အိန္ဒိယကပြန်ပို့လိုက်တဲ့ရေလုပ်သား ၂၆ ဦး စစ်သင်တန်းကျောင်းသို့အပို့ခံရ

ဇူလိုင်-၂၈၊၂၀၂၆။တာရာ/People’s Spring

အိန္ဒိယရေပိုင်နက်ထဲကိုတရားမဝင်ဝင်ရောက်တယ်ဆိုပြီး ဖမ်းဆီးခံရတဲ့ မြန်မာရေလုပ်သား ၂၆ ဦးကို အိန္ဒိယက မြန်မာနိုင်ငံပြန်ပို့လိုက်တာမှာ စစ်တပ်က အိမ်သို့ပြန်မပို့ပဲ စစ်သင်တန်းကျောင်းကို တန်းပို့လိုက်တယ်လို့ စစ်တပ်နဲ့နီးစပ်တဲ့ သတင်းရင်းမြစ်​တွေက​ပြောပါတယ်။

အိန္ဒိယနိုင်ငံ ပို့ဘလဲမြို့မှာ ထိန်းသိမ်းထားတဲ့ မြန်မာရေလုပ်သား ၂၆ ဦးကို အိန္ဒိယအစိုးရက ဇူလိုင် ၂၃ ရက်က လေကြောင်းနဲ့မြန်မာနိုင်ငံကိုပြန်လည်ပို့ဆောင်ခဲ့တာဖြစ်ပါတယ်။

“ထိုင်းပဲဖြစ်ဖြစ် ၊ဘယ်နိုင်ငံပဲဖြစ်ဖြစ် ၊ပြန်ပို့တဲ့ နိုင်ငံသားတွေကို အိမ်ကိုပြန်မလွှတ်ဘူး။ စစ်မှုထမ်းဖို့ စစ်သင်တန်းကျောင်းကို ပို့တာများတယ်။ ဟိုတနေ့က အိန္ဒိယနိုင်ငံကနေ ပြန်ပို့လိုက်တယ့် ၂၆ ယောက်ကိုလည်း စာရင်းဘာညာသေချာကောက်ပြီး စစ်သင်တန်းကျောင်းကို ပို့လိုက်တာ။ တိုင်းရင်းသားတွေများတယ်။ တချို့ကနိုင်ငံအချင်းချင်းလွှဲပေးလိုက်မှာကိုကြောက်ကြတယ်။ ဘာလို့ဆို အိမ်ကိုပြန်ရတာမဟုတ်ဘူး။ စစ်မှုထမ်းခိုင်းတာ။ ဒီဘက်ကကျတော့ စစ်မှုမထမ်းချင်လို့ သူများနိုင်ငံကိုပြေးသွားတယ်လို့ထင်တာ”လို့ စစ်တပ်နဲ့နီးစပ်သူတဦးက​ပြောပါတယ်။

Public Service Announcement

အာဏာသိမ်းစစ်တပ်က အဆိုပါလူငယ် ၂၆ ဦးဟာ စစ်မှုထမ်းဖို့ အကျုံးဝင်တယ်ဆိုပြီးစစ်သင်တန်းကျောင်းကို ပို့လိုက်တယ်လို့ ဆိုပါတယ်။

ဒါ့အပြင် ထိုင်းနိုင်ငံထဲမှာ ထိန်းသိမ်းထားတဲ့မြန်မာရွှေ့ပြောင်းအလုပ်သမားတွေကို လွတ်ရက်စေ့လို့ ရနောင်းဆိပ်ကမ်းကနေတဆင့် မြန်မာဘက်ခြမ်းကို ပြန်ပို့တာတွေရှိပြီး သူတို့ကိုလည်း စစ်အုပ်စုက စစ်တပ်ထဲ တန်းထည့်​နေတယ်လို့ စစ်တပ်နဲ့ နီးစပ်သူ​တွေက​ပြောပါတယ်။

နိုင်ငံတစ်ဝန်းတိုက်ပွဲ​တွေမှာ စစ်မှုထမ်းနဲ့စု​ဆောင်းထားသူ ၊​ပေါ်တာဆွဲထားသူ​တွေကို စစ်သင်တန်းပို့ပြီး ဆင်းလာတဲ့ ပြည်သူ့စစ် (ပစ)စစ်သားသစ်​တွေကို စစ်တပ်ကအဓိက​​စေလွှတ်ပြီး တိုက်ခိုက်ခိုင်းတာမှာ​သေဆုံးသူ ဒဏ်ရာရသူ ၊ထွက်​ပြေးသူ များ​နေတာ​ကြောင့် စစ်တပ်က စစ်သားသစ်​တွေကို ပုံစံမျိုးစုံနဲ့ အဓမ္မစူ​ဆောင်း​နေပါတယ် ။ စစ်သားသစ် အဓမ္မစု​ဆောင်းခံရပြီး ​ရှေ့တန်းပို့စစ်တိုက်ခိုင်းတာမှာ ​တော်လှန်​ရေးတပ်​တွေနဲ့ ပူး​ပေါင်းတဲ့ လူငယ်​တွေလည်းများစွာရှိ​နေပါတယ်။

နိုင်ငံတစ်ဝန်းတိုက်ပွဲ​တွေမှာ စစ်တပ်က စစ်သားသစ်​​တွေကို​ရှေ့က​နေ အ​သေခံစစ်တိုက်ခိုင်း​​နေတာ​ကြောင့် ​ ပြည်သူ​တွေအ​နေနဲ့ မိမိတို့ မိသားစုဝင်​တွေ စစ်သားသစ်စု​ဆောင်းမခံရရ​အောင် ၊​ပေါ်တာဆွဲမခံရ​အောင် ပါးပါးနပ်နပ် ​နေထိုင်ကြဖို့ ​တော်လှန်​ရေးအဖွဲ့​တွေကတိုက်တွန်းထားကြပါတယ်။