ရေဘေးကြုံရမယ့် ပြည်သူတွေကို ကူညီကယ်ဆယ်ထောက်ပံ့ဖို့ အသင့်စီမံထားဟု ပဲခူးတိုင်းစစ်ဌာန ထုတ်ပြန်

ဩဂုတ် ၂၀၊ ၂၀၂၆။ထားမြတ်/People’s Spring

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပဲခူးတိုင်းစစ်ဌာနအနေနဲ့ ရေကြီးရေလျှံမှု ဘေးအန္တရာယ်တွေနဲ့ ပတ်သက်တဲ့ ပြည်သူသို့ အသိပေးချက်ကို ဒီကနေ့ ဩဂုတ် ၂၀ရက်မှာ ထုတ်ပြန်ခဲ့ပြီး ရေဘေးသင့် ပြည်သူတွေကို ကူညီကယ်ဆယ်ရေးလုပ်ဖို့ ထောက်ပံ့ပို့ အသင့်စီမံထားကြောင်း အသိပေးပါတယ်။

စစ်တောင်းမြစ်ရေဟာ စိုးရိမ်ရေမှတ်အထက်ကျော်လွန်ရောက်ရှိလာနိုင်လို့ ရေကြီးရေလျှံမှု ဘေးအန္တရာယ်များ ကြုံတွေ့လာပါက ပြည်သူလူထုရဲ့ အသက်အိုးအိမ် စည်းစိမ် ထိခိုက်ဆုံးရှုံးမှု နည်းပါးစေဖို့ ပဲခူးတိုင်းစစ်ဌာနအောက်ရှိ ဗျူဟာတပ်ရင်းတပ်ဖွဲ့တွေက ကြိုတင်ပြင်ဆင်မှုတွေ အလေးထားဆောင်ရွက်နေတယ်လို့ဆိုပါတယ်။

ရေကြီးရေလျှံမှု ဖြစ်ပွားလာပါက ပြည်သူလူထုကို အချိန်မီ ကူညီကယ်ဆယ်နိုင်ရေးအတွက် တပ်ရင်းတပ်ဖွဲ့များအလိုက် အရေးပေါ် ကယ်ဆယ်ရေးအဖွဲ့များ စုဖွဲ့ထားခြင်း၊ ကယ်ဆယ်ရေးလှေများ၊ ယာဉ်များနဲ့ စက်ပစ္စည်းများ အဆင်သင့် ပြင်ဆင်ထားခြင်းအပြင် အရေးပေါ် ဆေးဝါးနဲ့ စားနပ်ရိက္ခာများ ကူညီထောက်ပံ့နိုင်ဖို့ ကြိုတင်စီမံ ဆောင်ရွက်ထားရှိပြီး ဖြစ်တယ်လို့ ဖော်ပြထားပါတယ်။

Public Service Announcement

စစ်ဌာနအနေနဲ့ ပြည်သူလူထု အန္တရာယ်ကင်းရှင်းရေးအတွက် ရေကြီးရေလျှံမှု ကြုံတွေ့ရလေ့ရှိသော ဒေသများတွင် ရေဘေးအန္တရာယ် ကြိုတင်ကာကွယ်ရေး၊ ဘေးလွတ်ရာသို့ အချိန်မီ ရွှေ့ပြောင်းနိုင်ရေးနဲ့ အရေးပေါ် တုံ့ပြန်ဆောင်ရွက်ရမယ့် နည်းလမ်းတွေနဲ့ပတ်သက်ပြီး ဗျူဟာတပ်ရင်းတပ်ဖွဲ့များက လူထုအသိပညာပေးဟောပြောပွဲတွေ သက်ဆိုင်ရာနယ်မြေမှာ ဆောင်ရွက်နေကြောင်း ထုတ်ပြန်ပါတယ်။

ဒါ့အပြင် ရေဘေးအန္တရာယ် ကြုံတွေ့လာပါက အလွယ်တကူ ထိခိုက်ဒဏ်ရာရရှိနိုင်တဲ့ သက်ကြီးရွယ်အိုများ၊ နာမကျန်းဖြစ်သူများ၊ မသန်စွမ်းသူများ၊ ကလေးသူငယ်များနဲ့ ကိုယ်ဝန်ဆောင်မိခင်များအားရေဘေးလွတ်ကင်းရာနေရာများသို့ ကြိုတင်ရွှေ့ပြောင်းထားရှိဖို့ တပ်ရင်းတပ်ဖွဲ့များအား ညွှန်ကြားထားကြောင်း အသိပေးပါတယ်။

ပဲခူးတိုင်းစစ်ဌာနအောက်ရှိ ဗျူဟာတပ်ရင်းတပ်ဖွဲ့များအနေနဲ့ ရေဘေးအန္တရာယ် ဖြစ်ပေါ်လာပါက ပြည်သူလူထု၏ အသက်အိုးအိမ်စည်းစိမ် ထိခိုက်ဆုံးရှုံးမှု အနည်းဆုံးဖြစ်အောင် အပြည့်အဝ ကူညီဆောင်ရွက်ပေးသွားမှာ ဖြစ်လို့ ဒေသခံတွေအနေနဲ့လည်း သက်ဆိုင်ရာ တာဝန်ရှိသူတွေရဲ့ ရေဘေးသတိပေးချက်များကို မပြတ်မလပ် နားထောင်ပြီး ပူးပေါင်းပါဝင်ဆောင်ရွက်ဖို့ ထုတ်ပြန်ပါတယ်။