ဇွန် – ၂၂ ၊၂၀၂၆ ၊ People’s Spring
ရန်ကုန် – မန္တလေးအမြန်လမ်းမကြီးမှာဒီနေ့ (ဇွန်လ ၂၂ ရက်)မနက်အစောပိုင်းကခရီးသည်တင်အဝေးပြေးကားနှစ်စီးတိုက်မိလို့ အမျိုးသားသုံးဦး သေဆုံးသွားတယ်လို့လူမူကူညီရေးလုပ်ကိုင်သူအချို့ဆီက သိရပါတယ်။
ဒီနေ့ မနက် ၃ နာရီဝန်းကျင်ကအမြန်လမ်းမိုင်တိုင်အမှတ် ၁၁၇/၇ ဖာလုံမှာ ရတနာဖြိုးကားလိုင်းကကားကိုရွှေမန္တလာကားလိုင်းကားကနောက်ကနေ ဝင်တိုက်မိတာလို့သိရပါတယ်။
အဲဒီယာဉ်တိုက်မှုမှာအမျိုးသားသုံးဦးသေဆုံးပြီး သူတို့တွေ ရတနာဖြိုးကားလိုင်းကယာဉ်မောင်းအကူ ၊ ရွှေမန္တလာယာဉ်လိုင်းက ယာဉ်မောင်းနဲ့ယာဉ်အကူတို့ဖြစ်ကြပါတယ်။
Public Service Announcement
ရတနာမြို့ကားလိုင်းက အသက် ၂၀ ခန့် ယာဉ်အကူဟာ ကားနောက်ပိုင်းမှာသွားရောက်နားနေချိန်ယာဉ်တိုက်မှုနဲ့ကြုံပြီး သေဆုံးတာလို့ သိရပါတယ်။
ဒါအပြင်ခရီးသည်တွေဖြစ်တဲ့အမျိုးသားသုံးဦးနဲ့ ကိုရင်တစ်ပါးလည်း ဒဏ်ရာရလို့ ဖြူးဆေးရုံမှာ ကုသနေရပါတယ်။
ရန်ကုန် – မန္တလေး လမ်းပိုင်းမှာပြီးခဲ့တဲ့မေလအတွင်းမှာတင် ယာဉ်တိုက်မှု ၁၀ ကြိမ်ဖြစ်ခဲ့ပြီး လူလေးဦးသေဆုံးကာ ၂၀ ဦး ဒဏ်ရာရခဲ့ပါတယ်။
