ကုလသမဂ္ဂရဲ့ ပါလက်စတိုင်းဆိုင်ရာ အေဂျင်စီကို ပိတ်ပင်ဖို့ အစ္စရေး လွှတ်တော် အတည်ပြု

အစ္စရေးရဲ့ ဥပဒေပြု လွှတ်တော်မှာ အောက်တိုဘာ ၂၈ ရက်နေ့တုန်းက မဲခွဲဆုံးဖြတ်မှုမှာတော့ ကုလသမဂ္ဂရဲ့ ပါလက်စတိုင်း ဒုက္ခသည်များဆိုင်ရာ ကူညီရေး လုပ်ငန်း အေဂျင်စီ (UNRWA)ကို အစ္စရေး မြေပေါ်မှာ လုပ်ငန်းလည်ပတ်ခွင့် ပိတ်ပင်ဖို့ အမတ်တွေက ၉၂ မဲ၊ ၁၀ မဲနဲ့ အတည်ပြု ဆုံးဖြတ်ခဲ့ပါတယ်။

အခုဥပဒေကို အတည်ပြုနိုင်ခဲ့ခြင်းနဲ့အတူ အစ္စရေး မြေပေါ်မှာ UNRWAရဲ့ လှုပ်ရှားမှုတွေ တားမြစ်ဖို့ ဆုံးဖြတ်လိုက်ကြောင်း အစ္စရေး ဥပဒေပြု လွှတ်တော်က လူမှုကွန်ရက် မီဒီယာ Xပေါ်မှာ ဟီးဘရူး ဘာသာနဲ့ ရေးသား ကြေညာခဲ့ပါတယ်။

အစ္စရေးဟာ UNRWAနဲ့ သံတမန်ရေး အဆက်အသွယ် ဖြတ်တောက်ပစ်ရေး အဆိုပြုထားတဲ့ ဥပဒေကြမ်း တစ်ခုဟာလည်း လွှတ်တော်မှာ အတည်ပြုချက် ရရှိခဲ့ကြောင်း AP သတင်းဌာနက ဖော်ပြခဲ့ပါတယ်။

အစ္စရေးဟာ အရင်ကတည်းက UNRWAအပေါ် တင်းမာတဲ့ သဘောထားတွေ ပြသခဲ့ရာကနေ အခုတော့ နိုင်ငံပိုင်နက်ထဲမှာ အခြေစိုက်ခွင့်ကိုပါ ဖယ်ရှားပစ်ဖို့ ခြေတစ်လှမ်း တိုးလိုက်တဲ့ သဘောပါပဲ။ ဥပဒေဟာ ၃ လအတွင်း အသက်ဝင်လာမှာ ဖြစ်တာကြောင့် နောက်ထပ် ရက်ပေါင်း ၉၀ အတွင်း UNRWAဟာ အစ္စရေးကနေ ထွက်ခွာရဖွယ် ရှိနေပါတယ်။

Public Service Announcement

အစ္စရေး ဝန်ကြီးချုပ် ဘင်ဂျမင် နေတန်ညာဟုက အကြမ်းဖက်သမားတွေဟာ UNRWA ဝန်ထမ်းတွေအဖြစ် အသွင်ယူ ခိုအောင်းနေတာတွေ ရှိခဲ့ကြောင်း၊ လူသားချင်း စာနာမှု လုပ်ငန်းတွေက အရေးကြီးတယ်ဆိုတာ သဘောပေါက်ကြောင်း၊ ဒါကြောင့် ဂါဇာ ကမ်းမြှောင်ဒေသမှာတော့ ဒုက္ခသည်တွေကို ကူညီထောက်ပံ့ပေးတဲ့ လုပ်ငန်းတွေက ပုံမှန်အတိုင်း ဆက်လက် လည်ပတ်နေစေမှာဖြစ်ကြောင်း Xမှာ ရေးသားခဲ့ပါတယ်။

ဟားမားစ် ပြောက်ကျား တပ်ဖွဲ့ဝင်တွေဟာ UNRWA ဝန်ထမ်းတွေအဖြစ် အလုပ်လုပ်နေပြီး မနှစ်တုန်းက အောက်တိုဘာလမှာ အစ္စရေး ပိုင်နက်ထဲ ဟားမားစ်တွေ ကျူးကျော် စစ်ပြုခဲ့တုန်းက အဲဒီ ဝန်ထမ်းတွေပါ စိတ်တူကိုယ်တူ ပါဝင်ခဲ့ကြောင်း အစ္စရေးက အထောက်အထားတွေ ထုတ်ပြပြီး စွပ်စွဲထားပါတယ်။

UNRWAရဲ့ အကြီးအကဲ ဖိလစ် လက်ဇာရီနီကတော့ အစ္စရေး ဥပဒေပြု လွှတ်တော်ရဲ့ မဲခွဲဆုံးဖြတ်ချက်ဟာ မျှော်လင့်မထားသလို ဖြစ်လည်းမဖြစ်သင့်တဲ့ ကိစ္စတစ်ခုလို့ ဝေဖန်သွားပါတယ်။ အစ္စရေးရဲ့ ဆုံးဖြတ်ချက်ဟာ ကုလသမဂ္ဂ ကြေညာစာတမ်းနဲ့ ဆန့်ကျင်နေသလို နိုင်ငံတကာ ဥပဒေတွေကို လေးစားလိုက်နာပါမယ်ဆိုတဲ့ အစ္စရေးရဲ့ ကတိကဝတ်တွေကို ချိုးဖောက်ရာ ရောက်နေတယ်လို့လည်း လက်ဇာရီနီက Xမှာ ရေးသားထားခဲ့ပါတယ်။

ကိုးကား: The Hill