'/%3E%3C/svg%3E){kind=small}
ဇွန် ၂၁၊ ၂၀၂၆။ ထားမြတ်/People’s Spring
ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများ အားလုံးလွတ်မြောက်ရေးအတွက် အဘက်ဘက်ကနေ တာဝန်ယူကြိုးပမ်းနေကြောင်း အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက ပြောကြားပါတယ်။
ဇွန်လ ၁၉ရက်က ကျရောက်တဲ့ ဒေါ်အောင်ဆန်းစုကြည်ရဲ့ (၈၁) နှစ်ပြည့် မွေးနေ့ အခမ်းအနားမှာ ယာယီသမ္မတ ပြောကြားခဲ့တဲ့ အမှတ်တရစကားကောက်နုတ်ချက်ကို NUGက ဇွန်လ ၂၀ရက်မှာ ထပ်မံ ဖော်ပြခဲ့တာပါ။
“ အမျိုးသားညီညွတ်ရေးအစိုးရရဲ့ တာဝန်တွေထဲမှာ ပြည်သူ့အာဏာပြည်သူ့ထံ ပြန်လည်အပ်နှံရေးကိစ္စပါဝင်ပါတယ်။ ဒါ့အပြင် ပြည်သူလူထုတစ်ရပ်လုံး လိုလားမျှော်လင့်တဲ့ ပြည်သူ့ခေါင်းဆောင်ဟာ ပြည်သူနဲ့ ပြန်လည်ဆုံဆည်းခွင့်ရရေးကို ကျွန်တော်တို့အားလုံး အလေးအနက်ထားကြိုးစားနေပါတယ်။” လို့ ယာယီသမ္မတက ပြောကြားပါတယ်။
Public Service Announcement
NUG ပြည်ထောင်စုဝန်ကြီးချုပ် မန်းဝင်းခိုင်သန်းရဲ့ မွေးနေ့ အမှတ်တရ စကားကိုလည်း ဖော်ပြခဲ့ရာ လူထုခေါင်းဆောင်ရဲ့ မဆုတ်မနစ်သော ဇွဲလုံ့လ၊ ပြည်သူ့အပေါ်ထားရှိတဲ့ သစ္စာတရားနဲ့ ခိုင်မာသော နိုင်ငံရေး ခံယူချက်တွေဟာ ယနေ့ နွေဦးတော်လှန်ရေးတွင် ပါဝင်ဆင်နွှဲနေကြသော ပြည်သူတရပ်လုံးအတွက် အစဉ်အမြဲ လေးစား ဂုဏ်ယူဖွယ်ရာ “စံပြမီးရှူးတန်ဆောင်”နဲ့ ကြီးမားသော စိတ်ခွန်အားတစ်ရပ်ဖြစ်ဟု ပြောပါတယ်။
အမှန်တရားအတွက် တိုက်ပွဲဝင်နေကြတဲ့ ပြည်သူများနဲ့ အမြဲအတူရှိသည့် လူထုခေါင်းဆောင် ဒေါ်အောင်ဆန်းစုကြည်ဟာ လက်ရှိ ပြည်သူ့နွေဦးတော်လှန်ရေးနဲ့လည်း ထပ်တူထပ်မျှ ရပ်တည်လျက်ရှိဟု ခိုင်မာစွာ ယုံကြည်ကြောင်းလည်း ဝန်ကြီးချုပ် မန်းဝင်းခိုင်သန်းက ပြောပါတယ်။
လူထုခေါင်းဆောင် ဒေါ်အောင်ဆန်းစုကြည်ရဲ့ မွေးနေ့မှာ ပြည်တွင်း၊ ပြည်ပ မြန်မာပြည်သူလူထုတွေ ပြည်သူ့ကာကွယ်ရေးတပ်မတော် ရဲဘော်တွေအပါအဝင် တော်လှန်ရေးအင်အားစုတွေ အဖွဲ့အစည်းတွေ၊ ပြည်နယ်နဲ့တိုင်း လွှတ်တော်၊ အစိုးရတွေက မွေးနေ့ ဆုတောင်းတာ မွေးနေ့ပွဲ ကျင်းပတာတွေ ပြုလုပ်ခဲ့ကြပြီး ဒေါ်အောင်ဆန်းစုကြည် လွတ်မြောက်ရေး ဆန္ဒပြုခဲ့ကြပါတယ်။
