မြေပြင်ကရဲဘော်တွေကို ကူညီပေးဖို့ လစဥ်ရန်ပုံငွေရှာပေးနေတဲ့ သရုပ်ဆောင်အဆိုတော် ချစ်သုဝေက ဒီလမှာတော့ Hope ဆိုတဲ့ခေါင်းစဥ်နဲ့ Macrame အိတ်လေးတွေရောင်းချမှာပါ။
“တို့တွေဟာ မျှော်လင့်ချက် တွေ ထမ်းပိုးရင်း အိပ်မက်တွေ အပြည့်ထည့်လို့ခရီးဆက်နေသူတွေ” လို့ ချစ်သုဝေက သူ့ရဲ့ ဖေ့စ်ဘွတ်ခ်စာမျက်နှာမှာရေးသားထားပါတယ်။
ကံစမ်းမဲလက်မှတ်တစ်စောင်ကို မြန်မာငွေ (၁၀,၀၀၀) ကျပ်၊ အမေရိကန်ဒေါ်လာ (၁၀) ဒေါ်လာ၊ ကိုရီးယားဝမ် (၇,၀၀၀) ဝမ်၊ ဂျပန်ယမ်းငွေ (၁၀၀၀) ယမ်း၊ ထိုင်းဘတ်ငွေ (၂၀၀) Bath၊ စင်္ကာပူဒေါ်လာ (၁၀) နှုန်း နဲ့ ဒီနေ့ကစပြီး ဖေဖော်ဝါရီ ၂ ရက်အထိရောင်းချပေးမှာဖြစ်ပါတယ်။
ဒီတစ်ခေါက်မှာတော့ ချစ်သုဝေကိုယ်တိုင်ထိုးထားတဲ့ Macrame အိတ်သုံးလုံး မဲဖောက်ပေးမှာဖြစ်ပြီး တတ်နိုင်သူတွေကို အားပေးကြဖို့ ချစ်သုဝေက ဖိတ်ခေါ်ထားပါတယ်။
Public Service Announcement
ဇန်နဝါရီလတုန်းက ချစ်သုဝေက Our Land လို့ အမည်ပေးထားတဲ့ မြန်မာပြည်မြေပုံ Macrame ကို မဲဖောက်ပေးခဲ့တာဖြစ်ပြီး အလှူငွေ သိန်းသုံးရာကျော်လှူဒါန်းနိုင်ခဲ့ပါတယ်။
ခရစ်စမတ်ကာလကလည်း Macrame တွေရောင်းချပေးခဲ့ပြီး အလှူငွေ သိန်း ၁၈၀ ကျော်ရှာဖွေပေးနိုင်ခဲ့ပါတယ်။
ဒီတစ်ခေါက်ကံစမ်းမဲအတွက်လည်း ချစ်သုဝေ ကိုယ်တိုင်မဲဖောက်ပေးမှာဖြစ်ပြီး မဲဖောက်ပေးမယ့်ရက်ကိုတော့ ပြန်ကြေညာပေးမယ်လို့ သိရပါတယ်။
