အဂတိကို စုပေါင်း တိုက်ဖျက်ပေးကြဖို့ တရုတ် သမ္မတ ရှီကျင့်ဖျင်က တရုတ်စစ်တပ်ကို တိုက်တွန်း ပြောကြားလိုက်ပါတယ်။
တရုတ် ပြည်သူ့ လွတ်မြောက်ရေးတပ် (PLA)ဟာ တိုက်ပွဲတွေကို အနိုင်ယူနိုင်တဲ့ စွမ်းရည်မျိုး ပိုင်ဆိုင်ရေးကို ဦးစားပေး အာရုံစိုက်ရင်း တစ်ဖက်မှာလည်း အဂတိတွေကို တိုက်ဖျက် ချေမှုန်းသင့်တယ်လို့ ရှီက ဒီဇင်ဘာ ၄ ရက်နေ့မှာ တိုက်တွန်းစကား ဆိုခဲ့တာပါ။
ရှီဟာ အာဏာရ ကွန်မြူနစ်ပါတီ (CCP)ရဲ့ အကြီးအကဲ နေရာနဲ့ သမ္မတ တာဝန်တွေကို စတင်ရယူချိန် ကတည်းက အစိုးရတွင်းနဲ့ စစ်တပ်ထဲက အဂတိ တိုက်ဖျက်ရေး ကိစ္စတွေကို အင်တိုက်အားတိုက် ဆောင်ရွက်ခဲ့ပါတယ်။ တစ်ဖက်မှာလည်း သူဟာ အဲဒီ ကိစ္စကို အကြောင်းပြပြီး နိုင်ငံရေး ပြိုင်ဘက်တွေကို ရှင်းလင်း ဖယ်ရှားခဲ့တယ်ဆိုတဲ့ စွပ်စွဲချက်တွေလည်း ရှိနေပါတယ်။
PLAရဲ့ သတင်းအချက်အလက် ထောက်ပံ့ရေးတပ်ရဲ့ တပ်ဖွဲ့ဝင်တွေနဲ့ ဒီဇင်ဘာ ၄ ရက်နေ့က တွေ့ဆုံချိန်မှာ ရှီက PLA အနေနဲ့ စည်းကမ်းလေးစား လိုက်နာမှု အပိုင်းမှာ အင်တိုက်အားတိုက် အရှိန်မြှင့် လုပ်ဆောင်သင့်တယ်လို့လည်း မှတ်ချက်ပေးခဲ့ပါတယ်။
Public Service Announcement
PLAအပေါ် သစ္စာရှိမှု၊ အမြင်ရှင်းမှု၊ ယုံကြည်လေးစားမှုတွေကို ရေရှည် တည်မြဲအောင် ထိန်းသိမ်းဖို့အတွက် စစ်တပ်ဟာ အဂတိ ကိစ္စတွေကို တိုက်ဖျက်ပစ်ရမယ်လို့လည်း ရှီက ပြောပါတယ်။
PLAဟာ သတင်းအချက်အလက် ထောက်ပံ့ရေးတပ် ဖွဲ့စည်းထူထောင်မယ် ဆိုတာကို ဧပြီလမှာ ကြေညာခဲ့ပြီး လေ့လာသူတွေကတော့ PLAရဲ့ ဆိုက်ဘာ၊ သတင်းအချက်အလက်၊ သယ်ယူပို့ဆောင်ရေးနဲ့ အာကာသ စင်ဆင်ရေးဆိုင်ရာ မဟာဗျူဟာ ပြင်ဆင်ပြောင်းလဲရေး ခြေလှမ်းတစ်ရပ်လို့ သုံးသပ်ကြပါတယ်။
PLA အနေနဲ့ အဂတိ တိုက်ဖျက်ရေးကို အလေးထား လုပ်ဆောင်ရမှာ ဖြစ်သလို အရေးအကြီးဆုံး လိုအပ်ချက်ကတော့ တိုက်ပွဲတွေကို တိုက်ခိုက်နိုင်တဲ့၊ ပြီးတော့ အနိုင်ယူနိုင်တဲ့ အရည်အသွေး ဖြစ်တယ်လို့လည်း ရှီက ပြောကြားသွားပါတယ်။
ကိုးကား: CNA
