ဟာနာဆန်/People’s Spring
မကွေးတိုင်း၊ ပခုက္ကူနှင့် ရေစကြိုမြို့နယ်တွင် စစ်ကောင်စီစစ်ဆေးရေးဂိတ်နှင့် ပျူစောထီးကျေးရွာအား ဒရုန်းဖြင့် ဗုံးသီးချတိုက်ခိုက်ရာ ထိခိုက်သေဆုံးမှုရှိကြောင်း တော်လှန်ရေးအဖွဲ့များက ပြောသည်။
ပခုက္ကူမြို့နယ် တင်းဂါတ်ကျေးရွာရှိ စစ်ကောင်စီတပ်နှင့်ပျူစောထီးဂိတ်အား အောက်တိုဘာ ၂၇ ရက် နံနက် ၁၀နာရီခန့်မှစ၍ ၂နာရီကြာ ဒရုန်းဖြင့် ဗုံးသီး ၁၆လုံး ကြဲတိုက်ခိုက်ခဲ့ကြောင်း မြိုင် မြို့နယ်ပြည်သူ့ကာကွယ်ရေးအဖွဲ့(ပကဖ) ခေါင်းဆောင် ကိုလက်ယျာက ပြောသည်။
Public Service Announcement
တိုက်ခိုက်မှုကြောင့် ပျူစောထီး နှစ်ဦးသေဆုံးပြီး အများအပြား ထိခိုက်ဒဏ်ရာရရှိကြောင်း ၎င်းကဆိုသည်။
“သူတို့ရှိတဲ့နေရာတွေအကုန်လုံး ဗုံးသီးချတာ။ ဒီကောင်တွေက ပခုက္ကူတို့ဘာတို့ သွားတဲ့ကားတွေကို ငွေတောင်းတာတွေလုပ်တဲ့ဂိတ်ပါ။”ဟု ကိုလက်ယျာက ပြောသည်။
အလားတူ အောက်တိုဘာ ၂၄ရက်ကလည်း မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသရှိ မင်းရွာပျူရွာအား နံနက် ၈နာရီခန့်တွင် ဗုံးသီး ၁၀လုံး၊ ညနေ၄နာရီခန့်တွင် ဗုံးသီး ၅လုံး စုစုပေါင်း ဗုံးသီး ၁၅လုံး ကြဲချတိုက်ခိုက်ခဲ့ကြောင်း Myingyan Black Tiger (MBT)တပ်ဖွဲ့ခေါင်းဆောင် ဗိုလ်မိုက်ခဲက ပြောသည်။
တိုက်ခိုက်မှုကြောင့် အဆောက်ဦး ထိခိုက်ပျက်စီးမှုနှင့် ထိခိုက်ဒဏ်ရာရရှိမှုများ ရှိနိုင်ကြောင်း ၎င်းကဆိုသည်။
“မင်းရွာမှာက ပျူစောထီးအင်အား ခြောက်ဆယ်ခုနှစ်ဆယ်လောက်ရှိတယ်။ စစ်သားအနည်းငယ်လည်းရှိတယ်။အပြင်ကိုစစ်ကြောင်းထိုးတာမျိုးတော့ အခုနောက်ပိုင်း မတွေ့ရတော့ဘူး။”ဟု MBTတပ်ဖွဲ့ခေါင်းဆောင် ဗိုလ်မိုက်ခဲက ပြောသည်။
တင်းဂတ်ကျေးရွာတိုက်ခိုက်မှုကို မြိုင်ပကဖနှင့် အတူ ပေါက်ပကဖ၊ Bly ပျောက်ကျားတပ်ဖွဲ့၊ PKU Thurain၊ Black cobraforce(ကမ္မတပ်ပါင်းစု)၊ DMG ဓားမင်းကြီးအဖွဲ့တို့က လည်းကောင်း၊ မင်းရွာတိုက်ခိုက်မှုကို Myingyan Black Tiger (MBT)တပ်ဖွဲ့ မြင်းခြံခရိုင်အမှတ် ၉တပ်ရင်း၊ရဲဘော်ညီနောင်ပြောက်ကျားတပ်၊ဧရာဝတီမင်းသားပြောက်ကျားတပ်ဖွဲ့(မြင်းခြံ)၊NY Local PDF တို့ကလည်းကောင်း တိုက်ခိုက်ခဲ့ခြင်းဖြစ်သည်။
ရေစကြို-ပခုက္ကူလမ်းပိုင်းရှိ နေရာအချို့တွင်လည်း စစ်ကောင်စီဂိတ်များ၊ ပျူစောထီးများက စစ်ဆေးခြိမ်းခြောက် ငွေတောင်းခံနေ၍ ပြည်သူများသွားလာရေးခက်ခဲနေကြောင်း သတင်းရရှိသည်။
