အာဏာသိမ်းခေါင်းဆောင်ထိုင်းရောက်နေချိန်မြန်မာ-ထိုင်းနယ်စပ်မှာတိုက်ပွဲပြင်းထန်

ဩဂုတ်-၆၊၂၀၂၆။DEE/People’s Spring

အာဏာသိမ်းခေါင်းဆောင်မင်းအောင်လှိုင် ထိုင်းနိုင်ငံ ဘန်ကောက်မြို့ရောက်ရှိနေချိန်မှာ မြန်မာ-ထိုင်းနယ်စပ်မှာ တိုက်ပွဲတွေပြင်းထန်နေတယ်လို့ လူထုနွေဦးရဲ့ စစ်ရေးသတင်းရင်းမြစ်က ပြောပါတယ်။

မြန်မာ-ထိုင်းနယ်စပ် မြဝတီမြို့တောင်ဘက်ခြမ်းမှာဩဂုတ်၆ရက် မနက်ပိုင်းမှာ တိုက်ပွဲတွေ ဆက်လက်ပြင်းထန်နေပြီး စစ်တပ်ကလေယာဉ်နဲ့ ၂ကြိမ် ဗုံးကြဲသွားတယ်လို့ ကရင်စစ်ရေးသတင်းရင်းမြစ် တဦးကပြောပါတယ်။

” ရဲကုန်းအကျော်က ဒေသအခေါ် လေးဒေးနေရာမှာ တိုက်ပွဲဖြစ်နေတာ။ တိုက်ပွဲကတော့ မဖြစ်တဲ့နေ့ မရှိသလောက် ကြမ်းနေတာ။မင်းအောင်လှိုင်ဘန်ကောက်ရောက်နေလည်း တိုက်ပွဲက ဖြစ်နေတာပဲ”လို့ ၎င်းက ပြောပါတယ်။

Public Service Announcement

မြဝတီမြို့နားကဒေါန​တောင်တန်းအ​ရှေ့ခြမ်းမှာ သြဂုတ်လ ၃ရက်က ဖြစ်ပွားတဲ့ တိုက်ပွဲအတွင်း အာဏာသိမ်းစစ်တပ်ရဲ့ခမရ(၂၀၃)တပ်ရင်းက ဗိုလ်မှူးအဆင့်ရှိ စစ်ကြောင်းမှူးအပါအ၀င်စစ်ကြောင်း တစ်ကြောင်းလုံးနီးပါး ပြုတ်သွားခဲ့တယ်လို့ကရင်အမျိုးသားအစည်းအရုံး(KNU)ဒူးပလာယာခရိုင်က သတင်းထုတ်ပြန်ထားပါတယ်။

နှစ်ဖက်ထိတွေ့ပစ်ခတ်မှုအပြီး စစ်မြေပြင်မှာစစ်တပ်တပ်ဖွဲ့ဝင်တွေရဲ့ရုပ်အလောင်းတွေနဲ့ လက်နက်ခဲယမ်းတွေ အများအပြားကျန်ရစ်ခဲ့ပြီး လက်ရှိအချိန်မှာလက်နက်ရှစ် လက်နဲ့ ခဲယမ်းကျည်ဆံအချို့သိမ်းဆည်း ထားနိုင်တယ်လို့ သတင်းထုတ်ပြန်ချက်မှာအသိပေးထားပါတယ်။ ဒါ​ပေမယ့်သိမ်းဆည်းရရှိတဲ့လက်နက် ခဲယမ်း​တွေကိုသတင်း​ဓါတ်ပုံဖော်ပြတာမှာ လက်နက်မျိုးစုံ ၁၀ လက် သိမ်းဆည်းရရှိခဲ့တာကို​တွေ့ရ့ပါတယ်။

မြဝတီမြို့​တောင်ဘက် ​ရဲကုန်းအနီး ဇူလိုင်လအတွင်းမှာပဲစစ်တပ်ရဲ့ ​စစ်​ကြောင်းတွေပျက်​အောင် ၂ ကြိမ်တိုင် ​တော်လှန်​ရေးတပ်​တွေကတိုက်ခိုက်ခဲ့ပါတယ်။

​တော်လှန်​ရေးတပ်​တွေက ရဲကုန်က​နေ ဆုတ်ခွာဟန်ပြုပြီး တက်လာတဲ့ စစ်​ကြောင်း​တွေကို တိုက်ခိုက်တာမှာ ဇူလိုင် ၁၆ ရက်က တိုက်ပွဲမှာစကခ (၁၃)လက်​အောက်ခံ ခမရ(၅၅၆)တပ်ရင်းဒုတပ်ရင်းမှူး ဗိုလ်မှူးတင်ကို ဦးစီးတဲ့ စစ်ကြောင်းကို ကော်ဘရာစစ်ကြောင်းစစ်ဆင်ရေးမှူး ဗိုလ်မှူးဒါဘောဦးဆောင်တဲ့ တော်လှန်ရေးတပ်တွေက တိုက်ခိုက်ခဲ့ရာဒုတပ်ရင်းမှူးအပါအဝင် စစ်ကြောင်းတစ်ခုလုံးနီးပါး သေဆုံးပြီးစစ်​ကြောင်းပျက်ခဲ့ပါတယ်။ အဲဒီတိုက်ပွဲအတွင်းမှာခမရ(၅၅၆)တပ်ရင်းက စစ်မှုထမ်းစစ်သားသစ် ၄ ဦးကိုလည်း တော်လှန်ရေးတပ်တွေက ဖမ်းမိခဲ့ပါတယ်။

ဇူလိုင် ၂၁ ရက်မှာလည်း ရဲကုန်းအနီး စစ်တပ်စစ်​ကြောင်းကို​တော်လှန်​ရေးတပ်​တွေကတိုက်ခိုက်တာမှာ ​စစ်သား​တွေသေဆုံး ဒဏ်ရာရသူများပြီး စစ်​ကြောင်းပျက်ပြီး ပြန်ဆုတ်ခဲ့ပါတယ်။ မြဝတီ​မြို့တောင်ဘက်ရှိ ဖလူး ၊မင်းလက်ပံ​ဒေသကို စစ်တပ်က အင်အား​ထောင်ချီသုံးပြီး ဇူလိုင်လကစ စစ်​ကြောင်း​တွေထိုး​နေ​ပေမယ့် ​တော်လှန်​ရေးတပ်​တွေရဲ့ ဖြတ်​တောက်တိုက်ခိုက်မှု​ကြောင့် ​ရှေ့မတိုးနိုင်ပါဘူး။

စစ်ခေါင်းဆောင် မင်းအောင်လှိုင်ဟာ ထိုင်းနိုင်ငံ ခရီးစဉ် လာရောက်စဉ်အတွင်း ဆန္ဒပြကန့်ကွက်မှုမရှိအောင် ထိုင်းရဲတပ်ဖွဲ့က မြန်မာလုပ်သားအရေးလှုပ်ရှားသူတွေအပေါ် အတင်းအကြပ်ဖိအားပေးနေပါတယ်။ ဒါပေမယ့် စစ်ခေါင်းဆောင် ဘန်ကောက်မြို့ရောက်ရှိတဲ့ ဒီကနေ့ မှာဘဲ မြန်မာလုပ်သားအရေးဆောင်ရွက်နေတဲ့ Bright Future အဖွဲ့က ဒီကနေ့ နေ့လည်ပိုင်းမှာ ဘန်ကောက်မြို့က ကုလသမဂ္ဂ (UN) ရုံးရှေ့မှာ ဆန္ဒပြဖို့ စီစဉ်ထားပါတယ်။