အစ္စရေး ဝန်ကြီးချုပ် ဘင်ဂျမင် နေတန်ညာဟုကို လူမျိုးသုဉ်း သတ်ဖြတ်မှု စွပ်စွဲချက်နဲ့ တူရကီက ဖမ်းဝရမ်း ထုတ်လိုက်ပါတယ်။
တူရကီရဲ့ ဖမ်းဝရမ်းထဲမှာတော့ နေတန်ညာနဲ့ သူ့ရဲ့ ကာကွယ်ရေး ဝန်ကြီး အစ္စရေး ကတ်ဇ်တို့သာ မကဘဲ စုစုပေါင်း လူ ၃၇ ဦးရဲ့ နာမည်တွေ ပါဝင်နေပါတယ်။ အမျိုးသား လုံခြုံရေး ဝန်ကြီး အစ်တမာ ဘန်ဂျဗီနဲ့ စစ်ဦးစီးချုပ် ဒုတိယ ဗိုလ်ချုပ်ကြီး အီယဲလ်ဇာမားတို့လည်း ဝရမ်းထုတ်ခံခဲ့ကြရပါတယ်။
ဒါပေမဲ့ ဝရမ်းစာရင်းမှာ ပါဝင်တဲ့ နာမည် အားလုံးကိုတော့ အစ္စတန်ဘူလ်မြို့၊ အစိုးရရှေ့နေရုံးက မထုတ်ပြန်ခဲ့ပါဘူး။ တူရကီ အာဏာပိုင်တွေက အစ္စရေးဟာ ဂါဇာ ကမ်းမြှောင်ဒေသက စစ်ဆင်ရေးတွေမှာ လူမျိုးသုဉ်း သတ်ဖြတ်မှု၊ လူသားမျိုးနွယ်အပေါ် ရာဇဝတ်မြောက်တဲ့ ကျူးလွန်မှုတွေကို စနစ်တကျ လုပ်ဆောင်ခဲ့ကြောင်း စွပ်စွဲခဲ့ပါတယ်။
အစိုးရ ရှေ့နေရုံး ကြေညာချက်ထဲမှာတော့ ဂါဇာကမ်းမြှောင် ဒေသထဲမှာ တူရကီက ဆောက်လုပ်ပေးထားခဲ့တဲ့ တူရကီ-ပါလက်စတိုင်း ချစ်ကြည်ရေး ဆေးရုံကိုလည်း မတ်လမှာ အစ္စရေး ဗုံးကြဲဖျက်ဆီးခဲ့ကြောင်း ဖော်ပြထားပါတယ်။
Public Service Announcement
အစ္စရေးဖက်ကတော့ တူရကီရဲ့ ဖမ်းဝရမ်း ကိစ္စကို လူပြိန်းကြိုက် ပေါ်ပင်လုပ်တဲ့ စတန့်တစ်ခုလို့ တုံ့ပြန်ခဲ့ပါတယ်။ အစ္စ္စရေး နိုင်ငံခြားရေးဝန်ကြီး ဂီဒီယွန်ဆားရ်က အာဏာရှင် (တူရကီ သမ္မတ) ရာဂျစ်တာယစ် အာဒိုဝမ်ရဲ့ လူကြိုက်များရုံ အပေါ်ယံ စတန့်ထွင်တဲ့ လုပ်ရပ်ကို အစ္စရေး အပြင်းအထန် ရှုတ်ချကြောင်း လူမှုကွန်ရက် မီဒီယာ Xမှာ ရေးသားထားခဲ့ပါတယ်။
တူရကီဟာ မနှစ်တုန်းကလည်း အပြည်ပြည်ဆိုင်ရာ တရားရုံး (ICJ)မှာ အစ္စရေးကို လူမျိုးသုဉ်း သတ်ဖြတ်မှုအတွက် အမှုဖွင့်ထားတဲ့ တောင်အာဖရိကရဲ့ အားထုတ်မှုမှာ ပူးပေါင်းခဲ့ပါတယ်။
လက်ရှိမှာတော့ ဂါဇာမှာ အမေရိကန် သမ္မတ ဒေါ်နယ်လ်ထရမ့် ကြားဝင် ညှိနှိုင်းပေးထားတဲ့ သဘောတူညီမှု တစ်ခုအရ အောက်တိုဘာ ၁၀ ရက်နေ့ ကတည်းက အပစ်အခတ် ရပ်စဲနေပါတယ်။
ကိုးကား: Guardian
