တရုတ် စစ်လေယာဉ် တစ်စီးဟာ ဂျပန် လေပိုင်နက်ထဲကို ကျူးကျော် ဝင်ရောက်ခဲ့တယ်လို့ ဂျပန်က စွပ်စွဲပြီး အပြင်းအထန် ကန့်ကွက်ခဲ့ပါတယ်။
တရုတ်ရဲ့ Y-9 အမျိုးအစား ကင်းထောက် လေယာဉ်ဟာ ဩဂုတ် ၂၆ ရက် မနက်ပိုင်းက ဂျပန်ပိုင် ဒွန်ဂျို ကျွန်းစုရဲ့ လေပိုင်နက်ထဲကို ၂ မိနစ်လောက် ဖြတ်ပျံခဲ့တယ်လို့ ဂျပန် ပြည်စောင့်တပ်က ပြောပါတယ်။
အဲဒီအတွက် ပြည်စောင့်တပ်ရဲ့ တိုက်လေယာဉ်တွေဟာ အရေးပေါ် ပျံတက်သွားပြီး အခြေအနေကို စောင့်ကြည့်ခဲ့ရတယ်လို့လည်း ဆိုပါတယ်။
ဒါဟာ ဂျပန် လေပိုင်နက်ထဲကို တရုတ် စစ်လေယာဉ်တစ်စီး ကျူးကျော် ပျံသန်းတဲ့ ပထမဆုံး ဖြစ်စဉ်လို့ သတ်မှတ်နိုင်ပြီး ဂျပန် နိုင်ငံခြားရေး ဝန်ကြီးဌာနဟာ တိုကျိုမြို့မှာရှိတဲ့ တရုတ်သံရုံးဆီ ချက်ချင်း ဆက်သွယ် ကန့်ကွက်ခဲ့တယ်လို့ သိရပါတယ်။
Public Service Announcement
တရုတ်ဟာ အာရှ အရှေ့ပိုင်း ရေပြင်မှာ အမေရိကန် ဦးဆောင်တဲ့ မဟာမိတ်တွေကို ယှဉ်ပြိုင်ဖို့ အားထုတ်မှုတွေ အရှိန်မြှင့်တင်လာပြီး ဒေသတွင်း တင်းမာမှုတွေ ဖြစ်ပေါ်နေချိန်မှာ အခုကိစ္စမျိုး ကြုံတွေ့လာတာပါ။
တရုတ်ကတော့ ဂျပန် လေပိုင်နက်ထဲ ကျူးကျော်ခဲ့တယ်ဆိုတဲ့ စွပ်စွဲချက်အပေါ် တိတိကျကျ မှတ်ချက်ပေး တုံ့ပြန်တာမျိုး မရှိသေးပါဘူး။
ဂျပန် တိုက်လေယာဉ်တွေဟာ တရုတ် ကင်းထောက် လေယာဉ်ကို ဆက်သွယ် သတိပေးပြီး ထွက်ခွာစေခဲ့ကြောင်း၊ ဒီဖြစ်ရပ်မှာ မီးကျည်တွေ ကြဲချပြီး ခြိမ်းခြောက်တာမျိုး ကိစ္စတွေနဲ့ စစ်လက်နက်တွေ သုံးစွဲတာမျိုး မရှိခဲ့ကြောင်း ဂျပန်ဖက်က ထုတ်ပြန်ထားပါတယ်။
ဂျပန်ဟာ အရှေ့တရုတ် ပင်လယ်အတွင်း ရေပိုင်နက် အငြင်းပွားနေရာ ဆန်ကာကူ ကျွန်းစု တဝိုက်မှာ တရုတ် ကမ်းခြေစောင့်တပ်နဲ့ ရေတပ်ရဲ့ ပိုမို ဖြန့်ကျက် လှုပ်ရှားလာမှုကိုလည်း စိုးရိမ်တကြီး စောင့်ကြည့်နေကြောင်း သိရပါတယ်။
ကိုးကား: Reuters
