အာဆီယံထိပ်သီးအစည်းအဝေးမှာ စစ်ကောင်စီကို နိုင်ငံခေါင်းဆောင်တွေ ဘယ်လိုမှတ်ချက်ပြုလဲ

စစ်ကောင်စီခေါင်းဆောင်ကို ချန်လှပ်ပြီး ဒီနေ့စတင်ကျင်းပတဲ့ အာဆီယံထိပ်သီးအစည်းအဝေးတွေမှာ နိုင်ငံခေါင်းဆောင်အသီးသီးက စစ်ကောင်စီနဲ့ပတ်သက်ပြီး မှတ်ချက်အသီးသီး​ပေးကြပါတယ်။

ကိုဗစ်ကြောင့် အစည်းအဝေးကို အွန်လိုင်းကကျင်းပတာဖြစ်ပြီး စစ်ခေါင်းဆောင်ကိုမဖိတ်ဘဲ နိုင်ငံခြားရေးကအရာရှိတစ်ဦးကိုဖိတ်ပေမယ့်နောက်ဆုံးအချိန်ထိ စစ်ကောင်စီဘက်က တက်ရောက်မယ့်သူကို့ပေးပို့လာတာမရှိဘူးလို့ သိရပါတယ်။

အဲဒီအစည်းအဝေးကို တက်ရောက်လာတဲ့ မလေးရှားဝန်ကြီးချုပ်က မြန်မာ့အရေးကို ဖြေရှင်းဖို့ သဘောတူညီထားတဲ့ အာဆီယံ ဘုံသဘောတူညီချက်တွေကိုဖော်ဆောင်ဖို့ပျက်ကွက်တဲ့အတွက် စစ်ကောင်စီကို တက်ခွင့်မပေးတဲ့ ဆုံးဖြတ်ချက်ကို လုံးဝထောက်ခံတယ်လို့ ဆိုထားပါတယ်။

စင်ကာပူဝန်ကြီးချုပ်ကလည်း အာဆီယံရဲ့ ဂုဏ်သိက္ခာအတွက် စိန်ခေါ်မှုများပြားတဲ့ကာလမှာ ခက်ခဲတဲ့ ဆုံးဖြတ်ချက် ချနိုင်ခဲ့တာကို ထောက်ခံတယ်လို့ ပြောပါတယ်။

Public Service Announcement

ဒါ့အပြင် စစ်ကောင်စီအနေနဲ့ အာဆီယံအထူးကိုယ်စားလှယ်နဲ့ အပြည့်အဝ ပူးပေါင်းဆောင်ရွက်မှုကို မြန်မြန်ဆန်ဆန်ဆောင်ရွက်ဖို့ စင်ကာပူဝန်ကြီးချုပ်က တိုက်တွန်းပါတယ်။

ထိုင်းဝန်ကြီးချုပ်ကလည်း စစ်တပ်အုပ်ချုပ်နေတဲ့ မြန်မာနိုင်ငံရဲ့အခြေအနေဟာ အာဆီယံအဖွဲ့ကြီးရဲ့ ပြဿနာဖြေရှင်းနိုင်စွမ်း ကို စမ်းသပ်နေတာလို့ ပြောပါတယ်။ ဒီအရေးမှာ အဖွဲ့ကြီးရဲ့ နိုင်ငံတကာ ဂုဏ်သိက္ခာကိုလည်းကြည့်ရမယ်လို့ ထိပ်သီးအစည်းအဝေးမှာပြောပါတယ်။

အာဆီယံထိပ်သီးအစည်းအဝေးကို ၃ ရက်ကြာကျင်းပမှာဖြစ်ပြီးကျန်ရက်တွေမှာ အမေရိကန်သမ္မတ တက်ရောက်ဖို့ရှိနေပါတယ်။

စစ်ကောင်စီဟာ သူတို့ရဲ့ခေါင်းဆောင်ကို တက်ခွင့်မပေးတာကြောင့် အခြားအဆင့် ကိုယ်စားလှယ် တစ်ဦး တက်ခွင့်ပြုတာကိုလည်း ငြင်းဆန်ထားတာပါ။

ဒါအပြင် ထိပ်သီးအစည်းအဝေးကို တက်ခွင့်မပြုတဲ့ အာဆီယံ ရဲ့ ဆုံးဖြတ်ချက်ဟာ အဖွဲ့ကြီးရဲ့ ပဋိဉာဉ်ကိုချိုးဖောက်ရာရောက်တဲ့အပြင် အဖွဲ့ကြီး ရဲ့စည်းလုံးမှုအပေါ် သက်ရောက်လာနိုင်တယ်လို့ သတိပြန်ပေးထားတာရှိပါတယ်။