ကမ္ဘာပေါ်မှာ အမြင့်ဆုံးအဖြစ် စံချိန်တင်မယ့် တံတားအသစ်ကို တရုတ်နိုင်ငံမှာ စတင်ဖွင့်လှစ်လိုက်ပါတယ်။
နိုင်ငံတောင်ပိုင်းက တောင်ထူထပ်ရာ ကွေ့ကျိုး ပြည်နယ်ထဲမှာရှိတဲ့ ဟွာကျီအန်း တောင်ကြားဖြတ်ကျော် တံတားဟာ ဘေပန်မြစ်ရဲ့အထက် ၆၂၅ မီတာ အမြင့်မှာ ဖောက်လုပ်ထားတာပါ။ ကွေ့ကျိုး ပြည်နယ်ဟာ အမြင့် ၅၆၅ မီတာရှိတဲ့ ဘေပန်ကျိအန်း တံတား တည်ရှိတဲ့ ပြည်နယ်လည်း ဖြစ်ပါတယ်။ အခုတော့ အဲဒီတံတားဟာ ကမ္ဘာ့အမြင့်ဆုံး တံတားတွေ အဆင့်သတ်မှတ်ချက်မှာ ဒုတိယ နေရာကို ဆင်းပေးလိုက်ရပါပြီ။
တရုတ်အစိုးရ မီဒီယာက ဒရုန်းတွေနဲ့ ရိုက်ကူး ထုတ်လွှင့်ပြသခဲ့တဲ့ ဗီဒီယိုမှာတော့ တံတားအသစ်ကြီးပေါ်မှာ စက်တင်ဘာ ၂၈ ရက်နေ့ကစပြီး ယာဉ်တွေ ဖြတ်သန်း မောင်းနှင်နေတာကို တွေ့ခဲ့ရပါတယ်။
ဒီတံတားအသစ်ကြီးကြောင့် အရင်က ချောက်ကမ်းပါး နှစ်ဖက်ကြား ၂ နာရီကြာ သွားခဲ့ရတဲ့ ခရီးကို ၂ မိနစ်အတွင်း ရောက်အောင် သွားနိုင်တော့မယ်လို့ ပြည်နယ် သယ်ယူပို့ဆောင်ရေး ဌာန အကြီးအကဲ ကျန့်ရင်းက ပြောပါတယ်။
Public Service Announcement
အဲဒီ တံတားကြီးကို ၃ နှစ်လောက် အချိန်ယူ တည်ဆောက်ခဲ့ရတာလို့ တရုတ် အစိုးရပိုင် ရှင်ဟွာ သတင်းဌာနက ဖော်ပြခဲ့ပါတယ်။ ရှင်ဟွာရဲ့ အဆိုအရ ကမ္ဘာပေါ်မှာ ရှိတဲ့ အမြင့်ဆုံး တံတားအားလုံးရဲ့ ထက်ဝက်နီးပါးလောက်ဟာ ကွေ့ကျိုးပြည်နယ်ထဲမှာလို့ သိရပါတယ်။
ဟွာကျီအန်း တံတားရဲ့ ပင်မတံတား အစိတ်အပိုင်း ၁၄၂၀ မီတာ ရှည်လျားပြီး တောင်ပေါ်ဒေသမှာ ဆောက်လုပ်ထားတဲ့ ကမ္ဘာ့အကြီးဆုံး တံတားလို့လည်း သတ်မှတ်နိုင်ကြောင်း ရှင်ဟွာက ဖော်ပြခဲ့ပါတယ်။
အင်ဂျင်နီယာတွေဟာ ဩဂုတ်လတုန်းက တံတားပေါ်ကနေ ကုန်တင်ကားကြီး ၉၆ စီးကို ဖြတ်မောင်းစေပြီး တံတားရဲ့ ကြံ့ခိုင်မှုကို လက်တွေ့ စစ်ဆေးခဲ့ကြပါတယ်။
၄ လမ်းသွားကားလမ်းပါတဲ့ တံတားကြီးအတွက် တည်ဆောက်မှု ကုန်ကျစရိတ်ဟာ ယွမ်ငွေ ၂.၁ ဘီလီယံလောက် ရှိခဲ့တယ်လို့လည်း သိရှိရပါတယ်။
ကိုးကား: AFP
