ဘင်္ဂလားဒေ့ရှ် ဝန်ကြီးချုပ်သစ် တာရစ်ရာမန်ဟာ တရုတ်နိုင်ငံ၊ ဘေဂျင်းမြို့တော်မှာ အိမ်ရှင်နိုင်ငံ သမ္မတ ရှီကျင့်ဖျင်နဲ့ တွေ့ဆုံခဲ့ပါတယ်။
ဇွန်လ ၂၆ ရက်နေ့ မနက်ပိုင်းက ဘေဂျင်းရဲ့ ပြည်သူ့ခန်းမဆောင်ကြီးမှာ ရှီက ရာမန်ကို လက်ခံ တွေ့ဆုံခဲ့ကြောင်း ဘင်္ဂလားဒေ့ရှ်ရဲ့ အာဏာရ အမျိုးသားပါတီ (BNP)က ထုတ်ပြန်ခဲ့ပါတယ်။ တရုတ်နိုင်ငံကို ရောက်ရှိနေတဲ့ ရာမန်ဟာ အစောပိုင်းတုန်းကလည်း အဲဒီခန်းမဆောင်မှာပဲ တရုတ် အမျိုးသား ပြည်သူ့ညီလာခံရဲ့ ဥက္ကဋ္ဌ ချောင်လိကျီနဲ့ တွေ့ဆုံ ဆွေးနွေးခဲ့ပါသေးတယ်။
ရာမန်ဟာ သူ့ရဲ့ ဝန်ကြီးချုပ်ဘဝ ပထမဆုံး ပြည်ပခရီးစဉ်ရဲ့ အစိတ်အပိုင်းအဖြစ် တရုတ်နိုင်ငံဆီ သွားရောက်ခဲ့တာ ဖြစ်ပါတယ်။ ဘေဂျင်းကို ရောက်ရှိခဲ့ချိန်မှာတော့ ရာမန်ဟာ ရှီနဲ့ ချောင်တို့အပြင် တရုတ်ဝန်ကြီးချုပ် လီကျန်းနဲ့ပါ တွေ့ဆုံခဲ့ပါတယ်။ ရာမန်ကို တရုတ်နိုင်ငံဆီ လာရောက်လည်ပတ်ဖို့ လီက ဖိတ်ကြားခဲ့တာပါ။
ဖေဖော်ဝါရီ လလယ်မှာ ဘင်္ဂလားဒေ့ရှ် ဝန်ကြီးချုပ်သစ် ဖြစ်လာတဲ့ ရာမန်ဟာ ဇွန်လ ၂၁ ရက်နေ့မှာ ဘင်္ဂလားဒေ့ရှ်ကို သွားရောက်ခဲ့ပြီး အဲဒီကနေတဆင့် ဇွန်လ ၂၂ ရက်နေ့ ညပိုင်းမှာတော့ ကမ္ဘာ့စီးပွားရေး ဖိုရမ် အစည်းအဝေး တက်ရောက်ဖို့ တရုတ်နိုင်ငံရဲ့ ဒါလီယန်မြို့ဆီ ရောက်ရှိခဲ့ပါတယ်။ နှစ်ရက်ကြာ ဆွေးနွေးမှုတွေ အပြီးမှာတော့ သူဟာ ဇွန်လ ၂၄ ရက်နေ့တုန်းက ဘေဂျင်းကို ဆိုက်ရောက်လာခဲ့တာ ဖြစ်ပါတယ်။
Public Service Announcement
သူ့ရဲ့ တရုတ်နိုင်ငံ ခရီးစဉ် အတောအတွင်း ရာမန်ဟာ ပြည်တွင်း အခြေခံ အဆောက်အအုံ ပရောဂျက်တွေမှာ တရုတ် ရင်းနှီးမြှုပ်နှံမှုတွေ မြှင့်တင်ဖို့ အပါအဝင် နှစ်နိုင်ငံ ပူးပေါင်းဆောင်ရွက်ရေး သဘောတူညီမှု တစ်ဒါဇင်ကျော်လောက်ကို လက်မှတ် ရေးထိုးခဲ့ပါတယ်။
ဘင်္ဂလားဒေ့ရှ်ဟာ ဝန်ကြီးချုပ်ဟောင်း ရှိတ်ခ်ဟာဆီနာ လက်ထက်တုန်းက အိမ်နီးချင်း အိန္ဒိယ နိုင်ငံနဲ့ ပိုမိုနီးကပ်တဲ့ ဆက်ဆံရေးမျိုး ရှိခဲ့ပါတယ်။ ဒါပေမဲ့ လူထုအုံကြွမှုကြောင့် ရာထူးကနေ ပြုတ်ကျသွားတဲ့ ဟာဆီနာကို အိန္ဒိယက ခိုလှုံခွင့် ပေးထားခဲ့တဲ့နောက် လက်ရှိ ဘင်္ဂလားဒေ့ရှ် အစိုးရနဲ့ အိန္ဒိယကြားမှာ တင်းမာမှုတွေ ဖြစ်ပေါ်လာသလို အိန္ဒိယရဲ့ ပြိုင်ဘက် တရုတ်နဲ့ ပိုပြီး နီးကပ်တဲ့ ထိတွေ့ဆက်ဆံမှုတွေ ရှိလာခဲ့ပါတယ်။
ကိုးကား: New Age
