ဇူလိုင်-၁၄၊၂၀၂၆။သုည/People’s Spring
လာမယ့်ဇူလိုင် (၁၉) ရက်မှာ ကျရောက်မယ့် အာဇာနည်နေ့ လူထုလှုပ်ရှားမှုမှာ ပြည်သူတွေ တတ်နိုင်တဲ့နည်းလမ်းနဲ့ ပူးပေါင်းပါဝင်ကြဖို့ အထွေထွေသပိတ်ပေါင်းစပ်ညှိနှိုင်းရေးအင်အားစု (GSCB) က တိုက်တွန်းလှုံ့ဆော်ထားပါတယ်။
ဇူလိုင် ၁၉ မနက် (၁၀) နာရီ (၃၇) မိနစ်မှာ ရောက်ရာနေရာမှ ငြိမ်သက်ခြင်း၊ ဥဩဆွဲခြင်း၊ ဟွန်းတီးခြင်းတို့နဲ့ အလေးပြုပေးကြဖို့၊ အနက်ရောင် အဝတ်အစား၊ ဖဲကြိုး၊ ဦးထုတ်တွေ ဝတ်ဆင်ကာ ဝမ်းနည်းခြင်းနဲ့ ဆက်လက် တော်လှန်လိုသော စိတ်ဓာတ်ကို “အနက်ရောင်လှုပ်ရှားမှု (Black Movement)” နဲ့ ဖော်ပြပေးကြဖို့နဲ့ ဗိုလ်ချုပ်ရုပ်တု၊ လွတ်လပ်ရေးကျောက်တိုင်၊ ကျဆုံးအာဇာနည်တွေရဲ့ ဂူဗိမာန်တွေဆီသို့ ချီတက်ပြီး အာဇာနည်တို့ရဲ့ သမိုင်းကို အစဉ်အမှတ်ရနေကြောင်း သက်သေပြဖို့ GSCB က လှုံ့ဆော်ခဲ့ပါတယ်။
ယင်းလူထုလှုပ်ရှားမှုဟာ လူထုခေါင်းဆောင် ဒေါ်အောင်ဆန်းစုကြည်နဲ့တကွ နိုင်ငံရေးအကျဉ်းသားအားလုံး ချက်ချင်းလွှတ်ပေးဖို့၊ အဓမ္မ စစ်မှုထမ်း ပေါ်တာဆွဲဥပဒေကို ချက်ချင်း ဖျက်သိမ်းဖို့၊ မြန်မာပြည်ရဲ့ သမ္မတဟာ ဦးဝင်းမြင့်သာဖြစ်ပြီး ဒေါ်အောင်ဆန်းစုကြည်ဟာ နိုင်ငံတော်ရဲ့ အတိုင်ပင်ခံပုဂ္ဂိုလ်ဖြစ်ကြောင်း ဖော်ပြတဲ့ တောင်းဆိုမှုလို့ GSCB က ဆိုပါတယ်။
Public Service Announcement
“စစ်အုပ်စု အနေနဲ့ ရုပ်တုတွေကိုသာ ဖြိုဖျက်နိုင်ပေမယ့် အာဇာနည်တွေရဲ့ လက်ဆင့်ကမ်းလာခဲ့တဲ့ သမိုင်းဝိဥာဥ်နဲ့ လွတ်လပ်လိုစိတ်တွေကိုတော့ ဘယ်အမိန့်အာဏာနဲ့မှ ဖျက်ဆီး ဖျောက်ဖျက်နိုင်မှာ မဟုတ်ပါဘူး။ ဒါ့ကြောင့် လူထုအနေနဲ့ စစ်တပ်ရဲ့ အန္တရာယ်ကို သတိထားပြီး ကိုယ်တတ်နိုင်တဲ့ နည်းလမ်းမှာ အာဇာနည်နေ့ လူထုလှုပ်ရှားမှုမှာ ပါဝင်ပေးဖို့ မေတ္တာရပ်ခံပါတယ်” လို့ မြို့ပြသပိတ်အဖွဲ့ဝင်တစ်ဦးက ဆိုပါတယ်။
