ဩဂုတ်-၁၅၊၂၀၂၆။သတိုး၊သုည/People’s Spring
ရန်ကုန် – မန္တလေး အမြန်လမ်းမှာ Elite ခရီးသည်တင်ယာဉ် တစ်စီး ယာဉ်မောင်းအိပ်ငိုက်ရာက တံတားအောက်ထိုးကျပြီး ခရီးသည် ၄ဦး ထိခိုက်ဒဏ်ရာရရှိခဲ့တယ်လို့ မီးသတ်တပ်ဖွဲ့က အသိပေးထားပါတယ်။
ဒီနေ့ (ဩဂုတ်၁၅) မနက် ၅ နာရီကျော်မှာ နေပြည်တော်ကနေ ရန်ကုန်မြို့ကိုထွက်ခွာလာစဉ် မိုင်တိုင် ၅၈/၁ အနီးမှာ Elite ခရီးသည်တင်ယာဉ်က ယာဉ်မောင်းအိပ်ငိုက်ပြီး လမ်းလယ်ကျွန်းဝင်တိုက်ကာတံတားအောက်ကို ထိုးကျတိမ်းမှောက်ခဲ့တာလို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့က ထုတ်ပြန်ထားပါတယ်။
ယာဉ်ပေါ်မှာ ယာဉ်မောင်းအပါအဝင် ခရီးသည် ၁၅ ဦးလိုက်ပါလာတာဖြစ်ပြီး အမျိုးသား ၂ ဦး အမျိုးသမီး ၂ ဦး ထိခိုက်ဒဏ်ရာရရှိခဲ့တယ်လို့ မီးသတ်တပ်ဖွဲ့က ဆိုပါတယ်။
Public Service Announcement
အမြန်လမ်းမှာ ဖြစ်တဲ့ယာဉ်တိမ်းမှောက်မှု အများစုက ယာဉ်မောင်းအိပ်ငိုက်တာကြောင့် ဖြစ်ပြီး ယာဉ်မောင်းတွေအနေနဲ့ ကား နှစ်နာရီဆက်တိုက်မောင်းပြီးတိုင်း ယာဉ်ရပ်နားစခန်းတွေမှာ ရပ်နားဖို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က အကြံပြုထားပါတယ်။
ဒါ့အပြင် ခရီးသည်တွေအနေနဲ့လည်း ထိုင်ခုံခါးပတ် ပတ်ကြဖို့ ၊ ယာဉ်အမျိုးအစားအလိုက် သတ်မှတ်မိုင်နှုန်းနဲ့ မောင်းနှင်ဖို့လည်း သတိပေးထားပါတယ်။
ပြီးခဲ့တဲ့ ဩဂုတ် ၅ ၊ ၆ နဲ့ ၇ ရက်မှာလည်း ရန်ကုန်-မန္တလေး အမြန်လမ်းမှာ ကုန်တင်ကားယာဉ်မောင်းတွေ အိပ်ငိုက်ပြီး ယာဉ်တိမ်းမှောက်တဲ့ ဖြစ်စဉ်တွေဖြစ်ခဲ့ကြောင်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က သတင်းထုတ်ပြန်ထားပါတယ်။
