အမေရိကန်က လူစည်ကားရာ ကမ်းခြေတစ်ခုမှာ လာရောက် အပန်းဖြေသူတွေနား ကပ်ပြီး ရဟတ်ယာဉ်တစ်စီး ပျက်ကျခဲ့ပါတယ်။
ဖေဖော်ဝါရီ ၁၉ ရက် နေ့လယ်ပိုင်းက ဖလော်ရီဒါပြည်နယ်၊ မီယာမီ ကမ်းခြေမှာ ရဟတ်ယာဉ် ပျက်ကျမှုတစ်ခု ဖြစ်ခဲ့ကြောင်း ဒေသခံ ရဲတပ်ဖွဲ့က အတည်ပြုပါတယ်။ ရဟတ်ယာဉ်ဟာ ထိန်းချုပ်မှု ကင်းလွတ်သွားပြီး သောင်ပြင်နဲ့ မလှမ်းမကမ်း လူစည်ကားရာ ရေစပ်ကို ထိုးဆင်းလာတာပါ။
ရဟတ်ယာဉ် ပျက်ကျခဲ့တဲ့ ရေပြင်နဲ့ ကိုက်အနည်းငယ်လောက် အကွာမှာတင် ရေကစားနေသူတွေ ရှိနေတယ်လို့ မျက်မြင်တွေက ပြောပါတယ်။ ရဟတ်ယာဉ်ပေါ် ပါလာသူ ၂ ဦးက ဒဏ်ရာတွေ ရခဲ့ပြီး ဒေသခံ ဆေးရုံတစ်ခုကို တင်ပို့ပေးခဲ့ရပါတယ်။ ကမ်းခြေမှာ ရှိနေသူတွေတော့ အထိအခိုက် မဖြစ်ခဲ့ပါဘူး။
ဒီဖြစ်စဉ်အပြီး အနီးတဝိုက်က ကမ်းခြေ ဧရိယာတွေကို နာရီပိုင်းလောက် ကြာအောင် ယာယီ ပိတ်ထားလိုက်ပါတယ်။ အခင်းဖြစ်တဲ့ နေရာကို ရဲတပ်ဖွဲ့၊ မီးသတ်ဌာနနဲ့ အရေးပေါ် လူနာတင်ယာဉ်တွေ ရောက်ရှိနေတာကို တွေ့ရကြောင်း ဒေသခံတွေက ပြောပါတယ်။
Public Service Announcement
ရဟတ်ယာဉ် ပျက်ကျရတဲ့ အကြောင်းရင်းကို အတိအကျ မသိသေးဘဲ ရဲတပ်ဖွဲ့က ဆက်လက် စုံစမ်းနေဆဲလို့ သိရပါတယ်။
