သေနတ်နဲ့ ပစ်ခတ် လုပ်ကြံခံခဲ့ရတဲ့ ဂျပန် ဝန်ကြီးချုပ်ဟောင်း ရှင်ဇိုအာဘေးဟာ ဆေးရုံမှာ ကွယ်လွန်သွားခဲ့ပြီလို့ သိရပါတယ်။
ဇူလိုင် ၈ ရက် မနက်ပိုင်းက နာရာမြို့မှာ မဟာမိတ် နိုင်ငံရေးသမား တစ်ယောက်အတွက် အာဘေးက မဲဆွယ် မိန့်ခွန်း ပြောနေချိန်မှာ သေနတ်သမား တစ်ယောက်က ပစ်ခတ်ခဲ့တာ ဖြစ်ပါတယ်။ အာဘေးဟာ လည်ကုပ်တဝိုက်မှာ ကျည်ထိမှန် လဲကျသွားခဲ့ပြီး ရဲတွေက သေနတ်သမားကို ဖမ်းဆီးခဲ့ပါတယ်။
အစောပိုင်းမှာ ကတည်းက အာဘေးရဲ့ အခြေအနေက မကောင်းတော့ဘူးလို့ သတင်းတွေ ထွက်ခဲ့ပြီး အခုတော့ ဂျပန်ရဲ့ နာမည်ကြီး NHK သတင်းဌာနက ဝန်ကြီးချုပ်ဟောင်း ကွယ်လွန်သွားပြီလို့ ဖော်ပြခဲ့ပါတယ်။ ကွယ်လွန်ချိန်မှာ အာဘေးရဲ့ အသက်က ၆၇ နှစ် ရှိခဲ့ပါပြီ။
ဂျပန်ဟာ သေနတ် ကိုင်ဆောင်ခွင့် စည်းမျဉ်းတွေကို တင်းကျပ်ထားပြီး လက်နက်ကိုင် ပစ်ခတ်မှုတွေနဲ့ ပတ်သက်ရင် ကမ္ဘာပေါ်မှာ အလုံခြုံဆုံး နိုင်ငံတစ်ခုလို့ သတ်မှတ် ခံထားရပါတယ်။ ဒါကြောင့်လည်း လူမြင်ကွင်းမှာ ဝန်ကြီးချုပ်ဟောင်းကို ပစ်ခတ် လုပ်ကြံလိုက်တယ်ဆိုတဲ့ ကိစ္စက တစ်နိုင်ငံလုံးကို အကြီးအကျယ် တုန်လှုပ်သွားစေခဲ့ပါတယ်။
Public Service Announcement
ရဲတွေက အသက် ၄၁ နှစ်အရွယ် တက်ဆူယာ ယာမာဂါမီဆိုတဲ့ အမျိုးသားကို ဖမ်းဆီးထားပြီး လူသတ်မှုနဲ့ စွဲချက်တင်ဖို့ စီစဉ်နေပါတယ်။ သူဟာ ၂၀၀၂ ခုနှစ်ကနေ ၂၀၀၅ ခုနှစ်အတွင်း ဂျပန် မရိန်းတပ်ဖွဲ့ဝင်အဖြစ် အမှုထမ်းခဲ့ဖူးကြောင်း သိရပါတယ်။ သူဟာ လက်လုပ် သေနတ် တစ်လက်ကို အသုံးပြုပြီး အာဘေးကို ပစ်ခတ်ခဲ့တာပါ။ အဲဒီနောက် ထွက်မပြေးဘဲ အဖမ်းခံခဲ့ပါတယ်။
ယာမာဂါမီက ဘယ်လို အကြောင်းပြချက်ကြောင့် အာဘေးကို လုပ်ကြံခဲ့သလဲ ဆိုတာကိုတော့ စုံစမ်း စစ်ဆေးနေဆဲပါ။ အာဘေး ကွယ်လွန်ကြောင်း သတင်းကို NHKက မဖော်ပြခင်မှာ ကမ္ဘာ့နိုင်ငံ အသီးသီးက အစိုးရ အဖွဲ့တွေဟာ အာဘေးအတွက် ဆုမွန်ကောင်း တောင်းပေးကြောင်း အသီးသီး ထုတ်ပြန်ခဲ့ကြပါသေးတယ်။
အာဘေးဟာ ဂျပန်နိုင်ငံ သမိုင်းမှာတော့ သက်တမ်း အရှည်ဆုံး ဝန်ကြီးချုပ်အဖြစ် မှတ်တမ်း တင်ခဲ့ပါတယ်။ သူဟာ ၂၀၂၀ ပြည့်နှစ်၊ စက်တင်ဘာလမှာတော့ ကျန်းမာရေး ကိစ္စကို အကြောင်းပြပြီး ရာထူးက အနားယူသွားခဲ့တာ ဖြစ်ပါတယ်။
