အမေရိကန် ဆေးဝါး ကုမ္ပဏီကြီး Merckက တီထွင်ထားတဲ့ ဆေးတစ်မျိုးဟာ ကိုဗစ်ရောဂါကို ထိထိရောက်ရောက် ကုသပေးမယ့် ပထမဆုံး သောက်ဆေးတစ်မျိုး ဖြစ်လာဖို့ ရှိနေပါတယ်။
Merckက Ridgeback Biotherapeutics ကုမ္ပဏီနဲ့ ပူးပေါင်းပြီး ဖန်တီးထားတဲ့ အဲဒီဆေးတောင့်လေးတွေဟာ ကိုဗစ်ရောဂါ ကူးစက်ခံထားရတဲ့ လူနာတွေမှာ ရောဂါလက္ခဏာတွေ ပြင်းထန်မလာအောင် လျှော့ချပေးနိုင်မှာ ဖြစ်ပါတယ်။ ကနဦး စမ်းသပ်မှု ရလဒ်တွေက ဒီဆေးဟာ လူနာတွေကို ဆေးရုံ တက်ရနိုင်တဲ့ အခြေအနေကနေ အနည်းဆုံး ၅၀ ရာခိုင်နှုန်းလောက် လျော့ပါးသွားစေနိုင်တယ်လို့ သိရပါတယ်။
တကယ်လို့ အမေရိကန် အစားအသောက်နဲ့ ဆေးဝါး ကွပ်ကဲမှု ဌာန (FDA)က ဒီဆေးကို အသိအမှတ်ပြု သုံးစွဲခွင့် ပေးလိုက်ပြီဆိုရင် ကိုဗစ်ရောဂါအတွက် ပထမဆုံး အတည်ပြု ကုသဆေး ဖြစ်လာမှာပါ။ လတ်တလောမှာတော့ Remdesivirနဲ့ တခြား ပိုးသတ်ဆေးတွေကို ရောဂါ လက္ခဏာအလိုက် ဆရာဝန်တွေက ရွေးချယ် သုံးစွဲနေပြီး စံသတ်မှတ် ကုသဆေး မရှိသေးပါဘူး။
အခု ဆေးအသစ်ရဲ့ သတင်းဟာ ကိုဗစ်ရောဂါကို ခုခံတိုက်ခိုက်ဖို့ စိတ်လှုပ်ရှားစရာ လက်နက်တစ်ခု ဖြစ်လာမယ်လို့ ဂျွန်ဟော့ပ်ကင်းစ် တက္ကသိုလ်၊ ဆေးကျောင်းက ဆေးဝါးပညာဌာန ပါမောက္ခ ဒေါက်တာ နာမန်ဂျီ ဘွမ်ပက်စ်က ပြောပါတယ်။
Public Service Announcement
အမေရိကန် အစိုးရရဲ့ ကပ်ရောဂါ ထိန်းချုပ်ရေး လုပ်ငန်းစဉ်တွေမှာ အဓိက ဦးဆောင်နေတဲ့ ဒေါက်တာ အန်သိုနီ ဖော်ချီကလည်း Merckရဲ့ ပိုးသတ်ဆေး အသစ်ဟာ အရမ်း အရေးပါတဲ့ တီထွင် အောင်မြင်မှု တစ်ခုလို့ ညွှန်းဆိုခဲ့ပါတယ်။
ဒါပေမဲ့ ဒေါက်တာ ဖော်ချီ အပါအဝင် ဆေးပညာရှင်တွေ အားလုံးလိုလိုက ကာကွယ်ဆေး မပျက်မကွက် ထိုးနှံခြင်းကသာ ပိုပြီး လုံခြုံ ဘေးကင်းတဲ့ ရွေးချယ်မှု ဖြစ်လိမ့်မယ်လို့ သတိပေးခဲ့ပါတယ်။ ကုသဆေး ဖော်စပ်ဖို့ အလားအလာကောင်းတွေ ရှိနေပြီ ဆိုပေမယ့် ကာကွယ်ဆေး ထိုးနှံမှုတွေကို ပေါ့ဆလိုက်လို့ လုံးဝ မရဘူးလို့ ဒေါက်တာ ဘွမ်ပက်စ်က ပြောပါတယ်။
Merckဟာ ရောဂါလက္ခဏာ အပြင်းအထန်နဲ့ အတော်အသင့် ပြသနေတဲ့ လူနာ ၇၇၅ ဦးကို စမ်းသပ် ဆေးဝါး အသစ်တွေ ပေးပြီး မှတ်တမ်းယူ စောင့်ကြည့်ခဲ့ပါတယ်။ ဒီဆေးဟာ ရောဂါ ပိုသည်းလာနိုင်တဲ့ အလားအလာတွေကို သာမန်ထက် ၅၀ ရာခိုင်နှုန်းထက်မနည်း လျော့ကျသွားစေကြောင်း အတည်ပြု တွေ့ရှိထားပါတယ်။ ဒါပေမဲ့ အဲဒီ ကနဦး ရလဒ်ကို ကျေနပ်မနေဘဲ ပိုပြီး ကျယ်ကျယ်ပြန့်ပြန့် စမ်းသပ်ဖို့ စီစဉ်နေကြဆဲလို့လည်း ဒေါက်တာ ဘွမ်ပက်စ်က ဆိုပါတယ်။
ကုမ္ပဏီရဲ့ တာဝန်ရှိသူတွေကတော့ FDA အသိအမှတ်ပြုမှု ရရှိတာနဲ့ ဒီဆေးကို အမြန်ဆုံး ဖြန့်ဝေတင်ပို့နိုင်ဖို့ ပြင်ဆင်ထားကြောင်း ပြောကြားသွားပါတယ်။
