သြဂုတ်-၈၊၂၀၂၆။နေ့သစ်/People’s Spring
ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ(SCEF)ရဲ့မဟာဗျူဟာနှင့် မူဝါဒရေးရာ ဦးဆောင်အဖွဲ့နဲ့ စစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီတို့သြဂုတ် ၇ ရက်မှာဆွေးနွေးပြီးစစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီပူးတွဲဥက္ကဋ္ဌ ၂ ဦး ၊အတွင်းရေးမှူး ၁ဦးနဲ့တွဲဖက်အတွင်းရေးမှူး(၂)ဦးတို့ကိုရွေးချယ်တာဝန်ပေးအပ်လိုက်ကြောင်း ထုတ်ပြန်ပါတယ်။
ဒါအပြင် ရှေ့ဆက်လက်လုပ်မယ် လုပ်ငန်းစဉ်တွေနဲ့ မဟာဗျူဟာမြောက် ပန်းတိုင်များကို ပေါင်းစပ်ညှိနှိုင်းပြီးတော့ထိရောက်စွာ အကောင်အထည်ဖော်ဖို့အတွက်လည်းသဘောတူခဲ့ကြတယ်လို့ SCEF ကထုတ်ပြန်ပါတယ်။
အစည်းအဝေးမှာ မဟာဗျူဟာနှင့် မူဝါဒရေးရာ ဦးဆောင်အဖွဲ့မှ ခေါင်းဆောင်တွေ ၊အတွင်းရေးမှူးအဖွဲ့ဝင်တွေနဲ့ စစ်မဟာဗျူဟာ ပေါင်းစပ်ညှိနှိုင်း ကွပ်ကဲရေးကော်မတီအဖွဲ့ဝင်(၁၀)ဦး တက်ရောက်ခဲ့ကြတယ်လို့လည်းဖော်ပြထားပါတယ် ။
Public Service Announcement
SCEF ရဲ့မဟာဗျူဟာနှင့် မူဝါဒရေးရာ ဦးဆောင်အဖွဲ့ နဲ့ စစ်မဟာဗျူဟာ ပေါင်းစပ်ညှိနှိုင်း ကွပ်ကဲရေးကော်မတီတို့ရဲ့ ပူးတွဲအစည်းအဝေးကို ၂၀၂၆ ဩဂုတ်လ ၇ ရက် မြန်မာစံတော်ချိန် နံနက် ၁၀ နာရီမှာ အွန်လိုင်း (Online) စနစ်ဖြင့် အောင်မြင်စွာ ကျင်းပခဲ့တာဖြစ်ပါတယ် ။
အစည်းအဝေးကနေ စစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီ ပူးတွဲ ဥက္ကဋ္ဌ (၂)ဦး၊အတွင်းရေးမှူး(၁)ဦးနဲ့တွဲဖက်အတွင်းရေးမှူး(၂)ဦးတို့ကို ရွေးချယ်တာဝန်ပေးအပ်ခဲ့သလို ၊ရှေ့ဆက်လက်ဆောင်ရွက်မယ် လုပ်ငန်းစဉ်တွေ၊ မဟာဗျူဟာမြောက် ပန်းတိုင်တွေကို ပေါင်းစပ်ညှိနှိုင်းပြီး ထိရောက်စွာ အကောင်အထည်ဖော် ဆောင်ရွက်သွားရန် သဘောတူညီခဲ့ကြတယ်လို့ သိရပါတယ် ။
အစည်းအဝေးမှာဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ အလှည့်ကျသဘာပတိ ခူဦးရယ်လ်က အဖွင့်အမှာစကားပြောကြားပြီး တွဲဘက်ညှိနှိုင်းရေးမှူး Salai Ram Kulh Cung က အခမ်းအနားမှူးအဖြစ်ဆောင်ရွက်ခဲ့ပါတယ်။
ဆွေးနွေးမှုတွေအပြီးမှာ စစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီ ပူးတွဲ ဥက္ကဋ္ဌ (၂)ဦးက နိဂုံးချုပ်စကားတွေအသီးသီးပြောကြားခဲ့ပြီး အောင်မြင်စွာပြီးဆုံးခဲ့တယ်လို့ထုတ်ပြန်ထားပါတယ်။
SCEFဟာ ဖက်ဒရယ်ယူနစ် လွှတ်တော်အစိုးရ တွေ၊ တိုင်းရင်းသားလက်နက်ကိုင်တပ်ဖွဲ့တွေ တော်လှန်ရေးအင်အားစုတွေနဲ့ ဇူလိုင် ၁၇ရက်ကနေ ၂၃ရက်အတွင်း အဖွဲ့အစည်း ၁၁ ခုထက်မနည်းကို တွေ့ဆုံဆွေးနွေးခဲ့ပါတယ်။
ဒီလိုတွေ့ဆုံရာမှာ တဖွဲ့ချင်းစီ တွေ့ဆုံခဲ့သလို လူမျိုးအလိုက် အဖွဲ့အစည်းတွေကို စုစည်းတွေ့ဆုံခဲ့တာလည်း SCEF ရဲ့ ထုတ်ပြန်ချက်တွေမှာ တွေ့ရပါတယ်။
ဇူလိုင် ၂၃ရက်က အာရက္ခတပ်တော်(ULA/AA)၊ ဇူလိုင် ၂၂ရက်မှာ ပအိုဝ်းအမျိုးသားလွတ်မြောက်ရေးအဖွဲ့ချုပ်/ပအိုဝ်းအမျိုးသားလွတ်မြောက်ရေးတပ်မတော် (PNLO/PNLA)၊ ပအိုဝ်းအမျိုးသားဖက်ဒရယ်ကောင်စီ(PNFC)၊ ဇူလိုင် ၂၁ရက်မှာ မွန်ပြည်သစ်ပါတီ(စစ်အာဏာရှင်တိုက်ဖျက်ရေး)-NMSP-AD ၊မွန်ပြည်ဖက်ဒရယ်ကောင်စီ(MSFC)၊ မွန်ပြည်အတိုင်ပင်ခံကောင်စီ(MSCC)၊ မွန်ပြည်နယ်လွှတ်တော်ကိုယ်စားပြုကော်မတီ(CRMH) တို့ကို SCEFက တွေ့ဆုံခဲ့တာပါ။
ဇူလိုင် ၂၀ရက်မှာတော့ နွေဦးတော်လှန်ရေးက ပေါက်ဖွားလာတဲ့ လက်နက်ကိုင်တပ် ၁၉ဖွဲ့ စုပေါင်းဖွဲ့စည်းထားတဲ့ နွေဦးတော်လှန်ရေးမဟာမိတ်တပ်ပေါင်းစု(SRA)နဲ့ တွေ့ဆုံခဲ့သလို ဇူလိုင် ၁၇ရက်မှာ စစ်ကိုင်း ဖက်ဒရယ်ယူနစ်၊ မကွေးဖက်ဒရယ်ယူနစ်၊ မန္တလေး ဒေသတို့က အစိုးရ ၊ လွှတ်တော် တွေနဲ့ တွေ့ဆုံဆွေးနွေးခဲ့တာပါ။
SCEFကိုအမျိုးသားညီညွတ်ရေးအစိုးရ(NUG) ၊ပြည်ထောင်စုလွှတ်တော်ကိုယ်စားပြုကော်မတီ(CRPH) ၊ ကချင်လွတ်လပ်ရေးအဖွဲ့(KIO)၊ ကရင်အမျိုးသားအစည်းအရုံး(KNU)၊ ကရင်နီအမျိုးသားတိုးတက်ရေးပါတီ(KNPP)နဲ့ ချင်းအမျိုးသားတပ်ဦး(CNF)တို့နဲ့ ၂၀၂၆နှစ်မတ်လ၃၀မှာ စတင်စုဖွဲခဲ့တာဖြစ်ပါတယ်။ SCEF ကို ပြည်နယ်/ ဖက်ဒရယ်ယူနစ်/ ERO ကိုယ်စားပြုမဏ္ဍိုင်၊ ပြည်သူ့ကိုယ်စားပြုမဏ္ဍိုင်နဲ့ အမျိုးသမီးကိုယ်စားပြု မဏ္ဍိုင် စတဲ့ မဏ္ဍိုင်သုံးရပ်ပါဝင်ဖွဲ့စည်းထားပြီးစုဖွဲ့မှုပိုအားကောင်းအောင် လုပ်ဆောင်မယ်လို အသိပေးထားပါတယ်။
