၁၃ နှစ်သား မောင်းတဲ့ကား ယာဉ်တိုက်မှု ဖြစ်ရာက ၉ ဦးသေ

အမေရိကန်မှာ ၁၃ နှစ်သား ကလေးတစ်ဦး တက်မောင်းတဲ့ကား ယာဉ်တိုက်မှု ဖြစ်ပွားပြီး လူ ၉ ဦး သေဆုံးခဲ့ကြောင်း သိရပါတယ်။

အခု သီတင်းပတ် အစောပိုင်းက တက္ကဆက်စ်မှာ လူငယ်လေးတစ်ယောက် မောင်းလာတဲ့ ပစ်ကပ် ထရပ်ကားက တခြား ဗင်ကားတစ်စီးကို ဝင်တိုက်ခဲ့တာလို့ ဒေသဆိုင်ရာ အုပ်ချုပ်ရေးအဖွဲ့ တာဝန်ရှိသူတွေက အတည်ပြုပါတယ်။ အပိုဘီးကို ယာယီ တပ်ဆင်ထားတဲ့ ထရပ်ကားမှာ အဲဒီဘီးက ကွဲထွက်သွားရာ ကားတစ်စီးလုံး တရွတ်ဆွဲပြီး တစ်ဖက်ယာဉ်ကြောက ဗင်ကားကို ဝင်တိုက်မိခဲ့တာလို့ ယာဉ်စည်းကမ်း ထိန်းသိမ်းရေးဌာန အရာရှိ တစ်ဦးက ပြောပါတယ်။

ဝင်အတိုက်ခံရတဲ့ ကားပေါ်မှာ ပါလာတဲ့ တက္ကသိုလ် လက်ရွေးစင်အဆင့် ဂေါက်ရိုက် အားကစားသမား ၆ ဦးနဲ့ နည်းပြဖြစ်သူတို့ သေဆုံးခဲ့ကြပါတယ်။ ပစ်ကပ် ကားကို တက်မောင်းလာတဲ့ ကလေးနဲ့ အဖော်ပါလာသူလည်း အသက် ဆုံးရှုံးခဲ့ကြောင်း သိရပါတယ်။ ဗင်ကားပေါ်က ကနေဒါ နိုင်ငံသား တက္ကသိုလ် ကျောင်းသား နှစ်ယောက်ကတော့ ဒဏ်ရာတွေရပြီး ဆေးရုံမှာ ကုသမှု ခံယူနေရပါတယ်။

တက္ကဆက်စ်ပြည်နယ်ရဲ့ စည်းမျဉ်းတွေအရ အသက် ၁၄ နှစ် ပြည့်တဲ့ ကလေးတွေကို အခြေခံ ကားမောင်း သင်ခန်းစာတွေ စတင် သင်ကြားခွင့် ပြုထားပြီး ၁၅ နှစ် အရွယ်ကစလို့ အရွယ်ရောက်ပြီးသူ တစ်ဦးရဲ့ ကြီးကြပ်မှုအောက်မှာ ကားမောင်းလို့ ရပါတယ်။ ဒါပေမဲ့ အခု ယာဉ်တိုက်မှုမှာ ပါဝင်တဲ့ ကလေးငယ်က အသက် ၁၄ နှစ် မပြည့်သေးဘူးလို့ ဆိုပါတယ်။

Public Service Announcement

ယာဉ်တိုက်မှု ဖြစ်ချိန်မှာ ကားနှစ်စီးက ဘယ်လောက် မြန်နှုန်းနဲ့ မောင်းနေသလဲ ဆိုတာကို ကွဲကွဲပြားပြား မသိရသေးပါဘူး။ အမြန်လမ်း ရဲတပ်ဖွဲ့ဟာ ဖြစ်စဉ်နဲ့ ပတ်သက်လို့ စုံစမ်း စစ်ဆေးမှုတွေ ဆက်လက် လုပ်ဆောင်နေဆဲ ဖြစ်ပါတယ်။