က လေယာဉ်နဲ့ ရိက္ခာတွေ ချပေးခဲ့တယ်လို့ အညာမြေတပ်ပေါင်းစု တာဝန်ရှိသူက ပြောပါတယ်။
ဒီနေ့(မေ ၂၀ရက်) နေ့လယ် ၁နာရီခွဲခန့်မှာ မြိုင်မြို့ရဲ့တောင်ဘက် (၄)မိုင်အကွာက ဒေသအခေါ် စက်မှု-၂(တစခ-၃)ကို Y8 ထောက်ပို့လေယာဉ်နဲ့ ရိက္ခာထုပ် ၃၃ထုပ် ပို့ခဲ့တာလို့ ဆိုပါတယ်။
တစခ(၃)ဟာ စစ်တပ်က အခိုင်အမာတပ်စွဲထားတဲ့ နေရာတစ်ခုဖြစ်ပြီး စစ်လက်နက်ပစ္စည်းထုတ်လုပ်ရေးကွန်ရက်အတွက် တစိတ်တပိုင်းသက်ဆိုင်တယ်လို့ သိရပါတယ်။
Public Service Announcement
“အဲဒီမြိုင်စက်မှု (၂)ရဲ့ဝန်းကျင်မှာ ဝက်ပုတ်ပျူစောထီးရွာနဲ့ သရက်ကွ ပျူစောထီးရွာ အပါအဝင် ကိုင်းတောမ နယ်မြေရဲစခန်းကိုပါ နယ်မြေတပ်ပေါင်းစုနဲ့ တော်လှန်ရေးတပ်ဖွဲ့တွေက သိမ်းပိုက်ထားတဲ့ အတွက်သူရဲ့ ပတ်ဝန်းကျင်မှာဘာမှမရှိဘူး။သူတစ်ခုတည်း ထီးထီးကြီးဖြစ်နေတယ်။စက်မှု ၂ ထဲမှာ စစ်တပ်နဲ့ ပျူ အင်အားကတော့ ခန့်မှန်းလို့ မတက်ဘူး”လို့ အညာမြေတပ်ပေါင်းစု တာဝန်ရှိသူ ကိုဘိုဘိုသန့်ဇင်က ပြောပါတယ်။
လက်ရှိမှာ ဒေသတွင်းပြည်သူ့ကာကွယ်ရေးတပ်ဖွဲ့တွေနဲ့ မကြာခဏ ထိတွေ့မှုများရှိပြီး ရိက္ခာလမ်းကြောင်းဖြတ်တောက်ခံထားရတဲ့ စက်ရုံလို့ အသိပေးပါတယ်။
“အရင် ဦးသန်းရွှေ စစ်အစိုးရလက်ထက်ကတည်းက လည်ပတ် နေတဲ့စက်ရုံပေါ့။အာဏာသိမ်းပြီးနောက်ပိုင်းမှာ လည်း အရင်ရှိပြီးသားနဲ့ နောက်စစ်ကောင်စီအင်အားကို ထပ်ဖြည့်ထားတာပေါ့။လေကြောင်းကနေမကြာခဏ ရိက္ခာလာပို့တယ်”လို့ မြိုင်မြို့နယ်စစ်ရေးသတင်ရင်းမြစ်က ပြောပါတယ်။
စက်ရုံဝန်းကျင်မှာ အကြီးစားတိုက်ပွဲတွေ ဖြစ်ပွားခြင်းမရှိသေးပေမယ့် ရိက္ခာထွက်ရှာတဲ့ စစ်သားတွေကို ဒေသခံတပ်ဖွဲ့တွေ လိုက်လံပစ်ခတ်တဲ့ ပြောက်ကျားစစ်နဲ့ လမ်းကြောင်းဖြတ်တောက်မှုတွေ ကြောင့် စစ်ရေးတင်းမာမှု ရှိနေတယ်လို့ သိရပါတယ်။
ဒါ့အပြင် လက်ရှိ စစ်ရေးအခြေအနေတွေအရ မကွေးတိုင်းအထက်ပိုင်းက ပေါက်၊ဆောနဲ့မြစ်ခြေ ဒေသတွေမှာ စစ်တပ်ဝင်ရောက်စီးနင်းနေတာ နဲ့ လေကြောင်းဗုံးကြဲမှုတွေ ကြောင့် သတိပြုနေထိုင်ကြဖို့လည်း အညာမြေတပ်ပေါင်းစုက ထုတ်ပြန်ထားပါတယ်။
အာဏာသိမ်းစစ်တပ်က နိုင်ငံတဝန်း စစ်အုပ်ချုပ်ရေး အရေးပေါ်ကြေညာထားတဲ့ မြို့နယ် ၆၀ မှာ မကွေးတိုင်းထဲက ပေါက်၊မြိုင်၊ဆော၊ထီးလင်းနဲ့ ရေစကြိုမြို့နယ် ပါဝင်နေပါတယ်။
https://www.facebook.com/reel/1647600896447272ရုပ်သံ – အညာမြေတပ်ပေါင်းစု
