ပျံသန်းနေချိန် လေယာဉ်မှူး သေဆုံးမှုကြောင့် ခရီးသည်တင် လေယာဉ်တစ်စီး အမေရိကန်မှာ အရေးပေါ် ဆင်းသက်ခဲ့ရပါတယ်။
တူရကီ လေကြောင်းလိုင်းရဲ့ ခရီးစဉ်အမှတ် TK204 လေယာဉ်ဟာ အမေရိကန်ရဲ့ ဆီယက်တဲလ်မြို့ကနေ အောက်တိုဘာ ၈ ရက် ညပိုင်းမှာ ပျံတက်ခဲ့ပြီး တူရကီရဲ့ အစ္စတန်ဘူလ်မြို့ဆီ ဦးတည်ခဲ့ပါတယ်။ ဒါပေမဲ့ လေထဲမှာ ရှိနေတဲ့ အချိန်မှာပဲ လေယာဉ်မှူးဟာ ဖြူဖျော့လာပြီး သေဆုံးသွားတာကြောင့် တွဲဖက်လေယာဉ်မှူးက လေယာဉ်ကို ထိန်းသိမ်းမောင်းနှင်ပြီး နယူးယောက်မြို့မှာရှိတဲ့ ဂျွန်အက်ဖ်ကနေဒီ လေဆိပ်မှာ အောက်တိုဘာ ၉ ရက် မနက်အစောပိုင်းက အရေးပေါ် ဆင်းသက်ခဲ့ရတာ ဖြစ်ပါတယ်။ အဲဒီလေယာဉ်ပေါ်မှာ ခရီးသည် ဘယ်နှဦး စီးနင်းလိုက်ပါလာခဲ့သလဲ ဆိုတာကိုတော့ မသိရသေးပါဘူး။
လေယာဉ် ပျံသန်းနေဆဲ အချိန်အတောအတွင်းမှာတင် လေယာဉ်မှူးဟာ ပြိုလဲကျသွားကြောင်း၊ ရှေးဦးသူနာပြု နည်းတွေနဲ့ သူ့ကို ကုသပေးမှုတွေလည်း မအောင်မြင်ခဲ့ကြောင်း၊ အခြေအနေအရ လေယာဉ်ကို အရေးပေါ် ဆင်းသက်ဖို့ လေယာဉ် အမှုထမ်းတွေက ဆုံးဖြတ်ခဲ့ပြီး နယူးယောက်မှာ မဆင်းသက်ခင် ကတည်းက လေယာဉ်မှူး ကွယ်လွန်သွားကြောင်း လေကြောင်းလိုင်း ပြောရေးဆိုခွင့်ရ အရာရှိ ယာယာ အူစတန်က လူမှုကွန်ရက် မီဒီယာ Xမှာ ရေးသားထားခဲ့ပါတယ်။
Public Service Announcement
Airbus A350 အမျိုးအစား လေယာဉ်ကို မောင်းနှင်ရင်း ရုတ်တရက် ကွယ်လွန်သွားသူဟာ ၂၀၀၇ ခုနှစ်ကတည်းက လေကြောင်းလိုင်းအတွက် အလုပ်လုပ်နေခဲ့သူ အသက် ၅၉ နှစ်အရွယ် လေယာဉ်မှူး အီလ်ချီဟင် ပီဟ်လီဗန်ဖြစ်တယ်လို့ လေကြောင်းလိုင်းက ထုတ်ပြန်ပါတယ်။ သူ့ကို မတ်လတုန်းက နောက်ဆုံးအကြိမ် ပုံမှန် ဆေးစစ်မှုတွေ လုပ်ဆောင်ခဲ့ပြီး ဘာကျန်းမာရေး ပြဿနာမှ မတွေ့ခဲ့ရဘူးလို့ ဆိုပါတယ်။ လေယာဉ်မှူး ရုတ်တရက် သေဆုံးရတဲ့ အကြောင်းရင်းကိုတော့ တိတိကျကျ မသိရသေးပါဘူး။
ဇူလိုင်လတုန်းကလည်း easyJetရဲ့ တွဲဖက်လေယာဉ်မှူးဟာ ဗြိတိန်နိုင်ငံ လန်ဒန်မြို့ကနေ ပေါ်တူဂီနိုင်ငံ လစ္စဘွန်းမြို့ဆီ ပျံသန်းနေတဲ့အချိန် ဖြူဖျော့ပြီး နာမကျန်း ဖြစ်ခဲ့ပါတယ်။ ခရီးသည် ၁၉၃ ဦး လိုက်ပါခဲ့တဲ့ လေယာဉ်ဟာ လစ္စဘွန်းမှာ ချောချောမောမော ဆင်းသက်နိုင်ခဲ့ပြီး တွဲဘက်လေယာဉ်မှူးကို ဆန်တာမာရီယာ ဆေးရုံဆီ ချက်ချင်း အရေးပေါ် ပို့ဆောင်ခဲ့ကြရပါတယ်။
ကိုးကား: Guardian
