ဂိုင်ယာနာ နိုင်ငံမှာ ကလေး အယောက် ၂၀ နီးပါး သေဆုံးခဲ့တဲ့ စာသင်ကျောင်း မီးလောင်မှုဟာ ဖုန်းအသိမ်း ခံရလို့ ဒေါသထွက်နေတဲ့ ကျောင်းသူ တစ်ဦးရဲ့ လက်ချက် ဖြစ်နိုင်ကြောင်း အာဏာပိုင်တွေက ပြောပါတယ်။
အခု သီတင်းပတ် အစောပိုင်းက တောင်အမေရိက ဒေသတွင်း နိုင်ငံထဲက ကျောင်းတစ်ကျောင်းမှာ အဆောင် မီးလောင်မှု ဖြစ်ခဲ့ပါတယ်။ မီးလောင်တဲ့ အချိန်က အရမ်းစောနေသေးတာကြောင့် ဆယ်ကျော်သက် ကျောင်းသူတွေ ရုတ်တရက် မနိုးဘဲ ပိတ်မိပြီး သေဆုံးခဲ့ကြပါတယ်။ စုစုပေါင်း ၁၉ ဦး အသေအပျောက် ရှိခဲ့ရာမှာ ၁၈ ဦးက အသက် ၁၃ နှစ်နဲ့ ၁၈ ကြားအရွယ် မိန်းကလေးတွေလို့ သိရပါတယ်။ နောက်တစ်ဦးကတော့ အဆောင်မှူးရဲ့ ၅ နှစ်အရွယ် သားငယ်လေး ဖြစ်ပါတယ်။
အဆောင်ကို ညပိုင်းမှာ သော့ခတ်ထားပြီး ပြတင်းပေါက်တွေကိုလည်း သံပန်းတွေ တပ်ထားတာကြောင့် မိန်းကလေးတွေ အပြင်မထွက်နိုင်ဘဲ ပိတ်မိ သေဆုံးခဲ့ကြတာပါ။ စုံစမ်းမှုတွေ ပြုလုပ်ခဲ့တဲ့နောက် မီးဟာ အဆောင်ရဲ့ ရေချိုးခန်းကနေ စတင်ပြီး အဆောက်အအုံ တစ်ခုလုံးကို ကူးစက်သွားကြောင်း တွေ့ရှိထားပါတယ်။ မီးလောင်ချိန်က အဆောင်နေကျောင်းသူ ၅၇ ဦးထိ ရှိနေခဲ့ပါတယ်။
နိုင်ငံ အလယ်ပိုင်းက မာဒီရာမြို့မှာ ဖြစ်ပွားတဲ့ မီးလောင်မှုဟာ ရှို့မီးလို့ ယုံကြည်ရကြောင်း ရဲတွေက ပြောကြားခဲ့ပြီး အဓိက သံသယ တရားခံအဖြစ် မိန်းကလေး တစ်ဦးကို စွပ်စွဲထားပါတယ်။ အဲဒီ မိန်းကလေးဟာ အတန်းကြီး ကျောင်းသားတစ်ဦးနဲ့ အချစ်ရေး ကိစ္စကြောင့် စည်းကမ်းပိုင်းအရ အရေးယူခံထားရပြီး ဖုန်းပါ အသိမ်းခံထားရတဲ့အတွက် ကျောင်းအပေါ် မကျေမချမ်း ဖြစ်နေတယ်လို့ ဆိုပါတယ်။
Public Service Announcement
သူဟာ စည်းကမ်းပိုင်း အရေးယူမှု ခံရပြီးတဲ့နောက် ကျောင်းကို ဒုက္ခပေးမယ်လို့ လူသိရှင်ကြား ကြုံးဝါးထားပါတယ်။ လောလောဆယ်တော့ ရဲတွေက မိန်းကလေးကို စစ်ဆေးမေးမြန်းမှုတွေ ဆက်လက် လုပ်ဆောင်နေပါတယ်။
ဒေသခံ မီဒီယာတွေရဲ့ အဆိုအရ မီးလောင်ကျွမ်းမှုက အရမ်းဆိုးရွား ပြင်းထန်ပြီး တချို့ အလောင်းတွေဟာ ဘယ်သူဘယ်ဝါ သိရဖို့အတွက် DNA စစ်ဆေးမှုတောင် လုပ်ခဲ့ရကြောင်း သိရပါတယ်။ သမ္မတ အာဖန်အလီကတော့ အခု မီးလောင်မှုဟာ နိုင်ငံအတွက် အထူးကြေကွဲစရာ ကပ်ဘေးကြီး တစ်ခုလို့ ပြောကြားသွားပါတယ်။
