အမေရိကန်မှာ ပျံသန်းနေတဲ့ ရဟတ်ယာဉ်နှစ်စီး တိုက်မိရာက လေယာဉ်မှူးတွေ သေဆုံးသွားခဲ့ကြောင်း သိရပါတယ်။
နယူးဂျာစီမှာ ဒီဇင်ဘာ ၂၈ ရက်နေ့တုန်းက လူ ၂ ဦး သေဆုံးတဲ့ လေကြောင်း မတော်တဆမှု ဖြစ်ခဲ့တာလို့ ဒေသခံ ရဲတပ်ဖွဲ့က ပြောပါတယ်။ သေဆုံးသူတွေဟာ ရဟတ်ယာဉ်တွေကို အသီးသီး ထိန်းချုပ် မောင်းနှင်နေခဲ့တဲ့ အသက် ၆၅ နှစ်အရွယ် ကန်းနက်သ် အယ်လ်ကာ့ချ်နဲ့ အသက် ၇၁ နှစ်အရွယ် မိုက်ကယ် ဂရင်းဘာ့ဂ်တို့ ဖြစ်ပါတယ်။ ရဟတ်ယာဉ်တွေပေါ်မှာ နောက်ထပ် ခရီးသည်တွေ လိုက်ပါခဲ့ခြင်းလည်း မရှိခဲ့ပါဘူး။
ရဟတ်ယာဉ်တွေဟာ ဟမ်မန်တန် မြို့နားက အဝေးပြေး လမ်းနားမှာ ပျက်ကျခဲ့တာ ဖြစ်ပါတယ်။ တစ်စီးကတော့ မြေပေါ် ပျက်ကျချိန် မီးစွဲလောင်သွားခဲ့ပြီး မီးသတ် တပ်ဖွဲ့တွေက အပူတပြင်း ငြှိမ်းသတ်ခဲ့ရပါတယ်။
Enstorm 280C အမျိုးအစား ရဟတ်ယာဉ်နဲ့ Enstrom F-28A အမျိုးအစား ရဟတ်ယာဉ်တို့ ဘာကြောင့် တိုက်မိခဲ့သလဲ ဆိုတာကိုတော့ လေကြောင်း လုံခြုံရေးဌာန တာဝန်ရှိသူတွေက စုံစမ်း စစ်ဆေးနေဆဲပါ။ နှစ်စီးစလုံးဟာ အပေါ့စား ရဟတ်ယာဉ် အမျိုးအစားတွေ ဖြစ်ပါတယ်။
Public Service Announcement
ဇန်နဝါရီလတုန်းကလည်း အမေရိကန်ရဲ့ ဝါရှင်တန်ဒီစီ မြို့တော်မှာ ခရီးသည်တင် လေယာဉ်တစ်စီးနဲ့ စစ်ဘက် ရဟတ်ယာဉ်တို့ ပျံသန်းရင်း တိုက်မိကြရာက လူ ၆၇ ဦး သေဆုံးခဲ့ပါတယ်။
ဒါပေမဲ့ ရဟတ်ယာဉ် မတော်တဆမှုတွေအတွင်း သေဆုံးသူ အရေအတွက်ကတော့ အမေရိကန်မှာ ပြီးခဲ့တဲ့ ၃ နှစ်ဆက်တိုက် ကျဆင်းလာနေတယ်လို့ ဖက်ဒရယ် လေကြောင်း စီမံကွပ်ကဲရေး ဌာနက ထုတ်ပြန်ထားပါတယ်။
ကိုးကား: BBC
ဓာတ်ပုံ – AP
