ဆီးရီးယား တော်လှန်ရေး တပ်တွေဟာ ကွယ်လွန်သူ အာဏာရှင်ဟောင်း ဟာဖက်ဇ် အယ်လ် အာဆတ်ရဲ့ ဂူသင်္ချိုင်းကို မီးရှို့ ဖျက်ဆီးပစ်ခဲ့ပါတယ်။
ဟာဖက်ဇ် အယ်လ်အာဆတ်ဟာ ဒီဇင်ဘာ ၈ ရက်နေ့က တော်လှန်ရေး ပူးပေါင်းတပ်တွေ မြို့တော် ဒမတ်စကက်ကို ဝင်ရောက်မသိမ်းပိုက်ခင် နာရီပိုင်း အလိုမှာ ရုရှားကို ထွက်ပြေး တိမ်းရှောင်သွားခဲ့တဲ့ သမ္မတဟောင်း ဘာရှာ အယ်လ်အာဆတ်ရဲ့ ဖခင်လည်း ဖြစ်ပါတယ်။ အာဆတ် မိသားစုဟာ ဆီးရီးယားကို ရက်စက်ကြမ်းကြုတ်လှတဲ့ နည်းလမ်းတွေနဲ့ ၅၄ နှစ်ကြာအောင် မျိုးဆက်နှစ်ခုပြောင်း အုပ်ချုပ်ခဲ့ပေမယ့် အခုတော့ ထွက်ပြေး တိမ်းရှောင်ရတဲ့ အဆင့်ကို ရောက်သွားပါပြီ။
ဒီဇင်ဘာ ၁၁ ရက်နေ့မှာတော့ ဆီးရီးယား တော်လှန်ရေး တပ်တွေဟာ အာဆတ် မိသားစုရဲ့ ဇာတိဖြစ်တဲ့ လာကက်တီယာ ဒေသထဲက ကွာဒါဟာမြို့က ဂူဗိမာန်ထဲမှာ တခမ်းတနား ထားရှိတဲ့ ဂူသင်္ချိုင်း နေရာကို မီးရှို့ဖျက်ဆီးပစ်ခဲ့တာ ဖြစ်ပါတယ်။ လက်နက်ကိုင် အမျိုးသားတွေဟာ မီးစွဲလောင်နေတဲ့ သင်္ချိုင်းနေရာနားမှာ လှည့်ပတ်ပြီး အောင်ပွဲခံ ကြွေးကြော်နေတာကို ဗီဒီယိုတွေထဲမှာ တွေ့နေခဲ့ရပါတယ်။ ပြီးတော့ ဂူဗိမာန် အဆောက်အအုံကြီးထဲကနေ မီးခိုးတွေ အူထွက်နေတာကိုလည်း အဝေးကနေ မြင်ခဲ့ရပါတယ်။
ဆီးရီးယား နိုင်ငံအနှံ့မှာ စိုက်ထူထားတဲ့ အာဆတ် သားအဖရဲ့ ရုပ်တုတွေ၊ ပိုစတာတွေကိုလည်း ပြည်သူတွေနဲ့ တော်လှန်ရေး တပ်တွေက ဖျက်ဆီးပစ်နေကြတာ တွေ့ရပါတယ်။
Public Service Announcement
၂၀၁၁ ခုနှစ်က ဆီးရီးယားမှာ ပြည်သူလူထုရဲ့ ဒီမိုကရေစီရေး တောင်းဆိုလှုပ်ရှားမှုကြီး စတင်လာပြီး အာဆတ်က ကြမ်းကြမ်းတမ်းတမ်း ဖြိုခွင်းခဲ့ရာကနေ ပြည်တွင်းစစ်မီး စတင် တောက်လောင်ခဲ့ပါတယ်။ အစောပိုင်းမှာ ဆီးရီးယား အစိုးရဟာ မဟာမိတ် ရုရှား၊ အီရန်တို့ရဲ့ အကူအညီကြောင့် တော်လှန်ရေး အင်အားစုတွေကို ချိုးနှိမ်ထားနိုင်ခဲ့ပေမယ့် နိုဝင်ဘာ လဆန်းမှာ တော်လှန်ရေးတပ်တွေ ပူးပေါင်းပြီး အစပြုလာတဲ့ ထိုးစစ်ဒဏ်ကို မခံနိုင်ဘဲ ၁၂ ရက်အတွင်း အစိုးရ ပြိုလဲသွားခဲ့တာ ဖြစ်ပါတယ်။
ကွယ်လွန်သူ သမ္မတဟောင်း ဟာဖက်ဇ်ဟာ ဆီးရီးယားကို ၁၉၇၁ ခုနှစ်ကနေ သူသေဆုံးချိန် ၂၀၀၀ ပြည့်နှစ်ထိ အုပ်စိုးခဲ့ပြီး အဲဒီနှစ်မှာပဲ သားဖြစ်တဲ့ သမ္မတ အာဆတ်က အရိုက်အရာ ဆက်ခံခဲ့တာ ဖြစ်ပါတယ်။
ကိုးကား: BBC
