ဂျပန်နိုင်ငံ၊ ယာမာနာရှီ ဒေသက ဖူဂျီကျူ ကုန်းမြင့် အပန်းဖြေ စခန်းမှာ တည်ဆောက်ထားတဲ့ ရိုလာကိုစတာဟာ ကမ္ဘာပေါ်မှာ မြန်နှုန်း အမြင့်ဆုံး မောင်းနှင်နိုင်တယ်လို့ ကြွေးကြော်ထားပါတယ်။ ဒီရိုလာကိုစတာဟာ အမြင့်ဆုံး မြန်နှုန်းမှာ တစ်နာရီ ၁၁၂ မိုင်နှုန်းထိ ရောက်ရှိနိုင်ပါတယ်။
အခုတော့ လုံခြုံရေး စိုးရိမ်ရတဲ့ အခြေအနေတွေကြောင့် ရိုလာကိုစတာကို ပိတ်သိမ်းဖို့ တာဝန်ရှိသူတွေက ဆုံးဖြတ်လိုက်ရတာပါ။ ပြီးခဲ့တဲ့ ၈ လအတွင်း ဒီရိုလာကိုစတာကို လိုက်ပါစီးနင်းသူ ၄ ဦး ဒဏ်ရာတွေ ရခဲ့ကြတာကြောင့် ဖြစ်ပါတယ်။
၄ ဦးစလုံးက လည်ပင်း၊ ကျောရိုး၊ ရင်ဘတ်စတဲ့ နေရာတွေမှာ အရိုးအက်သွားပြီး အတော်လေး ပြင်းပြင်းထန်ထန် ထိခိုက်မိခဲ့ကြပါတယ်။ အပျော်တမ်း အပန်းဖြေရမယ့် နေရာမျိုးမှာ လူတွေ ခဏခဏ ထိခိုက် နာကျင်နေရတယ် ဆိုတာမျိုးက ဘယ်လိုမှ မအပ်စပ်ကြောင်း၊ ဒါကြောင့် ရိုလာကိုစတာကို ဆက်ပြီး အသုံးမပြုတော့ဖို့ ဆုံးဖြတ်ခဲ့ကြောင်း အပန်းဖြေ စခန်းက ကြေညာပါတယ်။
ဖူဂျီတောင်ခြေနားမှာ တည်ရှိတဲ့ ရိုလာကိုစတာကြီးကို ဩဂုတ် ၁၂ ရက်စလို့ ပြေးဆွဲမှု ရပ်ဆိုင်းလိုက်တာ ဖြစ်ပါတယ်။ ရိုလာကိုစတာကို တည်ဆောက်ပေးခဲ့တဲ့ အိုဆာကာမြို့ အခြေစိုက် ဆန်ဆိုင်း ကုမ္ပဏီကလည်း ထိခိုက် ဒဏ်ရာရမှုတွေအတွက် အနူးအညွတ် တောင်းပန်ကြောင်း ထုတ်ပြန်ခဲ့ပါတယ်။
Public Service Announcement
အရင်က ရိုလာကိုစတာ အဟောင်းကို ၂၀၁၇ မှာ ပြန်လည် မွမ်းမံ တည်ဆောက်ခဲ့တာဖြစ်ပြီး ၆၉ မီတာ အကွာအဝေးကို ၁.၅၆ စက္ကန့်အတွင်း ရောက်ရှိနိုင်တဲ့အထိ မြန်မြန်ဆန်ဆန် ပြေးလွှားနိုင်ကြောင်း သိရပါတယ်။
