ဇူလိုင်-၁၇၊၂၀၂၆။တာရာ၊သုည/People’s Spring
ရန်ကုန်အဝင်စစ်ဆေးရေးဂိတ်တွေ ဇူလိုင်လအတွင်း အာဏာသိမ်းစစ်တပ်ကအစစ်အဆေးပိုမိုတင်းကြပ်လာပြီး ခရီးသွားပြည်သူတွေကိုပါ ဓာတ်ပုံမှတ်တမ်းရိုက်ယူထားတာတွေလုပ်လာတယ်လို့ ခရီးသွားတွေနဲ့ဒေသခံတွေကပြောပါတယ်။
အရင်က စစ်ဆေးရေးဂိတ်တွေမှာပဲ ခရီးသွားတွေရဲ့ မှတ်ပုံတင်ကိုယူစစ်တာမျိုးလုပ်တာကနေ ဒီရက်ပိုင်းမှာ အစစ်အဆေးပိုတင်းကြပ်လာတာဖြစ်ပါတယ်။
” ဒီရက်ပိုင်းတွေက ဂိတ်တွေမှာတော်တော်စစ်လာတယ်။လူတွေလည်းကားပေါ်ကနေဆင်းရတယ်။တစ်ယောက်ချင်းစီကိုဓာတ်ပုံရိုက်တယ်။ဘာလို့လဲတော့မသိဘူး။ အရင်က အဲဒီလောက်မစစ်ဘူး။ မှတ်ပုံတင်စစ်တယ်။ ကားပေါ်တတ်ကြည့်တယ်။ဟိုမေးသည်မေးကတော့ရှိတာပေါ့။ အခုကတော့ ခရီးသွားရင်တောင်မလွယ်ဘူး” လို့ ခရီးသွားတဦးကပြောပါတယ်။
Public Service Announcement
အမည်မဖော်လိုသူစစ်တပ်အရာရှိတဦးက အာဇာနည်နေ့နီးကပ်လာတာကြောင့် စစ်တပ်က လုံခြုံရေးကို အထူးဂရုစိုက်ထားတာဖြစ်တယ်လို့ ဆိုပါတယ်။
“ခုရက်ထဲ ဧရာဝတီတိုင်းဘက်ကနေ ရန်ကုန် အဝင်ကို တစ်စီးချင်း သေချာစစ်တယ်။ အရင်က သာမာန်လောက်ပဲ စစ်ပေမယ့် အခုက ခရီးသည်တွေရော ပစ္စည်းတွေကိုပါ ကားပါတက်စစ်တယ်။ လူငယ်အချို့ကိုလည်း မှတ်ပုံတင် တောင်းကြည့်တာမျိုးတွေ လုပ်တယ်။ အာဇာနည်နေ့နီးလို့ထင်တယ်ရန်ကုန်ထဲအဝင်ကိုအရင်ထက်ပိုစစ်ပါတယ်”လို့ရန်ကုန်-ပုသိမ် ကားလိုင်းရဲ့ယာဥ်မောင်း တဦးကပြောပါတယ်။ ဧရာဝတီတိုင်းမှာ ရခိုင်ပြည်နယ်နဲ့ အစပ်ဒေသတွေမှာ AA ဦးဆောင်တဲ့တော်လှန်ရေးတပ်တွေနဲ့ စစ်တပ်ကြားတိုက်ပွဲတွေပြင်းထန်နေပါတယ်။
ဒါ့အပြင် ရန်ကုန်မြို့ထဲမှာ အခုရက်ပိုင်းအရပ်ဝတ်တွေနဲ့ စောင့်ကြည့်နေတာရှိသလို လှည့်ကင်းကားတွေနဲ့လည်းလုံခြုံရေးယူထားတာကိုတွေ့ရပါတယ်။
အလားတူ ကမ္ဘာအေးဘုရားလမ်းမ၊ ဝေဇယန္တာလမ်းမကြီး၊ တက္ကသိုလ်ရိပ်သာလမ်းအစရှိတဲ့ လမ်မကြီးတွေပေါ်မှာ စစ်တပ်လက်အောက်ခံလက်နက်ကိုင်တွေလုံခြုံရေးပိုချထားတာကိုလည်းတွေ့ရတယ်လို့ဒေသခံတွေကပြောပါတယ်။
ဒါ့အပြင်အာဇာနည်ကုန်းနားတဝိုက်ကိုလည်း အရင်နှစ်တွေထက် လုံခြုံရေးနှစ်ဆတိုးမြှင့်ချထားပြီးအိမ်စီးကားအချို့လည်းအစစ်ဆေးခံရတယ်လို့ ယာဥ်မောင်းအချို့ကပြောပါတယ်။
“လွန်ခဲ့တဲ့ တပတ်လောက်ထဲကရန်ကုန်မှာ စစ်ကား၊ရဲကားတွေ တော်တော်ပတ်နေပါတယ်။ ရွှေတိဂုံဘုရားမြောက်ဘက်နဲ့ အာဇာနည်ကုန်းဂနားမှာလည်း စစ်သားတွေ လမ်းတွေ ကြိုပိတ်ပြီး စောင့်နေတာ တွေ့ရပါတယ်။ ခုရက်ထဲဆို ဦးဝိစာရလမ်းပေါ်နဲ့ ရွှေတိဂုံဘုရား အတက်အဆင်းတွေမှာပါ ရဲတွေ စောင့်နေကြပါတယ်” လို့ ရန်ကုန်မြို့နေ လူငယ်တစ်ဦးက လည်းပြောပါတယ်။
