တရုတ်မှာ ကျင်းပမယ့် စစ်ရေး စစ်ရေးပြ ချီတက်ပွဲကြီးကို မြောက်ကိုရီးယားခေါင်းဆောင် ကင်မ်ဂျုံအွန်း၊ ရုရှားသမ္မတ ဗလာဒီမာ ပူတင်တို့ တက်ရောက်ကြမှာ ဖြစ်ပါတယ်။
ဒုတိယ ကမ္ဘာစစ်မှာ ဂျပန်တပ်တွေကို အောင်ပွဲခံမှု နှစ် ၈၀ ပြည့် အထိမ်းအမှတ်အဖြစ် အောင်ပွဲနေ့ ချီတက်ပွဲတွေကို ဘေဂျင်းမြို့တော်ရဲ့ တီယန်နန်မင် ရင်ပြင်မှာ ကျင်းပမယ်လို့ တရုတ်က ကြေညာထားပါတယ်။ အဲဒီ ချီတက်ပွဲကို တရုတ်နဲ့ ဆက်ဆံရေး နီးကပ်တဲ့ နိုင်ငံတွေရဲ့ ခေါင်းဆောင်တွေ၊ ကိုယ်စားလှယ်တွေ တက်ရောက်ကြမှာပါ။
သာမန်အားဖြင့် ပြည်တွင်းကနေ ထွက်လေ့သိပ်မရှိတဲ့ မြောက်ကိုရီးယားခေါင်းဆောင် ကင်မ်ဟာလည်း အဲဒီ အခမ်းအနားအတွက် လာမယ့် သီတင်းပတ်မှာ ဘေဂျင်းကို ရောက်ရှိနေမယ်လို့ ထုတ်ပြန်ခဲ့ပါတယ်။ ကင်မ်မတိုင်ခင်မှာ ပူတင်ကလည်း ဘေဂျင်းကို သွားမယ့်အကြောင်း အတည်ပြုထားပြီး ဖြစ်ပါတယ်။
နိုင်ငံတကာအရေး စောင့်ကြည့်လေ့လာသူတွေက အဲဒီ အခမ်းအနားဟာ တရုတ် သမ္မတ ရှီကျင့်ဖျင် အနေနဲ့ တရုတ်ကို ကမ္ဘာ့အခင်းအကျင်း အသစ်တွေမှာ ဦးဆောင်မှုနေရာ ရယူဖို့ အားထုတ်နေခြင်းရဲ့ သံတမန်ရေး စည်းရုံးမှု တစ်ခုအဖြစ် သုံးသပ်နေကြပါတယ်။
Public Service Announcement
မြောက်ကိုရီးယား ခေါင်းဆောင်တစ်ဦးက တရုတ်ရဲ့ စစ်ရေးပြ ချီတက်ပွဲတစ်ခုကို တက်ရောက်တယ် ဆိုတာဟာ ၁၉၅၉ ခုနှစ်နောက်ပိုင်း ပထမဆုံး ဖြစ်လာမယ်လို့လည်း သိရပါတယ်။
အဲဒီ ချီတက်ပွဲမှာ တရုတ်ဟာ အရင်က လူမြင်ကွင်းရှေ့ ဘယ်တုန်းကမှ ထုတ်မပြဖူးတဲ့ စစ်လက်နက် စနစ်တွေကိုပါ ပွဲထုတ် ပြသလာမယ်လို့ သတင်းထွက်နေပါတယ်။ ပြီးတော့ တိုက်လေယာဉ်တွေ၊ တင့်ကားတွေ၊ ဒရုန်းစနစ်တွေ ရာနဲ့ချီ ပါဝင်တဲ့ ကြိုတင် လေ့ကျင့်မှု အစီအစဉ်တွေကိုလည်း လုပ်ဆောင်နေပါတယ်။
မိနစ် ၇၀ ကြာ ချီတက်ပွဲကို ရှီကိုယ်တိုင် ကြီးမှူးမှာဖြစ်ပြီး နိုင်ငံတကာ စစ်ရေးသုတေသီတွေနဲ့ အနောက်နိုင်ငံတွေကလည်း စောင့်ကြည့်ကြဖွယ် ရှိပါတယ်။
တရုတ်ဟာ အလားတူ အင်အားအလုံးအရင်းနဲ့ စစ်ရေးပြ ချီတက်မှုမျိုးကို ၂၀၁၅ တုန်းက နောက်ဆုံးအကြိမ် ပြုလုပ်ခဲ့ဖူးပါတယ်။ အဲဒီတုန်းကတော့ တရုတ်ရဲ့ အောင်ပွဲနေ့ ချီတက်ပွဲကို ကင်မ်က ကိုယ်တိုင် မတက်ရောက်ဘဲ သူ့ရဲ့ ထိပ်တန်း အရာရှိ တစ်ဦးဖြစ်သူ ချိုရောင်ဟေးကိုပဲ ကိုယ်စားလှယ်အဖြစ် စေလွှတ်ခဲ့ဖူးပါတယ်။
ကိုးကား: BBC
