အင်ကြင်း/People’s Spring
ယမန်နေ့(ဒီဇင်ဘာ ၉ရက်) ညနေ ၃နာရီခန့်က ပလိပ်မြို့ပေါ် ရပ်ကွက်တစ်ခု၌ စစ်ကောင်စီတပ်က စစ်ကား၂စီးဖြင့် ရောက်ရှိလာပြီး လူငယ် ငါးဦးအား စစ်မှုထမ်းရန် ဖမ်းဆီးသွားကြောင်း Voice Of Mandalay အဖွဲ့က အသိပေးသည်။
“ပလိပ်မှာ အကုန်ပတ်ဆွဲနေတာ။ အခြေအနေမကောင်းဘူး။”ဟု ပလိပ်ဒေသခံလူငယ်တစ်ဦးက ပြောသည်။
ထို့ကြောင့် လူငယ်များမှာ စစ်မှုထမ်းဖမ်းဆီးခံရမည်စိုး၍ မန္တလေးမြို့ပေါ်သို့ အလုပ်သွားရောက်လုပ်ကိုင်ခြင်းမပြုတော့ဘဲ အလုပ်များရပ်နားထားရကြောင်း ဒေသခံများက ပြောသည်။
Public Service Announcement
ပလိပ်မြို့အပြင် မန္တလေးမြို့ပေါ်ရပ်ကွက်များတွင်လည်း စစ်ကောင်စီတပ်က ဖမ်းဆီးမှုများပြုလုပ်နေပြီး ဒီဇင်ဘာလဆန်းပိုင်းအတွင်း လူငယ် ၃၀ထက်မနည်း ဖမ်းဆီးခံခဲ့ရသည်ကို Voice Of Mandalay ၏ စာရင်းများအရ သိရသည်။
စစ်ကောင်စီသည် နိုဝင်ဘာ ပထမလဝက်အတွင်းကလည်း မန္တလေး၊တံတားဦး၊ ကျောက်ဆည်၊ မြစ်သား၊ ဝမ်းတွင်း၊ မလှိုင်၊ မိတ္ထီလာနယ်များမှ လူငယ်ရာချီ စစ်မှုထမ်းရန် အဓမ္မဖမ်းဆီးခေါ်ဆောင်သွားသည်။
စစ်မှုထမ်းဥပဒေကို စစ်တပ်အုပ်ချုပ်ခဲ့သည့် ၂၀၁၀ နိုဝင်ဘာတွင် ပြဌာန်းခဲ့သည်။ ထို့နောက် ၁၅ နှစ်နီးပါးအကြာ စစ်တပ်က အာဏာသိမ်းထားသည့် ကာလ ၂၀၂၄ ဖေဖော်ဝါရီ၁၀ရက်နေ့တွင် စတင်ကျင့်သုံးလိုက်ကြောင်း စစ်ကောင်စီက ကြေညာခဲ့သည်။ စစ်ကောင်စီသည် ဥပဒေကို အသက်သွင်းပြီးပြီးချင်း နည်းဥပဒေပင် မထွက်သေးခင် ဧပြီလကစ၍ နိုင်ငံတဝန်းရှိ လူငယ်များအား စစ်မှုထမ်းခေါ်ဆိုခဲ့ရာ ယခုအခါ အပတ်စဥ်(၇)သို့ ရောက်ရှိနေပြီဖြစ်သည်။
