ဇူလိုင် ၁၆၊ ၂၀၂၆။ ထားမြတ်/People’s Spring
အာဏာသိမ်းစစ်တပ်က အရာရှိတွေအပါအဝင် စစ်ကောင်စီတပ်ဖွဲ့ဝင်အများအပြား ဇွန်လအတွင်းမှာ ထိခိုက်သေဆုံးခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ထုတ်ပြန်ပါတယ်။
ကာကွယ်ရေးဝန်ကြီးဌာနက ဖော်ပြလာတဲ့ အချက်အလက်တွေအရ ဇွန်လအတွင်းမှာ စစ်ကောင်စီတပ်ဖွဲ့ဝင် ၆၄၄ဦးသေဆုံးကာ ဒဏ်ရာရသူ ၂၀၉ ဦးရှိတယ်လို့ ဆိုပါတယ်။
ထိခိုက်ဒဏ်ရာရသူ၊ဖမ်းမိသူတွေထဲမှာ အရာရှိ ၂၀ဦး ပါဝင်ကြောင်းလည်း ဖော်ပြထားပါတယ်။
Public Service Announcement
စစ်တပ်စခန်း သိမ်းပိုက်နိုင်တာ ၉ကြိမ်ရှိခဲ့ပြီး တပ်စခန်းတိုက်ခိုက်မှု ၁၅ကြိမ်ရှိခဲ့ကြောင်း၊ စစ်ကောင်စီ ရဟတ်ယာဉ်ကို တိုက်ခိုက်မှု ၁ကြိမ်ရှိခဲ့ကြောင်း ထုတ်ပြန်ပါတယ်။
ယခု ထုတ်ပြန်ချက်မှာ စစ်ရေးဖော်ဆောင်မှု အခြေအနေ အသေးစိတ်၊ တော်လှန်ရေးရဲဘော်တွေ ထိခိုက်ကျဆုံးမှု အခြေအနေတွေကိုတော့ ဖော်ပြမထားပါဘူး။
ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော်(PDF)စစ်ရုံးချုပ်ကတော့ ဇွန်၊ ဇူလိုင်လတွေအတွင်း မန္တလေးတိုင်း စစ်ဌာန ၊ မကွေတိုင်းစစ်ဌာန၊ စစ်ကိုင်းတိုင်းစစ်ဌာန၊ နေပြည်တော်တိုင်း စစ်ဌာန တွေမှာ စစ်ကောင်စီတပ် အထိနာအောင် စစ်ရေးဖော်ဆောင်နိုင်ခဲ့ကြောင်း အသိပေးထားပါတယ်။
ပြည်သူ့ကာကွယ်ရေးတပ်မတော်(PDF) စစ်ရုံးချုပ် ဒုတိယ စစ်ဦးစီးအရာရှိချုပ် ဒေါက်တာစိုးသူရဇော်ကက မေလကုန်ပိုင်းက စစ်ရေး အခြေအနေအချို့ကို အသိပေးထားရာ နိုင်ငံတဝန်းတိုက်ပွဲတွေမှာ စစ်တပ်က အကျအဆုံးအထိအခိုက်များစွာရှိနေတယ်လို့ဆိုပါတယ်။
” စစ်မြေပြင်မှာ ရန်သူဘက်က အကျအဆုံး အင်မတန်များပါတယ် ။ တနေရာ/ နှစ်နေရာမှာဘဲ ဒီလို ဖြစ်နေတာ မဟုတ်ပါဘူး ။မြန်မာတနိုင်ငံလုံးက စစ်ဂွင်အသီးသီးမှာ ရန်သူဘက်က အကျအဆုံး အထိအခိုက်ဟာ ကြောက်ခမန်းလိလိ ဖြစ်ပါတယ် ။ တရားဝင် သတင်းမထုတ်ပြန်ပေမယ့် ကျွန်တော်တို့ဆီ တက်လာတဲ့ Daily Report တွေအရ နေ့စဉ်တိုက်ပွဲအသီးသီးကနေ သိမ်းဆည်းရမိတဲ့ ရန်သူ့အလက် ၊ အလောင်းတွေဟာ မနည်းပါဘူး”လို့ ဒေါက်တာစိုးသူရဇော်က ပြောထားတာပါ။
တကယ့်စစ်မြေပြင်ရဲ့ အဖြစ်သနစ်ကို ရန်သူကိုယ်တိုင်လည်း ကောင်းကောင်းသိပေမယ့် ပြည်သူလူထုအနေနဲ့ အခြေအနေမှန်ကို သိဖို့ ခက်ခဲနေကြောင်း PDF တပ်မှူးက ပြောကြားခဲ့ပြီး အာဏာသိမ်းစစ်တပ်ရဲ့ အတင်းအဓမ္မ စစ်သားစုဆောင်းမှု မခံရအောင် ရှောင်ဖို့၊ တကယ်လို့ စုဆောင်းခံရရင် လွတ်အောင်ပြေးဖို့ ၊လွတ်လမ်းမရှာနိုင်ဘဲ စစ်မြေပြင် ရောက်လာရင် တော်လှန်ရေးဘက် ကူးပြောင်းပြီး လက်နက်ချဖို့ တိုက်တွန်းထားပါတယ်။
