နီပါ ဗိုင်းရပ်စ် ကူးစက်မှုတွေကို အချိန်မီ ထိန်းချုပ်နိုင်ခဲ့ကြောင်း အိန္ဒိယပြော

နီပါ ဗိုင်းရပ်စ် ကူးစက်မှုတွေဟာ အချိန်မီ ထိန်းသိမ်းနိုင်တဲ့ အခြေအနေမှာ ရှိနေဆဲလို့ အိန္ဒိယ အာဏာပိုင်တွေက ပြောကြားခဲ့ပါတယ်။

ဒီဇင်ဘာလကစပြီး နိုင်ငံအရှေ့ပိုင်းမှာရှိတဲ့ အနောက် ဘင်္ဂလား ပြည်နယ်ထဲမှာ နီပါဗိုင်းရပ်စ် ကူးစက်ခံရတဲ့ လူနာနှစ်ဦးကို တွေ့ရှိထားပေမယ့် ကူးစက်မှုကို ထိထိရောက်ရောက် ဟန့်တားထားနိုင်ကြောင်း ဇန်နဝါရီ ၂၇ ရက်နေ့မှာ အိန္ဒိယ ကျန်းမာရေး ဝန်ကြီးဌာနက ထုတ်ပြန်ခဲ့ပါတယ်။

အစောပိုင်း သတင်းတွေက အိန္ဒိယမှာ နီပါလူနာ ၅ ဦး တွေ့ထားတယ်လို့ ဖော်ပြခဲ့ပေမယ့် နောက်ဆုံး ထုတ်ပြန်ချက်မှာတော့ ၂ ဦးသာ ရောဂါပိုး တွေ့ရှိခဲ့ပြီး သူတို့နဲ့ ထိတွေ့မိသူ ၂၀၀ နီးပါးလောက်ကို သီးသန့်ခွဲပြီး စစ်ဆေးကြည့်တဲ့အခါ ကူးစက်မှုအသစ် မတွေ့ဘူးလို့ ဆိုပါတယ်။

နီပါဗိုင်းရပ်စ်ဟာ တိရစ္ဆာန်တွေ၊ အထူးသဖြင့် လင်းနို့ကနေတဆင့် လူကို ကူးစက်လေ့ရှိပါတယ်။ လင်းနို့တွေ ထိတွေ့ထားတဲ့ သစ်သီးတွေကို လူတွေက သေချာသန့်စင် ဆေးကြောမှု မရှိဘဲ စားသောက်မိရင် အဲဒီဗိုင်းရပ်စ် ကူးစက်နိုင်ပါတယ်။ နီပါဗိုင်းရပ်စ်အတွက် ကာကွယ်ဆေးရော၊ ကုထုံးတွေပါ မရှိသေးဘဲ သေနှုန်းကလည်း ၄၀ ကနေ ၇၅ ရာခိုင်နှုန်းကြားလောက်ထိ မြင့်မားကြောင်း ကမ္ဘာ့ကျန်းမာရေး အဖွဲ့ကြီး (WHO)က ကြေညာထားပါတယ်။

Public Service Announcement

လူနာတွေ တွေ့ရှိတဲ့ ဧရိယာမှာ နိုးနိုးကြားကြား စောင့်ကြည့်မှုတွေ၊ ဓာတ်ခွဲ စစ်ဆေးမှုတွေကို အရှိန်မြှင့်ထားပြီး ကွင်းဆင်း စစ်ဆေးမှုတွေလည်း စတင်နေပြီဖြစ်ကြောင်း၊ အဲဒီ အားထုတ်မှုတွေကြောင့်လည်း ကူးစက်မှုတွေကို အချိန်မီ ကန့်သတ် ထိန်းချုပ်နိုင်ခဲ့ကြောင်း အိန္ဒိယ ကျန်းမာရေး ဝန်ကြီးဌာနက ဆိုပါတယ်။ ရောဂါ ကူးစက်ထားတဲ့ လူနာနှစ်ဦးရဲ့ အခြေအနေကိုတော့ အသေးစိတ် မထုတ်ပြန်ခဲ့ပါဘူး။

နီပါဗိုင်းရပ်စ်ကို ၁၉၉၈ ခုနှစ်တုန်းက မလေးရှားမှာရှိတဲ့ ဝက်မွေးခြံတွေထဲမှာ ပထမဆုံးအကြိမ် အတည်ပြု တွေ့ရှိခဲ့ပါတယ်။ ၂၀၁၈ တုန်းက အိန္ဒိယရဲ့ ကီရာလာ ပြည်နယ်မှာ အဲဒီဗိုင်းရပ်စ်ကြောင့် လူ ၁၇ ဦးခေဲ့ပြီး ၂၀၂၃ မှာတော့ အဲဒီပြည်နယ်မှာပဲ ၂ ဦး ထပ်သေခဲ့ပါတယ်။

နီပါဗိုင်းရပ်စ် ကူးစက်ခံရရင် အပြင်းဖျားတာ၊ အော့အန်တာ၊ အလွန်အကျွံ ကိုက်ခဲတာ၊ အသက်ရှူလမ်းကြောင်း ပြဿနာတွေ ရှိတာမျိုး ကြုံရနိုင်ပြီး ရောဂါပြင်းရင်တော့ တက်တာ၊ ဦးနှောက်ရောင်တာတွေနဲ့ နောက်ဆုံး အသက်ဆုံးရှုံးတဲ့ထိ ဖြစ်နိုင်ပါတယ်။

လူအချင်းချင်း ရောဂါကူးစက်တဲ့ ရှားပါးဖြစ်စဉ် တချို့ကို မှတ်တမ်းတွေ့ရှိဖူးပေမယ့် သစ်သီးစား လင်းနို့တွေဟာ ကူးစက်မှုတွေရဲ့ အဓိက အကြောင်းရင်းအဖြစ် ရှိနေဆဲလို့လည်း သိရပါတယ်။

ကိုးကား: AFP

ဓာတ်ပုံ – AFP