သူလျှိုလေယာဉ် ဖြတ်ပျံခဲ့တဲ့ လုပ်ရပ်အတွက် ဒိန်းမတ်နဲ့ ဆွီဒင်တို့က ရုရှား သံအမတ်တွေကို အသီးသီး ဆင့်ခေါ်ပြီး တရားဝင် ကန့်ကွက် ရှုတ်ချသွားမယ်လို့ သိရပါတယ်။
ပြီးခဲ့တဲ့ သီတင်းပတ်ကုန်က ရုရှားရဲ့ သူလျှိုလေယာဉ် တစ်စီးဟာ ဒိန်းမတ်နိုင်ငံ အရှေ့ဖျားက ဘွန်ဟွမ်းလ်ကျွန်း လေပိုင်နက်ထဲ ဝင်ရောက်ခဲ့ပြီး အဲဒီကတဆင့် ဆွီဒင် လေပိုင်နက်ကိုပါ ကျူးကျော်ခဲ့တယ်လို့ စကန်ဒီနေးဗီးယား ဒေသတွင်း နှစ်နိုင်ငံ အာဏာပိုင်တွေက စွပ်စွဲ ပြောကြားခဲ့ပါတယ်။
ယူကရိန်းကို ကျူးကျော် တိုက်ခိုက်မှုအတွက် ရုရှားနဲ့ အနောက်အုပ်စု နိုင်ငံတွေကြား ဆက်ဆံရေး အတင်းမာဆုံး ဖြစ်နေချိန်မှာ ရုရှားလေယာဉ်က အခုလို လေပိုင်နက် ကျူးကျော် ပျံသန်းတာမျိုး ဖြစ်ခဲ့တာပါ။ ဒိန်းမတ်ဟာ NATO အဖွဲ့ဝင် နိုင်ငံတစ်ခုဖြစ်ပြီး ဆွီဒင်ကတော့ ဖင်လန်နဲ့အတူ NATO အဖွဲ့ဝင်အဖြစ် လျှောက်ထားဖို့ စီစဉ်နေပါတယ်။
ဒိန်းမတ် နိုင်ငံခြားရေးဝန်ကြီး ဂျပ်ပီ ကိုဖော့ဒ်က သူဟာ သူလျှိုလေယာဉ် ပျံသန်းစေမှုအတွက် မေလ ၂ ရက်မှာ ရုရှား သံအမတ်ကြီးကို ဆင့်ခေါ်ပြီး ကန့်ကွက်သွားမယ်လို့ ပြောပါတယ်။ ဆွီဒင် အစိုးရကလည်း စတော့ခ်ဟုမ်းမြို့မှာ ရှိနေတဲ့ ရုရှား သံအမတ်ကို ဒီကိစ္စနဲ့ ပတ်သက်လို့ တရားဝင် အရေးဆိုမယ်လို့ ကြေညာထားပါတယ်။
ကိုဖော့ဒ်က ရုရှားရဲ့ လုပ်ရပ်ဟာ လက်ခံနိုင်စရာ မရှိသလို မလိုလားအပ်တဲ့ တင်းမာမှုတွေကို ဖိတ်ခေါ်ရာ ရောက်နေကြောင်း ပြင်းပြင်းထန်ထန် ဝေဖန်ခဲ့ပါတယ်။ ဆွီဒင် ကာကွယ်ရေးဝန်ကြီး ပီတာ ဟူးလ်ကွစ်ဗ်ကလည်း ပေါ်ပေါ်ထင်ထင် လေပိုင်နက် ကျူးကျော်ပြခဲ့တဲ့ လုပ်ရပ်ဟာ မနှစ်မြို့စရာ ကိစ္စ၊ ပရော်ဖက်ရှင်နယ် မပီသတဲ့ ကိစ္စမျိုးလို့ သတင်းထောက်တွေကို ပြောသွားပါတယ်။
မတ်လဆန်းတုန်းကလည်း ရုရှား တိုက်လေယာဉ် လေးစီးဟာ ဆွီဒင် လေပိုင်နက်ထဲ ကျူးကျော် ဝင်ရောက်ခဲ့ဖူးပါသေးတယ်။ ဖေဖော်ဝါရီ ၂၄ ရက်မှာ ရုရှားက ယူကရိန်းကို ကျူးကျော် စစ်ပြုခဲ့တဲ့နောက် စကန်ဒီနေးဗီးယား ဒေသတွင်းက နိုင်ငံတွေမှာ စိုးရိမ်မှုတွေ မြင့်တက်လာပြီး NATOနဲ့ ပူးပေါင်းဖို့ ပိုပြီး အားထည့် ကြိုးစားလာနေကြပါတယ်။