Johnson & Johnson ကုမ္ပဏီက ထုတ်လုပ်တဲ့ ကိုဗစ် ကာကွယ်ဆေးကို Booster ထိုးထားသူတွေဟာ Omicronမျိုးကွဲ ကိုရိုနာဗိုင်းရပ်စ်ကြောင့် ရောဂါလက္ခဏာတွေ ပြင်းပြင်းထန်ထန် ခံစားရတဲ့ အခြေအနေကို ထိထိရောက်ရောက် ဟန့်တားနိုင်စွမ်းရှိကြောင်း သုတေသန စစ်တမ်းတစ်ခု ထွက်ပေါ်လာပါတယ်။
အမေရိကန် ဆေးဝါး ကုမ္ပဏီကြီးက ကာကွယ်ဆေး Booster ထိုးနှံထားသူတွေရဲ့ Antibody ထုတ်နိုင်စွမ်းကို သုတေသနပြု လေ့လာပြီးတဲ့နောက် အခုရလဒ်ကို ထုတ်ပြန်ခဲ့တာ ဖြစ်ပါတယ်။ Booster ထိုးထားတဲ့အခါ Omicronဗိုင်းရပ်စ် မကူးစက်အောင် လုံးဝဥဿုံ ကာကွယ်မယ်လို့ အာမမခံနိုင်ပေမယ့် ဗိုင်းရပ်စ်ကြောင့် အဆိုးဆုံး အခြေအနေတွေ ကြုံမလာအောင်တော့ အာနိသင် ကောင်းကောင်းနဲ့ ကာကွယ်ပေးလိမ့်မယ်လို့ Johnson & Johnsonက ဆိုပါတယ်။
Omicronမျိုးကွဲ ကိုရိုနာဗိုင်းရပ်စ်ကို စတင် တွေ့ရှိခဲ့တဲ့ တောင်အာဖရိက နိုင်ငံမှာ စမ်းသပ်မှုတွေ ပြုလုပ်ခဲ့တဲ့အခါ Johnson & Johnsonရဲ့ ဆေးကို တတိယမြောက် Booster ထိုးလိုက်တဲ့အခါ ကာကွယ်ဆေးရဲ့ Antibody လှုံ့ဆော်နိုင်စွမ်းကို ၈၅ ရာခိုင်နှုန်းလောက် ထပ်မြင့်တက်လာစေတယ်လို့ အဖြေထွက်ခဲ့ပါတယ်။
အမေရိကန်မှာလည်း အလားတူ ဓာတ်ခွဲခန်း စမ်းသပ်မှု ပြုလုပ်ခဲ့တဲ့အခါ Johnson & Johnsonရဲ့ Boosterဟာ ဗိုင်းရပ်စ်ကို တုံ့ပြန်တိုက်ခိုက်တဲ့ T Cellတွေ ပိုမိုနိုးကြားအောင် အားကောင်းကောင်းနဲ့ လှုံ့ဆော်ပေးကြောင်း တွေ့ရှိခဲ့ပြန်ပါတယ်။
Public Service Announcement
အစောပိုင်းက Johnson & Johnsonရဲ့ ကာကွယ်ဆေးဟာ ထိုးနှံသူ တချို့မှာ သွေးခဲတဲ့ ဘေးထွက်ဆိုးကျိုး ပြဿနာမျိုး ဖြစ်နိုင်တယ်ဆိုတဲ့ သတင်းတွေ ထွက်ခဲ့ဖူးပါတယ်။ အခုအခါ ကုမ္ပဏီရဲ့ လေ့လာ တွေ့ရှိချက် အသစ်တွေကတော့ Omicronနဲ့ ပတ်သက်လို့ အားတက်စရာ အခြေအနေ ဖြစ်လာပါတယ်။
သုတေသီတွေကတော့ ဒီတွေ့ရှိချက်တွေဟာ Omicronကို တန်ပြန်ရာမှာ အရမ်း အရေးပါလာလိမ့်မယ်လို့ ဆိုပါတယ်။ အခုဆိုရင် Omicronဟာ Deltaကိုကျော်ပြီး အမေရိကန်မှာ ကိုဗစ်ရောဂါ ဖြစ်ပွားစေမှု အများဆုံး ကိုရိုနာဗိုင်းရပ်စ် မျိုးကွဲအဖြစ် ရပ်တည်လာနေပါတယ်။
အခုလ အစောပိုင်းတုန်းကတော့ အမေရိကန်ရဲ့ ရောဂါတားဆီး ထိန်းချုပ်ရေးဌာန (CDC)က Modernaနဲ့ Pfizerတို့က ထုတ်လုပ်တဲ့ ကာကွယ်ဆေးတွေကို ဦးစားပေးအဆင့် စဉ်းစားရွေးချယ်ပြီး ထိုးနှံကြဖို့ အကြံပြု တိုက်တွန်းထားခဲ့ဖူးပါတယ်။
