သူ့ရဲ့ ကုန်သွယ်ခွန် တိုးမြှင့်မှုတွေကို လက်တုံ့ပြန်လာတဲ့ ကနေဒါကို သင်ခန်းစာပေးဖို့ အချိန်တန်ပြီလို့ အမေရိကန် သမ္မတ ဒေါ်နယ်လ်ထရမ့်က ပြောကြားခဲ့ပါတယ်။
ဩဂုတ်လ ၂၆ ရက်နေ့တုန်းက အင်တာဗျူး တစ်ခုမှာ ထရမ့်က ကနေဒါ အစိုးရဟာ ဒါမျိုး ထပ်လုပ်လို့ မရဘူးဆိုတာ သေချာ သိနားလည်သွားဖို့ လိုနေပြီလို့ မှတ်ချက် ပေးသွားခဲ့ပါတယ်။
အမေရိကန်နဲ့ ကနေဒါတို့ကြား ကုန်သွယ်ရေး ဆွေးနွေးမှုတွေ အဆင်မပြေခဲ့တဲ့နောက် ထရမ့်က ကနေဒါ သွင်းကုန်တွေထဲက ဒေါ်လာ ဘီလီယံ ၂၀ ဖိုးလောက် ကုန်စည်တွေအပေါ် တန်ဖိုးရဲ့ ၅၀ ရာခိုင်နှုန်းထိ အခွန်တိုးမြှင့် စည်းကြပ်ခဲ့ပါတယ်။
ကနေဒါ ဝန်ကြီးချုပ် မတ်ခ်ကာနေးက အမေရိကန်ဟာ ကုန်သွယ်ရေးစစ်ပွဲတစ်ခု စတင်လိုက်တာ ဖြစ်တယ်လို့ စွပ်စွဲခဲ့ပြီး အမေရိကန် ကုန်စည်တွေရဲ့ ဒေါ်လာ ၂၀ ဘီလီယံဖိုးလောက် ပမာဏအတွက် အခွန်တိုးမြှင့် စည်းကြပ်မယ့် အစီအစဉ်ကို ဩဂုတ် ၂၅ ရက်နေ့မှာ ကြေညာခဲ့ပါတယ်။
Public Service Announcement
Blaze မီဒီယာ ကုမ္ပဏီ အမှုဆောင်ချုပ် ဂလန်းဘက်ခ်နဲ့ အင်တာဗျူးမှာတော့ ထရမ့်က အခုအခြေအနေနဲ့ ပတ်သက်ပြီး ကနေဒါဟာ သူ့ကို ဒါမျိုးလာလုပ်လို့ မရဘူးဆိုတာ သိသွားအောင် သင်ခန်းစာ ပေးဖို့ လိုနေပြီလို့ ပြောကြားသွားပါတယ်။
ကနေဒါနဲ့ အတော်လေး ကောင်းမွန်တဲ့ သဘောတူညီမှုမျိုး ရှိခဲ့ဖူးကြောင်း၊ သိထားသင့်တာ တစ်ခုက အမေရိကန်အတွက် အသည်းအသန် လိုအပ်တဲ့ ကုန်စည်မျိုးတွေ ကနေဒါဆီမှာ မရှိကြောင်း၊ နည်းနည်းပါးပါးလောက် အဆင်မပြေတာလေး တစ်ခုနှစ်ခု ကြုံနိုင်ပေမယ့် ကျော်လွှားသွားနိုင်မှာ ဖြစ်ကြောင်း၊ အစားထိုး ကုန်ပစ္စည်းတွေကို နေရာအနှံ့ကနေ အမေရိကန်က လွယ်လွယ်လေး ဝယ်လို့ရကြောင်း၊ အခုတော့ ဒါမျိုးကိစ္စ ထပ်လုပ်လို့ မရဘူးဆိုတာ ကနေဒါကို လက်တွေ့ သင်ပေးရမယ့် အချိန်တန်လာပြီဖြစ်ကြောင်း ထရမ့်က ဆိုပါတယ်။
အလတ်စားနဲ့ အကြီးစား မော်တော်ယာဉ်တွေအတွက် အခွန်စည်းကြပ်မှုကို အမေရိကန်က ဆက်လက် လျှော့ပေါ့ပေးထားဖို့ ငြင်းဆန်ခြင်းက နှစ်နိုင်ငံကြား ဆွေးနွေးမှုတွေ ပျက်ပြယ်ခဲ့တဲ့ အဓိက အကြောင်းရင်း တစ်ခုလို့ ကနေဒါ အစိုးရက ကြေညာထားပါတယ်။
ထရမ့်ရဲ့ မှတ်ချက်စကားနဲ့ ပတ်သက်ပြီး အမေရိကန် နိုင်ငံဆိုင်ရာ ကနေဒါ သံရုံးကတော့ ဘာမှ မတုံ့ပြန်သေးပါဘူး။ မဟာမိတ် အိမ်နီးချင်း နှစ်နိုင်ငံဟာ ထရမ့်ရဲ့ ကုန်သွယ်ရေး မူဝါဒ အပြောင်းအလဲတွေကြောင့် ဆက်ဆံရေး မပြေလည်မှုတွေ ရှိလာခဲ့ပါတယ်။
ထရမ့်ဟာ ကနေဒါကို အမေရိကန်နိုင်ငံရဲ့ ၅၁ ခုမြောက် ပြည်နယ်သစ် ဖြစ်လာသင့်ကြောင်းလည်း ပြောဆိုခဲ့ဖူးပြီး အဲဒီကိစ္စနဲ့ ပတ်သက်လို့ ကနေဒါ အစိုးရဖက်က ခါးခါးသီးသီး ငြင်းဆန်ခဲ့ပါတယ်။
ကိုးကား: Reuters
